2 SAMUEL 8 - KA BAIBL

U Dabid u pynïar ïa ki pud ka hima jong u

¹ Hadien kane te u Dabid u la shoh ïa ki Philistia, bad u la jop ïa ki: bad u Dabid u la knieh noh ïa ka Metheg-ammah na ka kti ki Philistia.

² Bad u la shoh ïa ki Moab, bad u la thew ïa ki da u ksai, u da pynthiah ïa ki ha khyndew; ïa ka ban pynïap u la thew da ar tylli ki ksai, ïa ka ban ri im te u la thew da uwei u ksai shilynter. Bad kita ki Moab ki la long ki khun kliarwait, bad kiba ai khrong ha u Dabid.

³ U Dabid u la shoh ruh ïa u Hadadeser u khun u Rehob, u syiem ka Sobah, mynba u dang leit ïa ka ban knieh noh ïa la ka hima hajan ka Wah Ïuphratis.

⁴ Bad u Dabid u la kem na u, shi hajar hynñiewspah ki nongshong kulai, bad arphew hajar ki shipai ba ïaleh na tbian: bad u Dabid u la ot ïa ki thied khohwah jong ki kulai ki kali ïapom baroh, hynrei, u la pynsah na ki, shispah tylli ïa ki kali ïapom.

⁵ Bad haba ki Syria kiba na Damaskos ki la ïawan ban ïarap ïa u Hadadeser u syiem ka Sobah, u Dabid u la pynïap na ki Syria, arphew ar hajar ki rangbah.

⁶ Hangta u Dabid u la buh ïa ki karod ha Syria jong ka Damaskos: te kita ki Syria ki la long ki khun kliarwait ha u Dabid, bad kiba ai khrong. Bad U Trai u la ai ka jingjop ïa u Dabid kat shaba u la leit.

⁷ U Dabid u la shim noh ïa kita ki 'tieh ksiar ruh kiba ha ki shakri u Hadadeser, bad u la wallam ïa ki sha Jerusalem.

⁸ Bad na Betah ruh bad na Berothai, ki nongbah jong u Hadadeser, u syiem Dabid u la wallam shikatdei eh ka tama.

⁹ Haba u Toi u syiem ka Hamath u la ïohsngew ba u Dabid u la shoh jop ïa u paidïapom u Hadadeser baroh,

¹⁰ hangta te u Toi u la phah ïa u Joram u khun jong u sha u syiem Dabid, ïa ka ban khublei ïa u, bad ban kyrkhu ïa u, namar ba u la ïaleh thma ïa u Hadadeser bad ba u la jop noh ïa u: naba u Hadadeser u la shait ïaleh thma ïa u Toi. Bad u Joram u la wallam lem bad u, ïa ki pliang rupa, bad ïa ki pliang ksiar, bad ïa ki pliang tama de:

¹¹ ïa kine ruh, u syiem Dabid u la pynkyntang ha U Trai, lem bad kata ka rupa bad kata ka ksiar ïa kaba u la pynkyntang kaba na kita ki jaid bynriew baroh ïa kiba u la jop noh:

¹² kaba na ki Syria, bad na ki Moab, bad na ki khun u Ammon, bad na ki Philistia, bad na ki Amalek, bad na kata ka jinglute kaba na u Hadadeser, u khun u Rehob, u syiem ka Sobah.

¹³ Bad la kyntiew nam ïa u Dabid, haba u la wan phai noh na kaba pynïap ïa ki Syria ha ka Them ka Mluh, kata jin khatphra hajar ngut ki briew.

¹⁴ Bad u la buh ki karod ha ka ri Edom; ha ka ri Edom baroh kawei keiñ u la buh ki karod, bad ki Edom baroh ki la long ki khun kliarwait ha u Dabid. U Trai te u la ai ka jingjop ïa u Dabid kat shaba u la leit.

Ki rangbah u Dabid

¹⁵ Bad u Dabid u la synshar halor ki Israel baroh: bad u Dabid u la leh ïa ka jingbishar bad ïa ka hok ïa ki briew jong u baroh.

¹⁶ Te u Joab u khun ka Seruïah u la long halor u paidïapom; bad u Jehoshaphat u khun u Ahilud u la long uba thoh pynkynmaw:

¹⁷ bad u Sadok u khun u Ahitub, bad u Ahimelekh u khun u Abiathar, ki la long ki lyngdoh; bad u Seraïah u la long u nongthoh;

¹⁸ bad u Benaïah u khun u Jehoïada u la long halor ki Khereth bad ki Peleth ruh; te ki khun shynrang u Dabid ki la long ki bakhraw batri.