2 SAMUEL 22 - KA BAIBL

Ka jingrwai ainguh u Dabid namar ka jingpyllait im U Blei

¹ Bad u Dabid u la kren ïa ki ktien jong kane ka jingrwai ha U Trai ha kata ka sngi ba U Trai u la pyllait ïa u na ka kti ki nongshun jong u baroh, bad na ka kti u Saul:

² bad u la ong, “U Trai u long u mawsiang jong nga, bad ka kut jong nga, bad u nongpynim jong nga, u jong nga keiñ;

³ U Blei uba u mawsiang jong nga, ha u keiñ ngan shaniah; ka stieh jong nga, bad ka reng ka jingpynim jong nga, ka kut bajrong jong nga, bad ka jaka rieh jong nga; u nongpynim jong nga, me pynim ïa nga na ka jingleh-jubor.

⁴ Ngan khot kyrpad ïa U Trai, uba dei ban ïoh ïaroh; kumta yn pynim ïa nga na ki nongshun jong nga.

⁵ “Naba ki jingat phyllung ka jingïap ki la ker tawiar ïa nga, ki jingshlei ka jingbymman ki la pynsheptieng ïa nga.

⁶ Ki jingkhum ka dujok ki la ker sawdong ïa nga; ki jingriam ka jingïap ki la lap ïa nga.

⁷ “Ha la ka jingjynjar nga la khot kyrpad ha U Trai, nga la kyrpad jam ruh ïa U Blei: bad u la ïohsngew ïa ka jingsawa jong nga na ka templ jong u, bad ka jinglynñiar jong nga ka la poi sha ki shkor jong u.

⁸ “Hangta ka pyrthei ka la khih bad ka la khynñiuh, ïa ki nongrim jong ka bneng la pynkhih bad la pynkhynñiuh, namar ba u la bitar.

⁹ Ka tdem ka la kiew na ki thliew khmut jong u, bad ka ding na ka shyntur jong u ka la bam duh: da ka, ka 'dewïong ka la meh ding.

¹⁰ U la pyndem ïa ki bneng ruh, bad u la wan hiar; bad ka jingdum tliw tliw ka la long hapoh ki sla'jat jong u.

¹¹ U la shong halor u Kherub, bad u la her: shisha, la ïohi ïa u halor ki thapniang ka lyer.

¹² Ïa ka jingdum u la pynlong ki ïingjaiñ baroh sawdong ïa u, ka jingïalang ki um keiñ, ki lyoh barben ka suiñ.

¹³ Na kata ka jingtyngshaiñ ka khmat jong u, ki rnga 'dewïong ki la meh.

¹⁴ U Trai u la riew pyrthat na bneng, bad uta U Bahakhlieh Tam u la pynjam ïa la ka ktien.

¹⁵ Bad u la pynmih ïa ki khnam, bad u la pynsaphred ïa ki; ïa ki leilieh, bad u la pynphet krad ïa ki.

¹⁶ Ki trai jong ka duriaw ki la paw, ïa ki nongrim jong ka pyrthei la pynlyngkhuit, da ka jingsneng ka jong U Trai, da kaba beh ka jingpyrsad ki thliew khmut jong u keiñ.

¹⁷ “U la phah na sha jrong, bad u la shim noh ïa nga; u la pynmih noh ïa nga na ki babun ki um.

¹⁸ U la pynim ïa nga na u nongshun bakhrawbor jong nga, na kita kiba la shun ïa nga; namar ki la kham khlaiñ ïa nga.

¹⁹ Ki la lap ïa nga ha ka sngi ka jingjynjar jong nga: hynrei, U Trai u la long ka jingkyrshan ïa nga.

²⁰ U la ïalam ïa nga sha ka jingkylluid ruh: u la pynim ïa nga, namar ba u la sngewieit ïa nga.

²¹ “U Trai u la ai nong ïa nga katba kum ka jinglehhok jong nga: katba kum ka jingkhuid ki kti jong nga u la siew ïa nga.

²² Naba nga la rakhe ïa ki lynti U Trai, bad ngam shym kiar leh bymman na U Blei jong nga.

²³ Naba ki jingbishar jong u baroh ki la don ha khmat jong nga: bad na ki hukum jong u ngam shym la kiar.

²⁴ Nga la long janai ruh ha khmat jong u, bad nga la sumar ïa lade na ka jingbymman jong nga.

²⁵ Namar kata, U Trai u la ai nong ïa nga katba kum ka jinglehhok jong nga; katba kum ka jingkhuid jong nga ha ka jingikhmat jong u.

²⁶ “Ïa uba isynei men leh isynei, ïa u briew u bajanai men leh janai;

²⁷ ïa u bakhuid men leh khuid; bad ïa uba mutlop men leh mutlop.

²⁸ Bad ïa kita ki briew ki bajynjar men pynim: hynrei, ki khmat jong me ki ha kita kiba sngewmeng, ïa ka ban pynpoh ïa ki.

²⁹ Naba me long ka sharak jong nga, A Trai: bad U Trai un pynshai ïa ka jingdum jong nga.

³⁰ Naba da me nga tur lyngba ïa ka shi kynhun; da U Blei jong nga, nga rynsied halor ka kynroh.

³¹ U Blei uba janai la ka lynti; ïa ka ktien jong U Trai la pynphrang; u long ka stieh ha kita baroh kiba shaniah ha u.

³² “Naba uei uba long U Blei, hynrei, tang U Trai? bad uei uba long u mawsiang, hynrei, tang U Blei jong ngi?

³³ U Blei u long ka kut baskhem jong nga: bad u ïalam ïa uba janai ha ka lynti jong u.

³⁴ U pynlong ïa ki kjat jong nga kum ki jong ki skei: bad u buh ïa nga ha ki jaka kiba jrong jong nga.

³⁵ U hikai ma u ïa ki kti jong nga ban ïaleh thma; ba kumta, ki ksang'ti jong nga ki wiat ïa ka ryntieh rnong.

³⁶ Me la ai ruh ha nga ïa ka stieh ka jingpynim jong me: bad ka jingjemnud jong me ka la pynkhraw ïa nga.

³⁷ Me la pynkylluid ïa ki jingjam jong nga hapoh jong nga, te ki kjat jong nga kim shym la syntuid.

³⁸ Nga la beh nadien ki nongshun jong nga, bad nga la pynjot ïa ki; te ngam shym wan phai noh tad ynda la bam duh noh ïa ki.

³⁹ Nga la bam duh noh ïa ki, bad nga la sum lyngba ïa ki, ba kim lah shuh ban ïeng; ki la kyllon ruh hapoh ki sla'jat jong nga.

⁴⁰ Naba me, me la pynpanpoh ïa nga da ka bor ïa ka thma: ïa kita kiba ïeng ïaleh ïa nga, me la pyndem hapoh jong nga.

⁴¹ Me la pynphai ruh ha nga ïa ki ingdong ki nongshun jong nga, ba kumta nga lah ban ot noh ïa kita kiba shun ïa nga.

⁴² Ki la khmih, hynrei, ym don u ban pynim; ïa U Trai keiñ, hynrei, um shym phai ktien ïa ki.

⁴³ Hangta nga la pynlwet jin ïa ki kum ka 'dewmet ka khyndew, nga la ïuh roit ïa ki kum ka ktieh ka lynti bah, bad nga pynsaphred kylleng ïa ki.

⁴⁴ “Me la pyllait ruh ïa nga na ki jingïania u paidbah jong nga; me la ïai-ri ïa nga ban long ha khlieh ki jaid bynriew: ki briew kiba ngam shym la ithuh ruh, kin shakri ïa nga.

⁴⁵ Kita ki nongwei kin nguh ïa nga: ki tang shu ïohsngew shaphang jong nga, kin kohnguh ïa nga.

⁴⁶ Ki nongwei kin dam noh, bad kin mih da kaba khynñiuh, na kita ki jaka bakhim jong ki.

⁴⁷ “U Trai u im; bad to long ba la kyrkhu ïa u mawsiang jong nga; bad to ai ba yn pynkyntiew ïa U Blei u mawsiang ka jingpynim jong nga:

⁴⁸ uta U Blei keiñ uba pynhiar kput na ka bynta jong nga, bad uba pynhapoh ïa ki jaid bynriew hapoh jong nga,

⁴⁹ bad uba ïalam ïa nga na ki nongshun jong nga: me pynkyntiew ruh ïa nga halor kita kiba ïeng ïaleh ïa nga: me pyllait ïa nga na uta u briew uba leh jubor.

⁵⁰ “Namar kata, ngan ainguh ïa me, A Trai, hapdeng ki jaid bynriew, bad ngan rwai ïaroh ïa ka kyrteng jong me.

⁵¹ Ïa ka jingpynim kaba khraw u ai ha u syiem jong u: bad u leh isynei ïa uta uba la sleh jong u, ïa u Dabid keiñ, bad ïa u symbai jong u junom.”