2 SAMUEL 4 - KA BAIBL

Ka jingpynïap ïa u Ishbosheth

¹ Te haba u khun u Saul u la ïohsngew ba u la ïap u Abner ha Hebron, ki kti jong u ki la duh bor, bad ki Israel baroh ki la khuslai.

² Bad u khun u Saul u la don ar ngut ki rangbah kiba la long ki kaptan ïa ka kynhun: ka kyrteng uwei “u Baanah”, bad ka kyrteng uta uwei “u Rekhab”, ki khun u Rimmon u nong Beeroth, na ki khun u Benjamin: (naba ïa ka Beeroth ruh la ñiew ka jong ki Benjamin:

³ te ki Beeroth ki la phet ïap sha Gittaim, bad hangta ki la sah kum ki sohshnong haduh kane ka sngi.)

⁴ Bad u Jonathan, u khun u Saul, u la don u khun u ba-dkoh ki kjat. Une, u la san snem ka rta haba la poi ka jingbna na Jesril shaphang u Saul bad u Jonathan, te ka nongsumar ka la shim, ka la rah ïa u bad ka la phet ïap: ka la jia te katba ka la pynkloi ban phet, ba u la hap, bad u la dkoh. Bad ka kyrteng jong u ka la long “u Mephibosheth”.

⁵ Te kine ki khun u Rimmon u nong Beeroth, u Rekhab bad u Baanah, ki la leit, bad ki la poi sha ka ïing u Ishbosheth hamar kaba la shit ka sngi, haba u dang thiah kai ha kaba shiteng sngi.

⁶ Te ki la leit bsut shapoh ïing, kum ban sa wan shim Kew; bad ki la shoh ïa u na ka kpoh: bad u Rekhab bad u Baanah u para jong u ki la ïaphet ïap noh.

⁷ Naba u dang thiah ha la ka jingthiah ha ka kamra thiah jong u, haba ki la rung shapoh ïing, bad ki la shoh pynïap ïa u, bad ki la khrai ïa ka khlieh jong u, bad ki la shim ïa kata ka khlieh, bad ki la ïaid ïa kata ka madan baroh shi miet.

⁸ Bad ki la wallam ïa ka khlieh u Ishbosheth sha u Dabid ha Hebron, bad ki la ong ha u syiem, “Ha khmih ïa ka khlieh u Ishbosheth u khun u Saul u nongshun jong me, uba la wad ïa ka jingim jong me; te ha kane ka sngi U Trai u la pynhiar ïa ka kput u syiem kynrad jong nga halor u Saul, bad halor u symbai jong u.”

⁹ U Dabid te u la ïathuh ha u Rekhab bad u Baanah u para jong u, ki khun u Rimmon u nong Beeroth, bad u la ong ha ki, “Katba im U Trai, uba la pyllait ïa ka mynsiem jong nga na ka jingjynjar baroh,

¹⁰ haba u la ïathuh uwei ha nga, u da ong, ‘Ha khmih, u Saul u la ïap noh,’ u da tharai ba u la wallam ka khubor ka babha, nga la kem ïa u, bad nga la pynïap ïa u ha Siklag, kata keiñ ka la long ka bainong ba nga la ai ïa u, namar kata ka khubor jong u.

¹¹ Katno tam te, haba ki briew bymman ki la pynïap ïa u briew u bahok ha la ïing halor ka jingthiah jong u, ngan ym dawa ïa ka snam jong u na ki kti jong phi, bad pynduh noh ïa phi na ka khyndew?”

¹² Bad u Dabid u la hukum ïa ki samla jong u, ki ruh ki la pynïap ïa ki, bad ki la ot noh ïa ki kti jong ki bad ïa ki kjat jong ki, bad ki la sdien ïa ki hajan ka pung kaba ha Hebron. Hynrei, ïa ka khlieh u Ishbosheth ki la shim, bad ki la tep ha ka jingtep u Abner ha Hebron.