2 SAMUEL 3 - KA BAIBL

¹ Te ka thma kaba slem ka la don hapdeng ka ïing u Saul bad ka ïing u Dabid: hynrei, u Dabid u la nang khlaiñ nang khlaiñ, bad ka ïing u Saul ka la nang kham tlot kham tlot.

Kaba kha hynñiew ngut ki khun shynrang ha Hebron

² Te la kha ki khun shynrang ïa u Dabid ha Hebron: bad uba la kha nyngkong jong u, u la long u Amnon, na ka Ahinoam ka nong Jesril;

³ bad u ba-ar jong u, u Khileab, na ka Abigail ka tnga u Nabal u nong Karmel; bad u balai, u Absalom, u khun ka Maakah kaba ka khun u Talmai u syiem ka Gesur;

⁴ bad u basaw, u Adonijah, u khun ka Haggith; bad u basan, u Shephatiah u khun ka Abital;

⁵ bad u bahynriew, u Ithream, na ka Eglah ka tnga u Dabid. Ïa kine keiñ la kha ïa u Dabid ha Hebron.

U Abner u ïateh jutang bad u Dabid

⁶ Te mynba ka la don ka thma hapdeng ka ïing u Saul bad ka ïing u Dabid, u Abner u la ïaleh tyngeh na ka bynta ka ïing u Saul.

⁷ Hynrei, u Saul u la don ka tnga kliar, kaba kyrteng “ka Rispah”, ka khun u Aïah: bad u Ishbosheth u la ong ha u Abner, “Balei ba me la rung sha ka tnga kliar u kpa jong nga?”

⁸ Ynda kumta, u Abner u la khih bitar lep namar kita ki ktien u Ishbosheth, bad u la ong, “Nga, nga long tang ka khlieh ksew uba dei ïa ka Judah mo? Ha kane ka sngi nga leh isynei ïa ka ïing u Saul u kpa jong me, bad ïa ki para jong u, bad ïa ki lok jong u, bad ngam shym la ai noh ïa me ha ka kti u Dabid, pynban, me tei pop halor nga ha kane ka sngi namar kane ka briew?

⁹ To U Blei un leh kumta ïa u Abner, bad un pyntam ruh, lada, kumba U Trai u la smai ha u Dabid, nga ngam leh kumta ïa u;

¹⁰ da kaba pynphai noh ïa ka jinglong syiem na ka ïing u Saul, bad pynïeng la ka khet u Dabid halor ki Israel bad halor ki Judah, naduh Dan haduh Beer-sheba.”

¹¹ U ruh um shym nud shuh ban ïathuh shikyntien ïa u Abner, namar ba u la sheptieng ïa u.

¹² Te u Abner u la phah ki nongkit-ktien ha u Dabid na ka bynta ïa lade, u da ong, “Kane ka ri ka jongno?” u ong ruh, “To pynlong jutang bad nga, te ha khmih, ka kti jong nga kan long lem bad me, ïa ka ban pynwan sha me ïa ki Israel baroh.”

¹³ U ruh u la ong, “Ñiuma; ngan pynlong jutang bad me: hynrei, ïa kane kawei nga dawa na me, kata ka long, men ym ïohi ïa ka khmat jong nga, lymda me wallam shuwa ïa ka Mikhal ka khun u Saul, haba me wan ïohi ïa ka khmat jong nga.”

¹⁴ Bad u Dabid u la phah ïa ki nongkit-ktien ha u Ishbosheth u khun u Saul, u da ong, “Ai noh ha nga ïa ka tnga jong nga, ka Mikhal keiñ, ïa kaba nga la tehktien na ka bynta shispah tylli ki sher jong ki Philistia.”

¹⁵ Bad u Ishbosheth u la phah, bad u la shim noh ïa ka na u tnga jong ka, na u Phaltiel u khun u Laish keiñ.

¹⁶ Bad uta u tnga jong ka u la leit on ïa ka, u da leit u da ïam ruh hadien jong ka haduh Bahurim. Hangta u Abner u la ong ha u, “Khie leit wan noh:” u ruh u la leit wan noh.

¹⁷ Te u Abner u la ïakren bad ki tymmen basan ki Israel, u da ong, “Mynhynnin mynshisngi phi la wad ïa u Dabid ban long syiem halor jong phi.

¹⁸ Mynta te, to leh kumta: naba U Trai u la kren shaphang u Dabid, u da ong, ‘Da ka kti u Dabid u shakri jong nga ngan pyllait ïa ki briew jong nga ki Israel na ka kti ki Philistia, bad na ka kti ki nongshun jong ki baroh.’ ”

¹⁹ Bad u Abner u la ïakren bad ki Benjamin ruh de: bad u Abner u la leit ïa ka ban ïakren ruh bad u Dabid ha Hebron shaphang kita kiei kiei kiba ibit ha ki Israel, bad ha ka ïing ki Benjamin baroh.

²⁰ Kumta, u Abner u la wan poi sha u Dabid ha Hebron, bad arphew ngut ki rangbah ryngkat bad u. Bad u Dabid u la thaw ka jingkhawai ïa u Abner bad ïa kita ki rangbah kiba bad u.

²¹ Bad u Abner u la ong ha u Dabid, “Ngan khie bad ngan leit, bad ngan lum ïa ki Israel baroh ha u syiem kynrad jong nga, ba kin ïohthaw jutang bad me, bad ba men ïoh synshar halor baroh katba kwah ka dohnud jong me.” Bad u Dabid u la phah noh ïa u Abner; u ruh u la leit da kaba suk.

U Joab u pynïap ïa u Abner

²² Te ha khmih, ki shakri u Dabid bad u Joab ki la wan na kaba beh ïa uwei u paid, bad ki la wallam lem bad ki ka jinglute kaba khraw: hynrei, u Abner um shym don bad u Dabid ha Hebron; naba u la lah phah noh ïa u, u ruh u la lah leit da kaba suk.

²³ Haba u Joab te bad uta u paidïapom baroh uba bad u ki la ïawan, la ïathuh ha u Joab, da kaba ong, “U Abner u khun u Ner u la wan sha u syiem, u ruh u la phah noh ïa u, bad u la leit da kaba suk.”

²⁴ Te u Joab u la leit sha u syiem, bad u la ong, “Me la leh aïu? ha khmih, u Abner u la wan sha me; balei te me la phah noh ïa u, bad ba u la leit noh?

²⁵ Me ithuh ïa u Abner u khun u Ner, ba u la wan khnang ban shukor ïa me, ban tip ïa ka jingmih shabar jong me bad ïa ka jingwan shapoh jong me bad ba un tip ïa kiei kiei baroh ïa kiba me leh.”

²⁶ Te haba u Joab u la mih noh na u Dabid, u la phah ki nongkit-ktien hadien u Abner, bad ki la wallam noh pat ïa u na ka pukri u Sirah: hynrei, u Dabid um shym tip ïa kata.

²⁷ Te haba u Abner u la wan phai noh sha Hebron, u Joab u la shim kyrpang ïa u shapdeng ka khyrdop ban ïakren bad u da kaba suk, bad u la shoh ïa u hangta na ka kpoh, ba kumta u la ïap noh, namar ka snam u Asahel u para jong u.

²⁸ Hadien kata, te u Dabid u la ïohsngew, bad u la ong, “Ma nga bad ka hima jong nga ngi khuid keiñ ha khmat U Trai junom na ka snam u Abner u khun u Ner:

²⁹ to kan hap keiñ ha ka khlieh u Joab, bad ha ka ïing u kpa jong u baroh: bad wat ai ban duh na ka ïing u Joab u bapang liat ksuit, lane u bapang 'thohlieh, lane uba shan ha u diengduh, lane uba hap da ka waitlam; lane u bakyrduh kpu.”

³⁰ Kumta, u Joab bad u Abishai u para jong u ki la pynïap ïa u Abner, namar ba u ruh u la pynïap ïa u Asahel u para jong ki ha ka thma ha Gibeon.

³¹ Bad u Dabid u la ong ha u Joab, bad ha uta u paidbah baroh uba don lem bad u, “To kad ïa la ki jaiñ, bad to panpoh ïa lade ha ka jaiñ khain, bad to ïambriew ha khmat u Abner.” Bad u Dabid syiem ruh u la bud hadien ka krong.

³² Bad ki la tep ïa u Abner ha Hebron: bad u syiem u la pynjam ïa la ka ktien, bad u la ïam ha ka jingtep u Abner; bad u paidbah baroh ruh u la ïam.

³³ Bad u syiem u la rwai sngewsynei namar u Abner, bad u la ong, “U Abner u dei ban ïap kumba u ïap uba bieit?

³⁴ Ïa ki kti jong me ym shym la khum, lymne ym shym la buh ïa ki kjat jong me ha ki narkjat; kumba kyllon u briew ha khmat ki khun ka pop, kumta me la kyllon.” Bad u paidbah baroh ki la nang ïam shuh shuh namar jong u.

³⁵ Te u paidbah baroh ki la ïawan katba ka dang shai ïa ka ban pynbam kpu ïa u Dabid; hynrei, u Dabid u la smai, u da ong, “Kumne U Blei un leh ïa nga, bad tam ruh, lada ngan mad ïa u kpu, lymne ïa kaei kaei ruh, tad ynda la sep ka sngi.”

³⁶ Bad u paidbah baroh ki la khmih ïa kata, bad ka la pynsngewbha ïa ki: bad kiei kiei baroh kiba u la leh u syiem ka la pynsngewbha ïa u paidbah baroh.

³⁷ Bad u paidbah baroh ki la sngewthuh ha kata ka sngi ba ym shym long na u syiem ba la pynïap ïa u Abner u khun u Ner.

³⁸ Bad u syiem u la ong ha la ki shakri, “Balei, phim tip ba u nongïalam bad u rangbah u bakhraw batri u la kyllon ha Israel ha kane ka sngi?

³⁹ Ma nga te la la thung syiem ruh ïa nga, nga long uba tlot ha kane ka sngi; bad kine ki rangbah, ki khun ka Seruïah ki kham eh ïa nga: to U Trai un ai nong ïa u nongleh sniew katba kum ka jingbymman jong u.”