2 SAMUEL 19 - KA BAIBL

¹ Te la ïathuh ha u Joab, “Ha khmih u syiem u ïam bad u ïambriew ïa u Absalom.”

² Bad kata ka jingjop ka la kylla jingïam ha kata ka sngi ha u paidbah baroh: naba u paidbah ha kata ka sngi u la ïohsngew ba ong, “U syiem u la sngewsih namar la u khun.”

³ Bad uta u paidbah ha kata ka sngi u la shu ïaid rieh shapoh shnong, kumjuh kumba ïaid rieh u paidbah haba lehrain ba ki la phet ïap ha ka thma.

⁴ Hynrei, u syiem u la tap ïa la ka khmat, bad u syiem u la pyrta da ka ktien kaba jam, “Ko khun jong nga Absalom, ko Absalom, ko khun jong nga, ko khun jong nga!”

⁵ Bad u Joab u la wan bsut shapoh ïing ha u syiem, bad u la ong, “Ha kane ka sngi me la pynlehrain ïa ki khmat ki shakri jong me baroh, kiba ha kane ka sngi ki la pynim ïa ka jingim jong me, bad ïa ka jingim ki khun shynrang bad ka jong ki khun kynthei jong me, bad ïa ka jingim ki tnga jong me, bad ïa ka jingim ki tnga kliar jong me;

⁶ ha kaba me ieit ïa la ki nongshun, bad ba me shun ïa la ki lok. Naba me la pyni ha kane ka sngi, ba mem ñiew ei ei ïa ki nongïalam lymne ïa ki shakri: naba nga, nga sngewthuh mynta, ba lada u la im u Absalom, bad ba ngi, ngi la ïap baroh ha kane ka sngi, me la sngewbha eh pynban.

⁷ Namar kata te, to ïeng, bad to mih shabar, bad to kren sngewbha ha la ki shakri: naba nga smai ha U Trai, ba lada men ym mih shabar, uwei ruh un ym sah bad me ha kane ka miet: bad kata kan kham sniew ïa me ban ïa ka jingsniew baroh kaba la jia ïa me naduh ba me dang samla haduh mynta.”

⁸ Ynda kumta, u syiem u la ïeng, bad u la shong ha kata ka khyrdop. Te la pynbna ha u paidbah baroh, da kaba ong, “Ha khmih, u syiem u shong ha ka khyrdop”: bad u paidbah baroh u la wan ha khmat u syiem. Te ki Israel ki la phet uwei uwei baroh sha la ka ïingjaiñ.

U Dabid u wan phai sha Jerusalem

⁹ Bad ki paidbah baroh ki la ïa-pyneh bad ki jaid Israel baroh, ki ïa-ong, “U syiem u la pyllait ïa ngi na ka kti ki nongshun jong ngi, bad u la pynim ïa ngi na ka kti ki Philistia; mynta te, u la phet na ka ri na u Absalom.

¹⁰ Bad une u Absalom, ïa uba ngi la pynsleh ban long halor jong ngi, u la ïap ha ka thma. Namar kata te, balei phim ïakren shaphang ka ban wallam pat ïa u syiem?”

¹¹ Bad u syiem Dabid u la phah ha ki lyngdoh u Sadok bad u Abiathar, u da ong, “To kren ha ki tymmen basan ki Judah, da kaba ong, ‘Kumno phi, phi ïalong khatduh ban wallam pat ïa u syiem sha la ïing, haba ka jingkren ki Israel baroh ka la poi sha u syiem, ban wallam pat ïa u syiem sha la ïing?

¹² Phi long ki para jong nga, phi ka shyieng jong nga bad ka doh jong nga: namar kata te, kumno phi long ki bakhatduh ïa ka ban wallam pat ïa u syiem?’

¹³ To ong ha u Amasa ruh, ‘Me mem long ka shyieng jong nga bad ka doh jong nga? U Blei un leh kumne ïa nga, bad un pyntam ruh, lada me men ym long kaptan u paidïapom ha khmat jong nga ha la ka sngi ha ka jaka u Joab.’ ”

¹⁴ Bad u la pyndem ïa ka dohnud ki rangbah Judah baroh, kumjuh kum ïa ka jong uwei u briew; kumta, ki la phah ktien sha u syiem, ki da ong, “To wan phai ma me bad ki shakri jong me baroh.”

¹⁵ Kumta, u syiem u la leit phai noh, bad u la wan sha Jordan. Bad ki Judah ki la wan sha Gilgal ïa ka ban leit tan ïa u syiem, ïa ka ban wallam ïa u syiem halor ka Jordan.

¹⁶ Bad u Shimei u khun u Gera, u nong Benjamin, uba na Bahurim, u la pynkloi bad u la wan hiar lem bad ki rangbah Judah ïa ka ban tan ïa u syiem Dabid.

¹⁷ Bad ki la don lem bad u shi hajar ki rangbah Benjamin, bad u Siba ruh uta u shakri ka ïing u Saul, bad la ki khun shynrang khatsan ngut bad la ki shakri arphew ngut lem bad u; bad ki la leit sha shiliang ka Jordan ha khmat u syiem.

¹⁸ Bad la pynleit ïa ka lieng khawa sha shiliang ïa ka ban wallam ïa ki ba-ha-ïing u syiem, bad ïa ka ban leh ei ei katba u ibit ma u. Bad u Shimei u khun u Gera u la hap dem ha khmat u syiem, haba u la dang ryngkang ïa ka Jordan.

¹⁹ Bad u la ong ha u syiem, “To u kynrad jong nga wat ai ba un pynkit pop halor jong nga, lymne wat kynmaw ïa kata kaba u shakri jong me u la leh bymman ha kata ka sngi ba u syiem kynrad jong nga u la leit noh na Jerusalem, ba u syiem un buhnud ïa kata.

²⁰ Naba nga u shakri jong me nga tip ba nga la leh pop: namar kata, ha khmih, ha kane ka sngi nga la wan nyngkong eh na ka ïing u Joseph baroh ïa ka ban hiar ban wan tan ïa u syiem kynrad jong nga.”

²¹ Hynrei, u Abishai u khun ka Seruïah u la ïathuh bad u la ong, “Namar kane pleng yn ym pynïap ïa u Shimei, haba u la tim ïa uba la sleh jong U Trai?”

²² Te u Dabid u la ïathuh, “Nga donkam aïu bad phi, phi ki khun ka Seruïah, ba phin long ki nongïaleh pyrshah ïa nga ha kane ka sngi? hato yn pynïap ïa uno uno ha Israel ha kane ka sngi? namar nga tip ne em ba ha kane ka sngi nga long u syiem halor ki Israel?”

²³ Bad u syiem u la ong ha u Shimei, “Men ym ïap.” Bad u syiem u la smai ha u.

²⁴ Bad u Mephibosheth u khun u Saul ruh u la wan hiar ban tan ïa u syiem; te um shym la sum ïa la ki kjat, lymne shna ïa la ki tmain, lymne sait ïa la ki jaiñ, naduh kata ka sngi ba u la leit noh u syiem haduh ka sngi ba u la wan sha la ïing ha kaba suk.

²⁵ Te haba u la wan sha Jerusalem ban ïashem bad u syiem, u syiem u la ong ïa u, “Ko Mephibosheth, me balei mem shym la leit lem bad nga?”

²⁶ U te u la ïathuh, “Ko syiem kynrad, u shakri jong nga u la shukor ïa nga: naba u shakri jong me u la ong, ‘Ngan sa teh jin ïa ka kadda, ba ngan shong halor jong ka, ba ngan dup leit bad u syiem,’ naba u shakri jong me u ba-dkoh.

²⁷ Bad u la kren siar sniew ïa la u shakri ha u syiem kynrad jong nga; hynrei, u syiem kynrad jong nga u long kum u angel U Blei: namar kata, to leh ïa kaba ibit ha khmat jong me.

²⁸ Naba ka ïing u kpa jong nga baroh ki la long tang ki riewïap ha khmat u syiem kynrad jong nga: pynban, me la buh ïa la u shakri hapdeng kita kiba bam ha ka miej jong me hi. Namar kata, nga dang don ka hok aïu ba ngan nang lynñiar shuh ha u syiem?”

²⁹ Bad u syiem u la ong ha u, “Ïa ka ban lei me shu dang kren ïa la ki kam? Nga ong, ‘Ma me bad u Siba phin ïabynta ïa kata ka khyndew.’ ”

³⁰ Te u Mephibosheth u la ong ha u syiem, “Ho-oid keiñ, to un shim ma u ïa kiei kiei baroh, haba u syiem kynrad jong nga u la wan pat sha la ïing ha kaba suk.”

³¹ Bad u Barsillai u nong Gilead u la wan hiar na Rogelim; bad u la leit sha shiliang ka Jordan ryngkat bad u syiem, ïa ka ban leit on ïa u sha shiliang ka Jordan.

³² Te u Barsillai u la tymmen eh, jin phraphew snem ka rta: bad u la long ma u uba la ai jingbam ïa u syiem mynba u la don ha Mahanaim; naba u la long u rangbah u bakhraw.

³³ Bad u syiem u la ong ha u Barsillai, “Ale sha shiliang bad nga, bad ngan bsa ïa me bad nga ha Jerusalem.”

³⁴ Te u Barsillai u la ïathuh ha u syiem, “Nga dang sah sa katno snem pat ïa ka ban im, ba ngan leit kiew bad u syiem sha Jerusalem?

³⁵ Ha kane ka sngi nga la phraphew snem ka rta: hato nga lah ban pynpher ïa ka babha bad ka basniew? Hato u shakri jong me u lah ban mad ïa kaba nga bam lane ïa kaba nga dih? Nga dang lah shuh mo ban ïohsngew ïa ka jingsawa ki nongrwai shynrang bad kynthei? Namar kata, u shakri jong me un lei un long pat ka jingkit ha u syiem kynrad jong nga?

³⁶ U shakri jong me un shu leit bad u syiem khyndiat ha lyndet ka Jordan: te balei u syiem un siew pat ïa nga da ka jingai sngewbha kaba katne katne?

³⁷ Nga kyrpad ïa me, to shah ïa la u shakri ba un phai pat, ba ngan ïoh ïap ha la ka jong ka shnong, bad ba yn tep ïa nga hajan ka jingtep u kpa bad ka kmie jong nga. Hynrei, ha khmih, u Shimham, u shakri jong me; u te un leit sha shiliang bad u syiem kynrad jong nga; bad to leh ha u katba me ibit.”

³⁸ Te u syiem u la ong, “U Shimham te un leit sha shiliang bad nga, bad ngan leh ha u ïa kaba me ibit: bad ïa kano kano kaba men buh halor jong nga, ïa kata ngan leh na ka bynta jong me.”

³⁹ Bad u paidbah baroh u la leit sha shiliang ka Jordan, u syiem ruh u la leit sha shiliang: bad u syiem u la doh ïa U Barsillai, bad u la kyrkhu ïa u; te u la leit wan noh sha la ka jong ka jaka.

⁴⁰ Kumta, u syiem u la leit shiliang sha Gilgal, bad u Shimham u la leit shiliang lem bad u: bad u paidbah Judah baroh ki la wallam sha shiliang ïa u syiem, bad shiteng u paidbah Israel ruh.

⁴¹ Te ha khmih, ki rangbah Israel baroh ki la wan sha u syiem, bad ki la ong ha u syiem, “Balei ba ki para jong ngi ki rangbah Judah ki la tuh ïa me, bad ki la wallam sha shiliang ka Jordan ïa u syiem, bad ïa ki ba-ha-ïing jong u, bad ïa ki rangbah u Dabid baroh lem bad u?”

⁴² Te ki rangbah Judah baroh ki la ïathuh ha ki rangbah Israel, “Namar ba u syiem u ïadei kur jan ïa ngi; na ka balei te phi ïabitar namar kane ka kam? hato ngi la ïabam ei ei na ka jinglut u syiem? lane u la ai ka jingai ei ei ha ngi?”

⁴³ Bad ki rangbah Israel ki la ïathuh ha ki rangbah Judah, bad ki la ong, “Ngi, ngi don shiphew bynta ha u syiem, bad ngi don kham bun ruh ha u Dabid ban ïa phi: balei phi la ibeiñ te ïa ngi, ba ym shym la ïoh shuwa ïa ka jingpyrkhat jong ngi ha kaba wallam noh pat ïa u syiem jong ngi?” Te ki ktien ki rangbah Judah ki la kham eh ban ïa ki ktien ki rangbah Israel.