2 SAMUEL 5 - KA BAIBL

La pynlong syiem ïa u Dabid halor ki Israel

¹ Ynda kumta, ki jaid Israel baroh ki la ïawan ha u Dabid sha Hebron, bad ki la kren, ki ïa-ong, “Ha khmih, ngi long ka shyieng jong me bad ka doh jong me.

² Mynshuwa ruh, mynba u Saul u la long syiem halor jong ngi, long ma me uba la ju ïalam shabar bad uba wallam shapoh ïa ki Israel: bad U Trai u la ong ha me, ‘Men bsa ma me ïa ki briew jong nga ki Israel, bad men long u nongïalam ïa ki Israel.’ ”

³ Kumta, ki tymmen basan ki Israel baroh ki la ïawan ha u syiem sha Hebron; bad u syiem Dabid u la teh jutang bad ki ha Hebron ha khmat U Trai: bad ki la pynsleh ïa u Dabid ban long syiem halor ki Israel.

⁴ U Dabid u la laiphew snem ka rta mynba u la sdang ban synshar, bad u la synshar sawphew snem.

⁵ Ha Hebron u la synshar hynñiew snem hynriew bnai halor ki Judah: bad ha Jerusalem u la synshar laiphew lai snem halor ki Israel bad ki Judah baroh.

U Dabid u knieh ïa ka Seïon

⁶ Te u syiem bad u paid jong u ki la leit sha Jerusalem ban ïaleh ïa ki Jebus, kiba ki trai-shnong jong kata ka ri: kiba la kren ha u Dabid, ki ïa-ong, “Men ym ïoh wan shane, lymda men shim noh ïa ki bamatlah bad ïa ki ba-dkoh:” ki da mut, “U Dabid um lah rung shane.”

⁷ Pynban, u Dabid u la jop ïa ka kut jong ka Seïon; kata ka long “Ka nongbah u Dabid”.

⁸ Ha kata ka sngi, u Dabid u la ong, “Jar u ban pom ïa ki Jebus, to un leit kiew na kane ka nur um, bad un pom ïa kita ki ba-dkoh bad ïa ki bamatlah, kiba ka mynsiem u Dabid ka isih.” Namar kata, ki ïa-ong, “Ki bamatlah bad ki ba-dkoh ki hangta; um lah rung ruh shapoh ïing.”

⁹ Te u Dabid u la shong ha kata ka kut, bad u la khot kyrteng ïa ka “Ka nongbah u Dabid”. Bad u Dabid u la tei kynroh baroh sawdong naduh Millo bad shapoh.

¹⁰ Bad u Dabid u la nang ïoh bor nang ïoh bor; bad U Trai, U Blei ki paid, u la don ryngkat bad u.

U Hiram u ithuh syiem ïa u Dabid

¹¹ Bad u Hiram u syiem ka Tyros u la phah ki nongkit-ktien ha u Dabid, bad ki dieng Kedar, bad ïa ki misteri dieng, bad ki misteri maw: bad ki la tei ïing ïa u Dabid.

¹² Bad u Dabid u la tip ba U Trai u la pynskhem ïa u ban long syiem halor ki Israel, bad ba U la pynkyntiew ïa ka jinglong syiem jong u na ka bynta ki briew jong U, ki Israel keiñ.

Kaba kha ki khun shynrang ïa u Dabid ha Jerusalem

¹³ Te u Dabid u la shim shuh shuh ïa ki tnga kliar bad ki tnga trai na Jerusalem, hadien ba u la wan noh na Hebron: bad la nang kha ha u Dabid ki khun shynrang bad kynthei.

¹⁴ Bad kine ki kyrteng jong kita kiba la kha ha u ha Jerusalem; u Shammua, bad u Shobab, bad u Nathan, bad u Solomon,

¹⁵ u Ibhar ruh, bad u Elishua; bad u Nepheg, bad u Japhia;

¹⁶ bad u Elishama, bad u Eliada, bad u Eliphelet.

U Dabid u jop ïa ki Philistia

¹⁷ Te haba ki Philistia ki la ïohsngew ba ki la lah pynsleh ïa u Dabid ban long syiem halor ki Israel, ki Philistia baroh ki la wan kiew ban wad ïa u Dabid; bad u Dabid u la ïohsngew, bad u la leit hiar sha kata ka kut.

¹⁸ Bad ki Philistia ki la wan bad ki la saphred ïa lade ha ka them Rephaim.

¹⁹ Te u Dabid u la kylli na U Trai, u da ong, “Ngan leit kiew ne em ban ïaleh ïa ki Philistia? Men ai noh ne em ïa ki ha ka kti jong nga?” Bad U Trai u la ïathuh ha u Dabid, “Khie leit kiew; naba ngan ai noh shisha ïa kine ki Philistia ha ka kti jong me.”

²⁰ Bad u Dabid u la leit sha Baal-perasim, bad u Dabid u la shoh pynïap ïa ki hangta; bad u la ong, “U Trai u la pynsaphred ïa ki nongshun jong nga ha shuwa jong nga, kumba pynsaphred ïa ka um.” Namar kata, u la khot kyrteng ïa kata ka jaka “Baal-perasim”.

²¹ Te ki la iehnoh noh hangta ïa ki durblei jong ki, bad u Dabid bad u paidbah jong u ki la shim noh ïa ki.

²² Bad ki Philistia ki la wan kiew pat sa shi sien, bad ki la saphred ïa lade ha ka them Rephaim.

²³ Te haba u Dabid u la kylli na U Trai, U la ong ha u, “Wat leit kiew: hynrei, leit sawdong na shadien jong ki, bad kyntur sha ki ha marpyrshah kita ki dieng Bekaim.

²⁴ Te haba me ïohsngew ka jingsawa kum ka jingïaid ha ki kliar jong kita ki dieng Bekaim, hangta te men pynkhih ïa lade: namar haba kumta, U Trai un leit mih ha shuwa jong me ïa ka ban shoh pynïap ïa u paid jong ki Philistia.”

²⁵ Bad u Dabid u la leh kumta, kumba U Trai u la hukum ïa u; bad u la shoh pynïap ïa ki Philistia naduh Geba haduh kaba poi sha Geser.