2 SAMUEL 20 - KA BAIBL

Ka jingïaleh pyrshah u Sheba

¹ Te la jia ba la don hangta u briew u Belial uba kyrteng “u Sheba”, u khun u Bikhri, u kynja Benjamin: une te u la put ïa ka ronsing, bad u la ong, “Ngi ngim don ka bynta ha u Dabid, lymne ngim don ka bynta ba hap ha u khun u Jesse: to uwei uwei baroh sha la ki ïingjaiñ, ko Israel.”

² Kumta, ki rangbah Israel baroh ki la leit kiew noh na kaba bud ïa u Dabid, bad ki la bud ïa u Sheba u khun u Bikhri: hynrei, ki rangbah Judah ki la snoh ha la u syiem, naduh ka Jordan jin haduh Jerusalem.

³ Bad u Dabid u la wan sha la ïing ha Jerusalem; te u syiem u la shim ïa kita ki shiphew ngut ki kynthei, ki tnga kliar jong u, kiba u la lah pynsah ban sumar ïa ka ïing, bad u la buh ïa ki hapoh ka jingsumar, bad u la bsa ïa ki, hynrei, um shym bsut shuh sha ki. Kumta, la set khop ïa ki haduh ka sngi ka jingïap jong ki, ki da shong ha ka jinglong riewkynthei.

⁴ Ynda kumta, u syiem u la ong ha u Amasa, “To khot lang sha nga ïa ki rangbah Judah hamar ka sngi ka balai, to don ma me ruh hangne.”

⁵ Kumta u Amasa u la leit khot lang ïa ki Judah: hynrei, u la tud kham slem ïa kata ka por ba u la buh ha u.

⁶ Te u Dabid u la ong ha u Abishai, “Une u Sheba u khun u Bikhri un kham pynsniew ïa ngi ban ïa kaba u la leh u Absalom: to shim ma me ïa ki shakri u kynrad jong me, bad to beh nadien jong u, ïoh ba un ïoh ïa ki shnong ba la ker kynroh, bad un lait noh na ngi.”

⁷ Te ki la leit mih hadien jong u ki rangbah u Joab, bad ki Khereth bad ki Peleth, bad ki rangbah badonbor baroh: bad ki la leit mih noh na Jerusalem, ïa ka ban beh nadien u Sheba u khun u Bikhri.

⁸ Haba ki la don ha u mawbah uba ha Gibeon, u Amasa u la wan tan ïa ki. Te u Joab u la panpoh da kata ka jaiñkup hiar thma jong u ïa kaba u la phong, bad ha kata la don ka jingpanpoh kaba bad ka waitlam ha ka jingsop jong ka, ba la teh ha ka syngkai jong u; te katba u ïaid kata ka hap noh.

⁹ Bad u Joab u la ong ha u Amasa, “Kumno, me bha, ko para?” Bad u Joab u la bat ïa u Amasa da ka kti kamon na u 'ñiuh tmoh ïa ka ban doh ïa u.

¹⁰ Hynrei, u Amasa um shym khmih ïa kata ka waitlam ha ka kti u Joab: kumta u la dung ïa u da ka na ka kpoh, bad u la pynmih noh ïa ki snier jong u ha ka khyndew, bad um shym shoh pat ïa u; bad u la ïap. Te u Joab bad u Abishai u para jong u ki la beh nadien u Sheba u khun u Bikhri.

¹¹ Bad uwei na ki shakri u Joab u ïeng hajan jong u, bad u la ong, “Kat uba imon ïa u Joab, bad kat uba ha ka liang u Dabid, to un bud ïa u Joab.”

¹² Bad u Amasa u la ksaid ha la ka snam hapdeng ka lynti bah. Te haba uta u briew u la ïohi ba u paidbah baroh u shu ïeng, u la rah noh ïa u Amasa na ka lynti bah sha lyngkha, bad u la tap jaiñ halor jong u, haba u la ïohi ba uwei uwei baroh uba wan hajan jong u, u shu ïeng.

¹³ Haba la pynkynriah noh ïa u na kata ka lynti bah, ki rangbah baroh ki la leit bud ïa u Joab, ïa ka ban beh nadien u Sheba u khun u Bikhri.

¹⁴ Te u la leit lyngba ïa ki jaid Israel baroh haduh Abel, bad haduh Beth-maakhah, bad ki Berit baroh: bad ki la lum lang, bad ki la bud ïa u.

¹⁵ Kumta, ki la wan bad ki la ker kut ïa u ha Abel-beth-maakah, bad ki la kynton ïa ka kynroh lyngstong pyrshah ïa kata ka shnong, bad ka la ïeng marpyrshah ïa ka kynroh ker: te kita ki briew baroh kiba la don bad u Joab ki la krang ïa ka kynroh, ïa ka ban pynkyllon ïa ka.

¹⁶ Hangta kawei ka kynthei ka bastad kaba na kata ka shnong ka la pyrta, “Ha sngap, ha sngap; nga kyrpad ïa phi, to ong ha u Joab, ‘Ale shane hajan, ba ngan ïoh ïakren bad me.’ ”

¹⁷ Te u la wan hajan sha ka; bad kata ka kynthei ka la kylli, “Long ma me u Joab?” U te u la ong, “Nga long.” Hangta ka la ong ha u, “To sngap ïa ki ktien ka shakri jong me.” U ruh u la ïathuh, “Nga ïohsngew.”

¹⁸ Te ka la kren, ka da ong, “Ki la ju kren mynhyndai, ki ïa-ong, ‘Shisha kin ïawad buit ha Abel’: te kumta ki la keiñ noh.

¹⁹ Nga, nga long na kita kiba ïasuk bad kiba ïaineh ha Israel: me pyrshang ban pynjot noh ïa ka nongbah bad ïa ka kmie ha Israel: men pynduh balei ïa ka bynta ka jong U Trai?”

²⁰ Te u Joab u la ïathuh bad u la ong, “Kam kumta, kam kumta, em, ba ngan pynjot lane pynduh.

²¹ Ka kam, kam long kumta: hynrei, u briew uba na ka ri lum Ephraim, u Sheba u khun u Bikhri da ka kyrteng, u la rah la ka kti pyrshah ïa u syiem, pyrshah ïa u Dabid keiñ: to aiti noh tang ïa uta, te ngan leit noh na kane ka nongbah.” Te kata ka kynthei ka la ong ha u Joab, “Ha khmih, ïa ka khlieh jong u yn bred noh ha me nalor ka kynroh.”

²² Te kata ka kynthei ka la leit da la ka jingstad ha ki rangbah baroh. Bad ki la khrai khlieh ïa u Sheba u khun u Bikhri, bad ki la bred noh shabar ha u Joab. U te u la put ïa ka ronsing, bad ki la saphred na kata ka nongbah, uwei uwei baroh sha la ka ïingjaiñ. Bad u Joab u la leit wan noh sha Jerusalem ha u syiem.

Ki rangbah u Dabid

²³ Te u Joab u la long halor ki paidïapom ki Israel baroh: bad u Benaïah u khun u Jehoïada u la long halor ki Khereth bad halor ki Peleth:

²⁴ bad u Adoram u la long halor ka khajna: bad u Jehoshaphat u khun u Ahilud u nongthoh rekord:

²⁵ bad u Sheba u la long u nongthoh; bad u Sadok bad u Abiathar ki long lyngdoh:

²⁶ bad u Ira ruh u kynja Jair u la long u lyngdoh ha u Dabid.