2 SAMUEL 7 - KA BAIBL

Ka jutang hapdeng U Blei bad u Dabid

¹ Haba u syiem te u la shong ha la ïing, bad ba U Trai u la ai kaba jahthait ïa u na ki nongshun jong u baroh kylleng sawdong,

² u syiem u la ong ha u Nathan u nongïathuhlypa, “Ha khmih mynta, nga, nga shong ha ka ïing dieng Kedar, hynrei, ka synduk U Blei ka shong hapoh ki jaiñ.”

³ Bad u Nathan u la ong ha u syiem, “Khie, to leh ïa kiei kiei baroh kiba ha ka dohnud jong me; naba U Trai u don lem bad me.”

⁴ Te ha kata ka miet, ka la jia ba ka ktien U Trai ka la wan ha u Nathan, ka da ong,

⁵ “Khie leit ïathuh ïa u shakri jong nga u Dabid, ‘Kumne u ong U Trai: Men tei ma me mo ïa ka ïing ha nga ba ngan shong ha ka?

⁶ Namar ngam shym shong ha ka ïing naduh kata ka sngi ba nga la wallam artet ïa ki khun Israel na ka ri Ijipt, haduh kane ka sngi, hynrei, nga la ïaid ha ka ïingjaiñ bad ïa Ka Tabernakl.

⁷ Ha kita ki jaka baroh ha kiba nga la ïaid ryngkat bad ki khun Israel baroh, nga la kren shikyntien ne em ha kano kano ruh na ki jaid ki Israel, ïa kiba nga la hukum ba kin bsa ïa ki briew jong nga ki Israel, da kaba ong, “Balei ba phim shym la tei ka ïing dieng Kedar ïa nga?”

⁸ Mynta te men ong kumne ïa u Dabid u shakri jong nga, “Kumne u ong U Trai ki paid: Nga la shim ïa me na kata ka jingker, bad na kaba bud ïa ki langbrot, ïa ka ban long u nongïalam halor ki briew jong nga, halor ki Israel keiñ.

⁹ Bad nga la don ryngkat bad me kat shaba me la leit, bad nga la ot noh ïa ki nongshun jong me baroh na khmat jong me; bad ngan pynlong ïa me ka nam ka bakhraw, kum ka nam jong ki bakhraw tam kiba ha ka pyrthei.

¹⁰ Ngan buh jaka ruh ïa ki briew jong nga ki Israel, bad ngan thung ïa ki, ba kin ïoh shong ha la ka jong ka jaka, bad ba kin ym kynriah noh shuh; te ki khun ka pop kin ym ïoh pynjynjar shuh ïa ki, kumba mynshuwa,

¹¹ bad kumba ka la long naduh kata ka sngi ba nga la thung ïa ki nongbishar halor ki briew jong nga ki Israel keiñ: bad ngan ai kaba jahthait ïa me na ki nongshun jong me baroh.” U Trai u pyntip ruh ïa me ba U Trai un pynlong ka ïing ïa me.

¹² Haba la pynkut noh ïa ki sngi jong me, bad ba me la ïohthiah noh bad ki kpa jong me, ngan pynïeng ïa u symbai jong me hadien jong me, u ban mih noh na ka kpoh jong me, bad ngan pynskhem ïa ka jinglong syiem jong u.

¹³ Un tei ma u keiñ ïa ka ïing ïa ka kyrteng jong nga; nga ruh ngan pynskhem ïa ka khet ka jinglong syiem jong u junom.

¹⁴ Ma nga ngan dei khun ïa u, u ruh un dei kpa ïa nga: lada un leh palat, ngan sneng sympat ïa u da u dieng sympat briew, bad da ki jingshoh khun bynriew;

¹⁵ hynrei, ka jingisynei jong nga kan ym kynriah noh na u, kumba nga la shim noh na u Saul, ïa uba nga la kyntait noh ha khmat jong me.

¹⁶ Bad ïa ka ïing jong me bad ïa ka jinglong syiem jong me yn pynskhem ha khmat jong me junom: yn pynskhem keiñ ïa ka khet jong me junom.’ ”

¹⁷ Katba kum kine ki ktien baroh, bad katba kum kane ka jingithuhpaw baroh, kumta keiñ u Nathan u la kren ha u Dabid.

¹⁸ Ynda kumta, u syiem Dabid u la leit bsut, bad u la shong ha khmat U Trai; bad u la ong, “Nga, nga long uei, A Trai U Blei, bad ka ïing jong nga ka long aïu, ba me la wallam ïa nga haduh hangne?

¹⁹ Bad kane ka la long pynban ka barit ha khmat jong me, A Trai U Blei; hynrei, me la kren shaphang ka ïing u shakri jong me sha ka ban slem eh ruh; bad kane ruh kat kum ka rukom briew, A Trai U Blei!

²⁰ Te u Dabid un lah ong aïu pat ïa me? naba ma me, A Trai U Blei, me ithuh ïa la u shakri.

²¹ Na ka bynta ka ktien jong me hi, bad katba kum ka dohnud jong me hi, me la leh ïa kane kaba khraw baroh, ïa ka ban pyntip ïa ka ha la u shakri.

²² Namar kata, me long u bakhraw, A Trai U Blei; naba ym don uba kat ma me, lymne ym don U Blei nalor jong me, katba kum kata baroh ïa kaba ngi la ïohsngew da la ki shkor.

²³ Bad kano ka jaid bynriew kawei ha ka khyndew kaba kum u paidlang jong me, kum ki Israel keiñ, ïa kaba U Blei u la leit ban pynim, ba kin long u paidlang ïa u hi, bad ban pynlong ïa lade ka nam, bad ban leh na ka bynta jong phi ïa kiei kiei ki bakhraw, bad ïa kiei kiei kiba itriem na ka bynta ka ri jong me, ha khmat u paidlang jong me, kiba me la pynim na ka ri Ijipt na ka bynta ïa lade, na kita ki jaid bynriew bad na ki blei jong ki?

²⁴ Namar me la pynskhem ha lade ïa u paidlang jong me, ïa ki Israel keiñ, ba kin long u paidlang ïa me hi junom; naba ma me, A Trai, me la jia long U Blei jong ki.

²⁵ Mynta te, A Trai U Blei, to pynskhem junom ïa kata ka ktien kaba me la kren shaphang u shakri jong me, bad shaphang kata ka ïing jong u, bad to leh ruh kumba me la ong.

²⁶ Bad to ai ba ka kyrteng jong me kan long ïa kaba la pynkhraw junom, da kaba ong, ‘U Trai ki paid u long U Blei halor ki Israel:’ bad to ai ba ka ïing u Dabid u shakri jong me kan long ïa kaba la pynskhem ha khmat jong me.

²⁷ Namar ma me, A Trai ki paid, U Blei ki Israel, me la pynbna ha la u shakri, da kaba ong, ‘Ngan tei ïa me ka ïing’: namar kata keiñ, u shakri jong me u la shem ha la ka dohnud ïa ka ban duwai ha me ïa kane ka jingduwai.

²⁸ Te mynta, A Trai U Blei, me, me long U Blei, bad ki ktien jong me ki long ka jingshisha, bad me la kular ïa la u shakri ïa kane ka jingbha:

²⁹ namar kata, to men sngewbha ban kyrkhu ïa ka ïing u shakri jong me, ba kan ïaisah ha khmat jong me junom: naba me la kren ma me ïa kane, A Trai U Blei: bad to ai ka ïing u shakri jong me ba yn kyrkhu ïa ka junom da ka jingkyrkhu jong me.”