2 SAMUEL 18 - KA BAIBL

Ka jingïap u Absalom

¹ Bad u Dabid u la ñiew ïa u paidbah uba la don bad u, bad u la buh ki rangbah shihajar bad ki rangbah shispah halor jong ki.

² Bad u Dabid u la phah lai bynta ïa u paidbah, shi bynta hapoh ka kti u Joab, bad shi bynta hapoh ka kti u Abishai u khun ka Seruïah, u para u Joab, bad shi bynta hapoh ka kti u Ittai u nong Gitt. Bad u syiem u la ong ïa u paidbah, “Shisha nga ruh ngan mih lem bad phi.”

³ Hynrei, u paidbah u la ïathuh, “Me men ym mih: namar lada ngin phet ïap, kin ym suidñiew ïa ngi; bad lada ngin ïap ma ngi marshiteng, kin ym suidñiew ïa ngi: hynrei, me, me long kum shiphew hajar na ngi: namar kata te, ka kham bha ïa me ban long ka jingïarap ïa ngi na kane ka shnong.”

⁴ Bad u syiem u la ong ha ki, “Ngan leh ïa kaba phi kham ibit ma phi.” Bad u syiem u la ïeng hajan ka khyrdop, bad u paidbah baroh u la leit mih noh shispah shispah bad shi hajar shi hajar.

⁵ Bad u syiem u la hukum ïa u Joab bad ïa u Abishai bad ïa u Ittai, da kaba ong, “To leh jem na ka bynta jong nga ïa uta u khynnah, ïa u Absalom.” Bad u paidbah baroh u la ïohsngew haba u syiem u la ai hukum ïa ki kaptan baroh shaphang u Absalom.

⁶ Kumta, u paidbah u la leit mih noh sha madan ban ïaleh ïa ki Israel: te kata ka thma ka la long ha ka khlaw Ephraim.

⁷ Bad hangta la pynïap ïa u paidbah Israel ha khmat ki shakri u Dabid, bad ka jingpynïap kaba khraw ka la don hangta ha kata ka sngi jin arphew hajar ngut.

⁸ Naba ka thma ka la saphred hangta halor ka khmat kata ka ri baroh: bad ka khlaw hi ka la bam duh kham bun ki briew ha kata ka sngi ban ïa kaba ka la bam duh ka waitlam.

⁹ Bad u Absalom, da kaba jia ryngkhat, u la ïashem bad ki shakri u Dabid. Bad u Absalom u la shong halor u khashor, te uta u khashor u la leit hapoh ki tnat kiba khah jong uwei u dieng Sning uba heh, bad u la sahkut ka khlieh ha uta u dieng Sning, kumta u la sdien hapdeng ka bneng bad ka khyndew; bad uta u khashor uba hapoh jong u, u la phet noh.

¹⁰ Te uwei u briew u la ïohi ïa kata, bad u la ïathuh ha u Joab, bad u la ong, “Ha khmih nga la ïohi ïa u Absalom ba la sdien ha u dieng Sning.”

¹¹ Bad u Joab u la ong ha uta u briew uba la ïathuh ha u, “Ha khmih, me la ïohi, te balei ba mem shym shoh ïa u hangta haduh ka khyndew? te ngan da la ai ïa me ka rupa shiphew shekel, bad ka jingpanpoh kawei.”

¹² Te uta u briew u la ïathuh ha u Joab, “Lada nga ïoh ha la ka kti shi hajar shekel, ngan ym treh ban rah ïa la ka kti pyrshah ïa u khun u syiem: naba ha kaba ngi ïohsngew ma ngi u syiem u la hukum ïa me bad ïa u Abishai bad ïa u Ittai, u da ong, ‘To sumar mano mano ba un ym ktah ïa u khynnah u Absalom.’

¹³ Lymda kumta, lada nga la leh mutlop pyrshah ïa ka jingim jong u, (bad ym don ei ei ba la buhrieh na u syiem,) bad ma me hi keiñ men da la iehnoh noh ïa nga.”

¹⁴ Hangta u Joab u la ong, “Nga ngam lah ïeng shuh kumne bad me.” Te u la shim lai tylli ki sum ha la ka kti, bad u sum ïa ki lyngba ïa ka dohnud u Absalom, haba u dang im hapdeng uta u dieng Sning.

¹⁵ Bad kita ki samla shiphew ngut kiba rah ïa ki atiar u Joab ki la ker sawdong bad ki la shoh ïa u Absalom, bad ki la pynïap ïa u.

¹⁶ Bad u Joab u la put ïa ka ronsing, bad u paidbah u la wan phai noh na kaba beh nadien ki Israel: naba u Joab u la khang ïa u paidbah.

¹⁷ Te ki la shim ïa u Absalom bad ki la bred ïa u sha ka thliew kaba khraw ha kata ka khlaw, bad halor jong u ki la buh maw shikynton kaba khraw eh: ki Israel baroh te ki la phet ïap uwei uwei sha la ka ïingjaiñ.

¹⁸ Te u Absalom mynba u dang im u la shim bad u la pynïeng uta u mawbynna ïa lade uba ha ka them u syiem: naba u la ong, “Ngam don khun shynrang u ban pynlong jingkynmaw ïa ka kyrteng jong nga”: bad u la kyrteng ïa uta u mawbynna ha la ka jong ka kyrteng. Te haduh kane ka sngi, ki khot ïa uta, “u Maw u Absalom”.

¹⁹ Ynda kumta, u Ahimaas u khun u Sadok u la ong, “To shah ïa nga mynta ban phet ban lam ktien ha u syiem, ba U Trai u la pynhiar kput na ka bynta jong u halor ki nongshun jong u.”

²⁰ U Joab te u la ong ha u, “Me men ym long u nonglam-ktien ha kane ka sngi, hynrei, men lam ktien ha kawei pat ka sngi: hynrei, ha kane ka sngi men ym lam ktien, namar ba u la ïap u khun u syiem.”

²¹ Hangta u Joab u la ong ïa u Kushi, “To khie leit ïathuh ha u syiem ïa kiei kiei kiba me la ïohi.” Bad u Kushi u la dem ngon ïa u Joab, bad u la phet.

²² Ynda kumta, u Ahimaas u khun u Sadok u la ong pat sa shi sien ha u Joab, “La kumno kumno ruh, nga kyrpad ïa me, to shah ïa nga ruh ban phet hadien u Kushi.” U Joab te u la ïathuh, “Ïa ka ban lei men phet ma me, ko khun, haba mem ïohnong na kane ka jingbna?”

²³ “Hynrei la kumno kumno,” u la ong, “to ngan phet”: u ruh u la ong ha u, “To phet.” Kumta, u Ahimaas u la phet na ka lynti ka madan, bad u la palat ïa u Kushi.

²⁴ Bad u Dabid u la shong hapdeng kita ki ar tylli ki khyrdop: te u nongap u la leit kiew halor jrong kata ka khyrdop halor ka kynroh, bad u la khmied la ki khmat, bad u la khmih, bad ha khmih, u briew uba phet weibriew.

²⁵ Bad uta u nongap u la pyrta, bad u la ïathuh ha u syiem. Te u syiem u la ong, “Lada u long marwei, u don ka ktien ha la ka shyntur.” Bad uta u la wan bran bran, bad u la poi hajan.

²⁶ Bad uta u nongap u la ïohi ba u phet sa uwei pat u briew: bad uta u nongap u la pyrta ha u nongap jingkhang, bad u la ong, “Ha khmih, sa uwei pat u briew uba phet weibriew.” U syiem te u la ong, “Uta ruh u lam ktien.”

²⁷ Bad uta u nongap u la ong, “Nga imat ka jingphet jong une uba shuwa kum ka jingphet u Ahimaas u khun u Sadok.” Te u syiem u la ong, “Uta u briew u babha, bad u wanlam da ka ktien ka babha.”

²⁸ Te u Ahimaas u la pyrta bad u la ong ha u syiem, “Khublei.” Bad u la dem ngon la ka khmat haduh khyndew ha khmat u syiem, bad u la ong, “Long ba la kyrkhu U Trai U Blei jong me, uba la aiti noh ïa kita ki briew kiba la rah ïa la ka kti pyrshah ïa u syiem kynrad jong nga.”

²⁹ Te u syiem u la kylli, “U khynnah u Absalom u la lait im ne em?” Bad u Ahimaas u la ïathuh, “Haba u Joab u la phah ïa u shakri u syiem, bad ïa nga u shakri jong me, nga la ïohi ïa ka jingkhihwin ka bakhraw, hynrei, ïa kaba kumno ngam shym tip.”

³⁰ Bad u syiem u la ong, “To phai noh kyrpang, bad to ïeng shane.” Kumta, u la phai noh kyrpang, bad u la ïeng thik.

³¹ Te, ha khmih, u la wan uta u Kushi; bad u Kushi u la ong, “Ka ktien ïa u syiem kynrad: naba U Trai ha kane ka sngi u la pynhiar kput na ka bynta jong me halor kita baroh kiba la ïeng ïaleh ïa me.”

³² Te u syiem u la kylli ïa u Kushi, “U khynnah u Absalom u lait im ne em?” Bad u Kushi u la ïathuh, “To ki nongshun u syiem kynrad jong nga, bad kita baroh kiba ïeng pyrshah ban pynsniew ïa me, to kin long kumba long uta u samla keiñ.”

³³ Te u syiem u la sngewsih shibun, bad u la leit kiew sha kata ka kamra halor ka khyrdop, bad u la ïam: bad katba u leit, u la ong kumne, “Ko khun jong nga Absalom, ko khun jong nga, ko khun jong nga Absalom! A ban da nga la ïap ma nga na ka bynta jong me, ko Absalom, ko khun jong nga, ko khun jong nga!”