2 SAMUEL 2 - KA BAIBL

La thung syiem ïa u Dabid halor ki Judah

¹ Hadien kane te, u Dabid u la kylli na U Trai, u da ong, “Ngan leit kiew ne em sha kano kano na ki nongbah Judah?” Bad U Trai u la ïathuh ha u, “To leit kiew.” Te u Dabid u la kylli, “Shano ngan leit kiew?” U te U la ïathuh, “Sha Hebron.”

² Kumta, u Dabid u la leit kiew shatei, lem bad ki ar ngut ki tnga jong u ruh, ka Ahinoam ka nong Jesril, bad ka Abigail ka nong Karmel, ka tnga u Nabal.

³ Bad u Dabid u la ïalam artet ïa la ki rangbah ruh kiba don lem bad u, uwei uwei ruh bad la kiba ha ïing; te ki la shong ha ki shnong Hebron.

⁴ Bad ki Judah ki la ïawan, bad ki la pynsleh hangta ïa u Dabid ban long syiem halor ka ïing Judah. Te ki la ïathuh ha u Dabid, ki ïa-ong, “Dei ki Jabesh-gilead kiba la tep ïa u Saul.”

⁵ Te u Dabid u la phah ki nongkit-ktien sha ki Jabesh-gilead, bad u la ong ha ki, “To long phi ïa kiba la kyrkhu na U Trai, kiba la leh ïa kane ka jingleh isynei ha u kynrad jong phi, u Saul keiñ, bad ba phi la tep ïa u.

⁶ To U Trai te un leh isynei bad ka jingshisha ruh ïa phi: bad ma nga ruh ngan ai nong ïa phi namar kane ka jinglehbha, namar ba phi la leh ïa kane ka jingleh.

⁷ Namar kata te, to pynkhlaiñ ïa la ki kti, bad to long shlur phi: namar u kynrad jong phi u Saul u la ïap noh, ka ïing Judah ruh ki la pynsleh ïa nga ban long syiem halor jong ki.”

U Dabid u ïaleh bad ka ïing u Saul

⁸ Hynrei, u Abner u khun u Ner, u kaptan u paidïapom u Saul, u la lah shim ïa u Ishbosheth u khun u Saul, bad u la ïalam ïa u sha shiliang sha Mahanaim;

⁹ bad u la pynlong syiem ïa u halor ka Gilead, bad halor ki Ashur, bad halor ka Jesril, bad halor ki Ephraim, bad halor ki Benjamin, bad halor ki Israel baroh.

¹⁰ (U Ishbosheth u khun u Saul u la sawphew snem ka rta haba u la sdang ban synshar halor ki Israel, bad u la synshar ar snem.) Te ka ïing Judah ki la bud ïa u Dabid.

¹¹ Te ka por ba u Dabid u la long syiem ha Hebron halor ka ïing Judah ka la long hynñiew snem bad hynriew bnai.

¹² Te u Abner u khun u Ner, bad ki shakri u Ishbosheth u khun u Saul, ki la ïamih noh na Mahanaim sha Gibeon.

¹³ Bad u Joab u khun ka Seruïah, bad ki shakri u Dabid, ki la ïamih noh, bad ki la ïashem ïa ki hajan ka pung Gibeon; bad ki la ïashong, kine sha kane ka liang ka pung, bad kita sha kawei pat ka liang ka pung.

¹⁴ Te u Abner u la ong ha u Joab, “To kine ki samla kin ïaïeng mynta, bad kin ïalehkai ha khmat jong ngi.” Bad u Joab u la ong, “To kin ïaïeng.”

¹⁵ Te kumta ki la ïaïeng bad ki la leit shiliang ha la ka jingkheiñ; khat-ar ngut na ka bynta ki Benjamin, kata, na ka bynta u Ishbosheth u khun u Saul, bad khat-ar ngut ki shakri u Dabid.

¹⁶ Bad uwei uwei baroh u la kem ïa la u briew na ka khlieh, bad u la dung ïa la ka waitlam na krung u briew jong u; kumta, ki la ïakyllon ryngkat: namar kata, la khot ïa kata ka jaka “Helkath-hassurim”, kaba ha Gibeon.

¹⁷ Te ka thma ka la jur eh ha kata ka sngi; bad la jop ïa u Abner, bad ïa u paidïapom ki Israel, ha khmat ki shakri u Dabid.

¹⁸ Bad ki khun ka Seruïah lai ngut ki la don hangta, u Joab, bad u Abishai, bad u Asahel: te u Asahel u la long uba stet ki kjat jong u kat ka skei kaba ha khlaw.

¹⁹ Te u Asahel u la beh nadien u Abner; bad ha kaba leit um shym phai sha kamon lymne sha kadiang na kaba beh ïa u Abner.

²⁰ Te u Abner u la kyrtiang dien, bad u la kylli, “Ma me u Asahel?” U ruh u la ïathuh, “Ma nga keiñ.”

²¹ Te u Abner u la ong ha u, “To phai sha kamon lane sha kadiang, bad to kem ha me ïa uwei na kita ki samla, bad shim ïa ki atiar ïapom jong u.” Hynrei, u Asahel um treh ban phai noh na kaba beh ïa u.

²² Bad u Abner u la ong pat ha u Asahel, “To phai noh na kaba beh nadien jong nga: ngan shoh pynkyllon ïa me balei? naba kumno ngan da khmied la ka khmat ha u Joab u hynmen jong me hadien?”

²³ La kumta ruh um treh ban phai noh: namar kata, u Abner u la sum ïa u da ka tdong u sum na ka kpoh, bad uta u sum u la mih noh na shadien jong u; te u la kyllon hangta, bad u la ïap ha kata hi ka jaka: bad baroh kat kiba wan poi ha kata ka jaka ha kaba u Asahel u la kyllon bad ba u la ïap ki la ïasangeh.

²⁴ Hynrei, u Joab bad u Abishai ki la ïabeh nadien u Abner; te hamar ba la sep ka sngi ki la poi sha u lum Ammah, uba ha marpyrshah ka Giah ha ka lynti ka ri khlaw Gibeon.

²⁵ Te ki khun u Benjamin ki la ïalum lang hadien u Abner, bad ki la ïawan long uwei u paidbah, bad ki la ïeng halor uwei u lum.

²⁶ Ynda kumta, u Abner u la pyrta ha u Joab, bad u la ong, “Ka waitlam kan pynjot noh junom? balei mem tip ba ha ka bakut kan long ka jingkthang? haba kumta te, men slem pat sa katno, ïa ka ban hukum ïa u paidbah ba kin phai noh na kaba beh ïa la ki para?”

²⁷ Te u Joab u la ong, “Katba im U Blei, lada mem shym la kren ma me, shisha la mynhynne mynstep u paidbah u la lah leit wan noh na kaba beh uwei uwei ïa la u para.”

²⁸ Kumta, u Joab u la put ïa ka ronsing, bad u paidbah baroh u la sangeh noh, bad kim shym la beh shuh ïa ki Israel, bad kim shym la ïaleh thma shuh.

²⁹ Te u Abner bad ki rangbah jong u ki la ïaid baroh shi miet halor ka madan: bad ki la leit sha shiliang ka Jordan, bad ki la leit lyngba ïa ka Bithron baroh, bad ki la wan poi ha Mahanaim.

³⁰ Bad u Joab u la leit wan noh na kaba beh ïa u Abner: te haba u la lum lang ïa u paidbah baroh, ki la duna na ki shakri u Dabid khatkhyndai ngut ki rangbah bad u Asahel ruh.

³¹ Hynrei, ki shakri u Dabid ki la shoh pynïap na ki Benjamin, bad na ki rangbah u Abner, laispah hynriewphew ngut ki briew.

³² Te ki la shim ïa u Asahel, bad ki la tep ïa u ha ka jingtep u kpa jong u, kaba ha Bethlehem. Bad u Joab bad u paidbah jong u ki la ïaid baroh shi miet, bad ki la poi sha Hebron hamar kaba mih ka sngi.