2 SAMUEL 24 - KA BAIBL

Kaba kheiñ ïa u paidbah ha Israel bad Judah

¹ Bad ka jingbitar U Trai ka la meh pat ïa ki Israel, bad u la pynkhih ïa u Dabid pyrshah ïa ki, u da ong, “Khie da kheiñ ïa ki Israel bad ïa ki Judah.”

² Te u syiem u la ong ha u Joab u kaptan jong u paidïapom, uba la don lem bad u, “Khie leit te kylleng ïa ki jaid Israel baroh, naduh Dan haduh Beer-sheba, bad to kheiñ ïa u paidlang, ba ngan ïoh tip ïa ka jingkheiñ jong u paidlang.”

³ U Joab, te u la ong ha u syiem, “To U Trai U Blei jong me un pynroi ïa u paidbah shispah shah la ki long katno katno, bad to ai ba ki khmat u syiem kynrad jong nga kin ïohi ïa kata, hynrei, balei ba u syiem kynrad jong nga u mon kum ïa kane?”

⁴ Pynban, ka la kham lah ka ktien u syiem ban ïa u Joab, bad ban ïa ki kaptan u paidïapom. Te u Joab bad ki kaptan u paidïapom ki la mih noh na khmat u syiem, ïa ka ban kheiñ ïa u paidbah Israel.

⁵ Te ki la leit sha shiliang ka Jordan, bad ki la shong dara ha Aroer, sha kamon jong kata ka shnong kaba hapdeng ka them Gad, bad haduh Jaser:

⁶ hadien kata, ki la poi sha Gilead, bad sha ka ri Tahtim-hodsi; bad ki la poi sha Dan-jaan, bad sawdong kylleng haduh Sidon,

⁷ bad ki la poi sha ka kut baskhem ka Tyros, bad sha ki nongbah ki Hib baroh, bad ki jong ki Kanaan: bad ki la leit sha ka phang shathie ka Judah, ha Beer-sheba.

⁸ Kumta, haba ki la leit kylleng ïa ka ri baroh, ki la wan sha Jerusalem ynda la dap khyndai bnai bad arphew sngi.

⁹ Bad u Joab u la ai noh ha u syiem ïa ka jingkheiñ ka jingñiew ïa u paidbah; te ha Israel ki la don phraspah hajar ki rangbah badonbor kiba rah waitlam; bad ki rangbah Judah ki la long sanspah hajar ngut.

¹⁰ Te ka dohnud u Dabid ka la shoh ïa u, hadien ba u la kheiñ ïa u paidbah. Bad u Dabid u la ong ha U Trai, “Nga la leh pop shikatdei ha kaba nga la leh: hynrei mynta, A Trai, nga kyrpad ïa me, to pyndam noh ïa ka jingleh bymman u shakri jong me; naba nga la leh bieit eh.”

¹¹ Te haba u Dabid u la khie mynstep, ka ktien U Trai ka la wan ha u Gad u nongïathuhlypa, u nongïohi u Dabid, da kaba ong,

¹² “Khie leit kren ha u Dabid, ‘Kumne u ong U Trai: Nga buh ha me lai tylli kiei kiei; to jied ha me kawei na ki, ba ngan leh ïa kata ha me.’ ”

¹³ Kumta, u Gad u la wan ha u Dabid, bad u la ïathuh ha u, bad u la ong ha u, “Kan wan ha me hynñiew snem ka 'nemsniew ha ka ri jong me? lane me mon ban phet ïap lai bnai ha khmat ki nongshun jong me haba ki beh ïa me? lane kan long ka jingïapthem lai sngi ha ka ri jong me? mynta to pyrkhat, bad to sngap da kaba kumno ngan phai ktien ha uta uba la phah ïa nga.”

¹⁴ Te u Dabid u la ong ha u Gad, “Nga pisa eh: to ngin ïahap te ha ka kti U Trai: naba ki jingisynei jong u kiba khraw; te wat ai ngan hap ha ka kti u briew.”

¹⁵ Kumta, U Trai u la phah ka jingïapthem ha Israel naduh kata ka step haduh kata ka por ba la buh: bad ki la ïap na ki paidbah naduh Dan haduh Beer-sheba hynñiewphew hajar ki rangbah.

¹⁶ Te haba uta u angel u la kner ïa la ka kti sha Jerusalem ïa ka ban pynjot ïa ka, U Trai u la kylla-ka-bamut shaphang kane ka jingpynsniew, bad u la ong ha uta u angel uba pynjot ïa u paidbah, “Keiñ noh katto; to pynsangeh ïa la ka kti.” Te uta u angel U Trai u la don hajan ka kyntem u Araunah u nong Jebus.

¹⁷ U Dabid te u la kren ha U Trai haba u la ïohi ïa uta u angel uba la shoh ïa u paidbah, bad u la ong, “Ha khmih, nga, nga la leh pop, bad nga, nga la leh kiat: hynrei, kine ki langbrot, ki la leh aïu kine? nga kyrpad ïa me, to ka kti jong me kan long halor jong nga, bad halor ka ïing u kpa jong nga.”

¹⁸ Te u Gad u la wan ha u Dabid ha kata ka sngi, bad u la ong ha u, “Khie leit kiew, tei ka duwan ha U Trai ha kata ka kyntem u Araunah u nong Jebus.”

¹⁹ Bad u Dabid u la leit kiew katba kum ka ktien u Gad, kumba la hukum U Trai.

²⁰ U Araunah te u la khmih, bad u la ïohi ïa u syiem bad ki shakri jong u ba ki nang wan sha u: bad u Araunah u la mih noh, bad u la dem ngon la ka khmat ha khmat u syiem.

²¹ Bad u Araunah u la ong, “Namar balei ba u syiem kynrad jong nga u la wan ha la u shakri?” Te u Dabid u la ong, “Ïa ka ban thied ïa kane ka kyntem na me, ïa ka ban tei ka duwan ha U Trai, ba un pynsangeh na u paidbah ïa kane ka jingïapthem.”

²² Bad u Araunah u la ong ha u Dabid, “To un shim u syiem kynrad jong nga bad un ainguh ïa kaba u ibit: ha khmih, kine ki masi dab ban long ka jingainguh thang, bad kita ki tiar shoh kba, bad ki tiar jong ki masi dab ban long diengïap:

²³ ïa kane baroh, ko syiem, u ai u Araunah ha u syiem.” Bad u Araunah u la ong ha u syiem, “To U Trai U Blei jong me un pdiang sngewbha ïa me.”

²⁴ U syiem te u la ong ha u Araunah, “Em; hynrei, ngan thied hi keiñ ïa ka na me da ka dor: lymne ngan ym ainguh ha U Trai U Blei jong nga da ki jingainguh thang kiba shu ïoh ei.” Kumta, u Dabid u la thied ïa kata ka kyntem bad ïa ki masi dab sanphew ki shekel rupa.

²⁵ Bad u Dabid u la tei ïa ka duwan hangta ha U Trai, bad u la ainguh da ki jingainguh thang bad da ki jingainguh pynïasuk. Kumta U Trai u la ïasuk bad ka ri, bad la pynsangeh ïa kata ka jingïapthem na Israel.