2 SAMUEL 23 - KA BAIBL

Ki ktien ki bakhatduh jong u Dabid

¹ Te kine ki long ki ktien ki bakhatduh ki jong u Dabid. U Dabid u khun u Jesse u ong, bad uta u briew ïa uba la kyntiew sha jrong u ong, uta uba la sleh jong U Blei u Jakob, bad u nongrwai babang jong u Israel:

² “U Mynsiem U Trai u la kren da nga, bad ka ktien jong u ka la long ha u thylliej jong nga.

³ U Blei u Israel u la ong, U Mawsiang u Israel u la kren ha nga: ‘Uta uba synshar ïa ki briew da ka hok, uba synshar ha ka jingsheptieng ïa U Blei,

⁴ uta un long kum ka jingshai mynstep, haba ka sngi ka dang mih, ka step ka bymdon lyoh; mynba u phlang ba dang lung u mih na khyndew, da ka jingtyngshaiñ basngur hadien u slap.’

⁵ “Shisha ka ïing jong nga kam long kumta bad U Blei, pynban, u la pynlong ka jutang kaba junom bad nga, ba la buh pynbeit ha kiei kiei baroh, bad kaba skhem: namar ba ka long ka jingpynim jong nga baroh, bad ka jingkwah jong nga baroh, la um pynman ïa ka.

⁶ Hynrei, ki bymman baroh kin long kum ki dieng shiah ïa ki ban shu bred noh, namar ym lah ban shim ïa ki da ka kti:

⁷ hynrei, uta u briew uba ktah ïa ki u dei ban rah ïa u nar bad u dieng jong u sum; bad yn thang duh ïa ki da ka ding ha la ka jaka.”

Ki rangbah badonbor jong u Dabid

⁸ Kine ki kyrteng jong kita ki rangbah kiba don bor kiba u Dabid u la don: u Josheb-basshebeth jaid Tahkhemon, u rangbah jong ki kaptan; u la long uta u Adino u nong Esni, u la ïaleh ïa phraspah ngut ïa kiba la pynïap ha kajuh ka por.

⁹ Te uba bud ha u, u la long u Eleasar u khun u Dodo u khun u kynja Ahohi, uwei na ki lai ngut ki rangbah badonbor kiba bad u Dabid, mynba ki la beiñ ïa kita ki Philistia kiba la lum lang ïa ka thma, bad ba ki rangbah Israel ki la leit noh:

¹⁰ u la ïeng, bad u la shoh ïa ki Philistia, haduh ba la thait ka kti jong u, bad ka kti jong u ka la dait skhem ha ka waitlam: te U Trai u la pynlong ïa ka jingjop kaba khraw ha kata ka sngi; bad u paidbah u leit phai hadien jong u tang ban shu lute.

¹¹ Te uba bud ha uta u la long u Shammah u khun u Age u kynja Harar. Te ki Philistia ki la lum lang u paidbah paidsan, ha kaba la don ka lyngkha kaba dap da u dai; bad u paidbah u la phet ïap noh na ki Philistia.

¹² Hynrei, u la ïeng hapdeng kata ka lyngkha, bad u la da ïa ka, bad u la pynïap ïa ki Philistia: bad U Trai u la pynlong ïa ka jingjop kaba khraw.

¹³ Bad lai ngut na kita ki laiphew ngut ki rangbah ki la leit hiar, bad ki la wan ha u Dabid ha ka aïom ot sha kata ka krem Adullam; bad u paid jong ki Philistia u la shong dara ha ka them Rephaim.

¹⁴ Te mynkata, u Dabid u la don ha ka kut, bad ka karod ki Philistia ka la don mynkata ha Bethlehem.

¹⁵ Bad u Dabid u la thrang, bad u la ong, “A ban da uno uno un ai um ïa nga ban dih na ka pukri Bethlehem, kaba hajan ka khyrdop?”

¹⁶ Te kita ki lai ngut ki rangbah badonbor ki la tur lyngba ïa u paidïapom ki Philistia, bad ki la tong um na kata ka pukri Bethlehem, kaba hajan ka khyrdop, bad ki la shim ïa ka, bad ki la wallam ha u Dabid: hynrei, um treh ban dih ïa ka, hynrei, u la theh noh ha U Trai.

¹⁷ Bad u la ong, “Ba ngan leh kum ïa kane, nga em, A Trai: kumno ngan dih ïa ka snam jong kine ki rangbah kiba la kheiñduh ïa la ki mynsiem?” Namar kata keiñ, um treh ban dih ïa ka. Ïa kine kiei kiei ki la leh kita lai ngut ki rangbah badonbor.

¹⁸ Bad u Abishai, u para u Joab, u khun ka Seruïah u la long rangbah na kine lai ngut. Te u la rah ïa la u sum pyrshah ïa laispah ngut bad u la pynïap ïa ki, bad u la donnam hapdeng kita lai ngut.

¹⁹ Hato um long uba kham donburom na ki lai ngut? namar kata, la pynlong ïa u, u nongïalam jong ki: hynrei, um shym kot haduh ki lai ngut ki banyngkong.

²⁰ Bad u Benaïah u khun u Jehoïada, u khun jong u rangbah badonbor na Kabsil, uba la leh ïa ki kam ki bakhraw, u la pynïap ïa ki ar ngut ki khun u Ariel na Moab: u la leit hiar ruh bad u la pynïap ïa u sing hapoh ka thliew ha ka por hap ïor.

²¹ Bad u la pynïap ïa u nong Ijipt, u rangbah babhabriew: te uta u nong Ijipt u la don u sum ha la ka kti; hynrei, u la leit hiar sha u da u diengduh, bad u la knieh ïa uta u sum na ka kti uta u nong Ijipt, bad u la pynïap ïa u da u sum jong u hi.

²² Ïa kine kiei kiei u la leh u Benaïah u khun u Jehoïada, bad u la donnam hapdeng kita ki lai ngut ki rangbah.

²³ U la kham donburom ban ïa kita ki laiphew ngut, hynrei, um shym kot haduh kita ki lai ngut ki banyngkong. Bad u Dabid u la buh ïa u halor ki nongap phira jong u.

²⁴ U Asahel u para u Joab u la long uwei na kita ki laiphew ngut; u Elhanan u khun u Dodo na Bethlehem;

²⁵ u Shammah u nong Harod, u Elika u nong Harod;

²⁶ u Heles u nong Palti, u Ira u khun u Ikkesh u nong Tekoa;

²⁷ u Abieser u nong Anathoth, u Mebunai u nong Hushath:

²⁸ u Salmon u kynja Ahohi, u Maharai u nong Netophath;

²⁹ u Heleb u khun u Baanah u nong Netophath, u Ittai u khun u Ribai na Gibeah jong ki khun u Benjamin;

³⁰ u Benaïah u nong Pirathon, u Hiddai na ki wah duid ka Gaash;

³¹ u Abi-albon u nong Arbath, u Asmabeth u nong Barhum;

³² u Eliahba u nong Shaalbon, ki khun u Jashen, u Jonathan;

³³ u Shammah u nong Harar, u Ahiam u khun u Sharar u nong Arar;

³⁴ u Eliphelet u khun u Ahasbai, u khun u kynja Maakath, u Eliam u khun u Ahithophel u nong Gilon;

³⁵ u Hesro u nong Karmel, u Paarai u nong Arbit;

³⁶ u Igal u khun u Nathan na Sobah, u Bani u nong Gad:

³⁷ u Selek u kynja Ammon, u Naharai u nong Beeroth, ki nongrah atiar jong u Joab u khun ka Seruïah;

³⁸ u Ira u nong Ithri, u Gareb u nong Ithri;

³⁹ u Uriah u nong Hit: laiphew hynñiew ngut baroh.