2 SAMUEL 21 - KA BAIBL

Ka jingwad kylliang ki Gibeon

¹ Te la don ha ki sngi u Dabid ka 'nemsniew lai snem lynter; bad u Dabid u la wad ïa ka khmat U Trai. Bad U Trai u la ong, “Ka long namar u Saul, bad namar ka ïing kaba bit snam jong u, namar ba u la pynïap ïa ki Gibeon.”

² Te u syiem u la khot ïa ki Gibeon, bad u la ong ha ki; (te kita ki Gibeon kim shym long na ki khun Israel, hynrei, na kita kiba sah na ki Amor; bad ki khun Israel ki la smai ha ki: u Saul te u la pyrshang ban pynïap ïa ki ha ka jingshitrhem na ka bynta ki khun Israel bad Judah:)

³ bad u Dabid u la ong ha ki Gibeon, “Ngan leh aïu na ka bynta jong phi? bad da ei ngan pynlong ka kuna, ba phin dup kyrkhu ïa ka jingïoh kynti ka jong U Trai?”

⁴ Ki Gibeon te ki la ong ha u, “Ka kam jong ngi bad u Saul, lane ka ïing jong u, kam long ka jong ka rupa lane ka ksiar; lymne kam dei ïa ngi ban pynïap ïa uno uno u briew ha Israel.” Bad u la ong, “Ïa kaba phin ong, ïa kata ngan leh na ka bynta jong phi.”

⁵ Ki te ki la ong ha u syiem, “Uta u briew uba la bam duh ïa ngi, bad uba ïashet pyrshah ïa ngi, ba yn pynjot ïa ngi ba ngin ym sah ha kino kino ki phang ka ri Israel,

⁶ to aiti hynñiew ngut ki rangbah na ki khun jong u ha ngi, te ngin phasi ïa ki ha U Trai ha Gibeah u Saul, uba la jied jong U Trai.” Bad u syiem u la ong, “Ngan aiti ïa ki.”

⁷ Hynrei, u syiem u la pynim ïa u Mephibosheth, u khun u Jonathan u khun u Saul, namar kata ka jingïakular U Trai kaba la don hapdeng jong ki, hapdeng u Dabid keiñ bad u Jonathan u khun u Saul.

⁸ Hynrei, u syiem u la shim ar ngut ki khun ka Rispah ka khun u Aïah, ïa kiba ka la kha ha u Saul, u Armoni bad u Mephibosheth; bad san ngut ki khun ka Mikhal ka khun u Saul, ïa kiba ka la kha ha u Adriel u khun u Barsillai u kynja Meholath:

⁹ bad u la ai noh ïa ki ha ki kti ki Gibeon, ki ruh ki la phasi ïa ki ha uta u lum ha khmat U Trai, bad ki la ïakyllon lang baroh hynñiew ngut: te la pynïap ïa ki ha ki sngi ka aïom ot, ha ki sngi ki banyngkong ha kaba sdang ka aïom ot u Kew Barli.

¹⁰ Bad ka Rispah ka khun u Aïah ka la shim da ka jaiñ khain, bad ka la siang ïa ka ïa lade ha uta u mawsiang, naduh kaba sdang ka aïom ot haduh ba ka um ka la hiar halor jong ki na bneng; bad kam shym shah lymne ïa ki sim bneng ban sah ha ki mynsngi, lymne ïa ki mrad khlaw mynmiet.

¹¹ Te la ïathuh ha u Dabid ïa kaba ka la leh ka Rispah ka khun u Aïah, ka tnga kliar ka jong u Saul.

¹² Bad u Dabid u la leit shim ïa ki shyieng jong u Saul bad ki shyieng jong u Jonathan u khun jong u na ki rangbah Jabesh-gilead, kiba la lah tuh ïa ki na ka lynti bah ka Beth-shan, ha kaba ki Philistia ki la phasi ïa ki, ha kata ka sngi ba ki Philistia ki la pynïap ïa u Saul ha Gilboa:

¹³ bad u la wallam artet nangta ïa ki shyieng jong u Saul bad ki shyieng jong u Jonathan u khun jong u; bad ki la lum ruh ïa ki shyieng jong kita ïa kiba la phasi.

¹⁴ Bad ki la tep ïa kita ki shyieng jong u Saul bad ki jong u Jonathan u khun jong u ha ka ri Benjamin ha Sela ha u maw jingtep u Kish u kpa jong u: bad ki la pyndep ïa kiei kiei baroh ba u la hukum u syiem. Hadien kata te, U Blei u la sngewbha ïa ka ri.

U Abishai u pyllait im ïa u Dabid

¹⁵ Te ka thma ka la long pat hapdeng ki Philistia bad ki Israel; bad u Dabid u la leit hiar lem bad ki shakri jong u ruh, bad u la ïaleh thma ïa ki Philistia: u Dabid te u la thait ïan.

¹⁶ Bad u Ishbi-benob, uba la long na ki khun u radbah, uba ka jingkhia u sum jong u ka la long laispah shekel ka rnong, bad haba u la panpoh da ka waitlam ka bathymmai, u la mut ban pynïap ïa u Dabid.

¹⁷ Hynrei, u Abishai u khun ka Seruïah u la ïarap ïa u, bad u la shoh ïa u Philistia, bad u la pynïap ïa u. Namar kata, ki rangbah u Dabid ki la smai ha u, ki da ong, “Men ym ïoh mih shabar shuh bad ngi sha ka thma, ïoh ba men pynlip ïa ka sharak jong ki Israel.”

Kaba pynïap ïa ki radbah saw ngut

¹⁸ Hadien kata, ka la long pat ka thma bad ki Philistia ha Gob: hangta, u Sibbekai u kynja Hushath u la pynïap ïa u Saph, uba la long na ki khun u radbah.

¹⁹ Hadien kata, ka la long thma pat bad ki Philistia ha Gob; bad u Elhanan u khun u Jaare-oregim u nong Bethlehem u la pynïap ïa u Goliath u nong Gitt, uba u dieng sum jong u, u la long kat u khung jong u nongthain jaiñ.

²⁰ Te la don thma pat ha Gath, ha kaba la don u briew uba heh met, uba la don hynriew tylli ki shynriah'ti ha kawei kawei ka kti, bad hynriew tylli ki shynriah'jat ha kawei kawei ka kjat, arphew saw tylli ha ka jingkheiñ; bad une ruh u la long u khun jong uta u radbah.

²¹ Te haba u la beiñ ïa ki Israel, u Jonathan u khun u Shimei uba u para u Dabid u la pynïap ïa u.

²² Ïa kine saw ngut la kha ha uta u radbah ha Gath; bad ki la kyllon da ka kti u Dabid, bad da ka kti ki shakri jong u.