2 SAMUEL 6 - KA BAIBL

U Dabid u wallam ïa Ka Synduk Ka Jutang

¹ Bad u Dabid u la lum lang pat ïa kiba la kynsai jong ki Israel baroh, jin laiphew hajar ngut.

² Bad u Dabid u la ïeng bad u la leit lem bad uta u paidbah baroh uba bad u, na Baale Judah ïa ka ban wallam artet ïa ka synduk U Blei, ïa kaba la khot da kata ka Kyrteng, ka kyrteng U Trai ki paid keiñ uba shong hapdeng ki Kherub.

³ Bad ki la buh ïa kata ka synduk U Blei ha ka kali ka bathymmai, bad ki la wallam ïa ka na ka ïing u Abinadab, kaba ha Gibeah: te u Ussah bad u Ahio, ki khun u Abinadab, ki la ñiah ïa kata ka kali ka bathymmai.

⁴ Te ki la wallam ïa ka na ka ïing u Abinadab, kaba ha Gibeah, lem bad kata ka synduk U Blei: bad u Ahio u la ïaid ha shuwa kata ka synduk.

⁵ Bad u Dabid bad ka ïing Israel baroh ki la tem ha khmat U Trai ïa ki jingtem baroh kiba da u dieng Kseh, ïa ki duitara, ïa ki nebel, ïa ki kanjari, ïa ki manirai, bad ïa ki shakuriaw de.

⁶ Te haba ki la poi sha ka kyntem u Nakon, u Ussah u la rah ïa la ka kti sha kata ka synduk U Blei, bad u la bat ïa ka; naba kita ki masi ki la jynthut.

⁷ Bad ka jingbitar U Trai ka la meh lep ïa u Ussah; bad U Blei u la shoh ïa u hangta namar kata ka jingleh klet; bad hangta u la ïap hajan kata ka synduk U Blei.

⁸ Bad u Dabid u la sngewsih namar ba U Trai u la tur pynïap ïa u Ussah: bad u la khot kyrteng ïa kata ka jaka “ka Peres-Ussah”, haduh kane ka sngi.

⁹ Bad u Dabid u la sheptieng ïa U Trai ha kata ka sngi; bad u la ong, “Kumno kan wan ka synduk U Trai sha nga?”

¹⁰ Kumta, u Dabid um treh shuh ban pynkynriah ïa ka synduk U Trai ha lade sha ka nongbah u Dabid; hynrei, u Dabid u la pynphai ïa ka sha ïing u Obed-edom u nong Gath.

¹¹ Bad ka synduk U Trai ka la sah ha ïing u Obed-edom u nong Gath lai bnai: te U Trai u la kyrkhu ïa u Obed-edom, bad ïa ka ïing jong u baroh.

Ka Synduk Ka Jutang ha Seïon

¹² Te la ïathuh ha u syiem Dabid, da kaba ong, “U Trai u la kyrkhu ïa ka ïing u Obed-edom, bad ïa kiei kiei baroh ki jong u, na ka bynta kata ka synduk U Blei.” Kumta te, u Dabid u la leit wallam noh artet ïa ka synduk U Blei na ïing u Obed-edom sha ka nongbah u Dabid da ka jingkmen.

¹³ Te haba kita kiba bah ïa ka synduk U Trai ki la nang leit hynriew sien-jam, hangta u la kñia ïa u masi dab bad ïa kiba sngaid.

¹⁴ Bad u Dabid u la shad katba u lah ha khmat U Trai; bad u Dabid u la phong da ka ephod linen.

¹⁵ Kumta, u Dabid bad ka ïing Israel baroh ki la wallam noh artet ïa ka synduk U Trai da ka jingrisa, bad ka jingsawa ka ronsing.

¹⁶ Te katba ka synduk U Trai ka la wan poi shapoh ka nongbah u Dabid, hangta ka Mikhal ka khun u Saul haba ka la khmih na ka jingkhang ïit, ka la ïohi ïa u syiem Dabid ba u da rynsied bad ba u da shad ha khmat U Trai; bad ka la beiñ ïa u ha la ka dohnud.

¹⁷ Te ki la wallam shapoh ïa kata ka synduk U Trai, bad ki la buh ïa ka ha la ka jaka, hapdeng kata Ka Tabernakl ïa kaba u Dabid u la pynïeng na ka bynta jong ka: bad u Dabid u la kñia ainguh da ki jingainguh thang bad ki jingainguh bapynïasuk ha khmat U Trai.

¹⁸ Bad ynda u Dabid u la pyndep ban kñia ainguh ïa kita ki jingainguh thang bad ïa kita ki jingainguh bapynïasuk, u la kyrkhu keiñ ïa uta u paidbah ha ka kyrteng U Trai ki paid.

¹⁹ Bad u la sam ha kita ki briew baroh, kata ha u paidlang ki Israel baroh, ha ki shynrang bad ha ki kynthei ruh, ha uwei pa uwei baroh, uwei u kpu, bad shi tukra ka doh, bad iwei i kpu da u soh Khajur. Kumta uta u paidbah baroh ki la leit wan noh uwei pa uwei baroh ha la ka jong ka ïing.

²⁰ Ynda kumta, u Dabid u la leit phai noh ïa ka ban kyrkhu ïa la ki ba-ha-ïing. Te ka Mikhal ka khun u Saul ka la leit tan ïa u Dabid, bad ka la ong, “A katno uba donburom mo u syiem ki Israel u la long ha kane ka sngi, uba ha kane ka sngi u la pynlyngkhuit ïa lade ha khmat ki shakri kynthei jong ki shakri jong u, kumjuh kumba u 'riewthala u pynlyngkhuit khlem rain ïa lade!”

²¹ Te u Dabid u la ong ha ka Mikhal, “Ka la long ha khmat U Trai keiñ, uba la jied ïa nga pynban, ban ïa u kpa jong pha, bad ban ïa ka ïing jong u baroh, u da thung ïa nga ban long u nongïalam halor u paidbah jong U Trai, halor ki Israel: namar kata, ngan nang leh sngewbha ruh ha khmat U Trai.

²² Te ngan long uba kham ibeiñ pat ban ïa kane, bad ngan long uba ibeiñ ha la ka jong ka jingñiew: hynrei, kita ki shakri kynthei ba pha la kren shaphang jong ki, kita keiñ kin pyndonburom ïa nga.”

²³ Te ka Mikhal ka khun u Saul kam shym la ïoh khun haduh ka sngi ka jingïap jong ka.