2 SAMUEL 17 - KA BAIBL

Kham lah ka jingpynibuit u Hushai ban ïa ka jong u Ahithophel

¹ U Ahithophel u la ong ruh ha u Absalom, “To shah mynta ba ngan jied khat-ar hajar ki rangbah, bad ngan mih bad ngan beh nadien u Dabid ha kane hi ka miet:

² te ngan lap ïa u haba u dang thait bad ba u duna bor, bad ngan pynsheptieng ïa u: te kita ki briew baroh kiba ryngkat bad u kin phet ïap noh; bad ngan shoh pynïap tang ïa u syiem hi:

³ kumta, ngan pynphai sha me ïa u paidbah baroh: uta u briew uba me wad ïa u, u long kumjuh kumba ki la phai pat baroh: kumta, u paidbah baroh un long ha kaba suk.”

⁴ Te kata ka jingong ka la idei shibun ha khmat u Absalom, bad ha khmat ki tymmen basan ki Israel baroh.

⁵ Ynda kumta, u Absalom u la ong, “Mynta to khot ïa u Hushai u nong Arkhi ruh, bad ngin sngap ruh ïa kaba un ong ma u.”

⁶ Te haba u Hushai u la wan ha u Absalom, u Absalom u la kren ha u, da kaba ong, “U Ahithophel u la kren kumne: kumno, ngin leh katba kum ka ktien jong u? Lada em, to kren sa ma me.”

⁷ U Hushai te u la ong ha u Absalom, “Ha kane shi sien kata ka buit kaba u la pyni u Ahithophel kam long ka babha.”

⁸ U Hushai u la ong ruh, “Me ithuh ïa la u kpa bad ïa ki rangbah jong u, ba ki long kiba shynrang ki briew, bad kiba bitar la ki jingmut, kum ka dngiem kaba la jah noh la ki khun ha khlaw: u kpa jong me u long u riewïapom ruh, te un ym sah miet ryngkat bad u paidbah.

⁹ Ha khmih, u rieh ha kano kano ka krem, lane ha kano kano kawei pat ka jaka: bad haba kin kyllon katto katne na ki ha kaba sdang, te uno uno u ban ïohsngew ïa kata un ong keiñ, ‘Ka jingpynïap ka don hapdeng uta u paidbah uba bud ïa u Absalom.’

¹⁰ Hangta, wat uba shlur ruh, uba ka dohnud kum ka dohnud u sing, un jem noh jai: naba ki Israel baroh ki tip ba u kpa jong me u long uba shynrang ïapom, bad ba kita ki rangbah kiba bad u ki long kiba ïaw mynsiem.

¹¹ Hynrei, nga pyni buit ban lum khar paid ïa ki Israel baroh phar sha me, naduh Dan haduh Beer-sheba, u paidbah babun kat u shyiap uba harud ka duriaw; bad ba men leit ma me ruh da la ka met sha ka thma.

¹² Kumta, ngin lap ïa u ha kano kano ka jaka kat ha kaba yn shem ïa u, bad ngin tur ha u kumba hap ka umjer ha ka khyndew: te yn ym pynsah wat uwei ruh na u lymne na kita ki briew baroh kiba don lem bad u.

¹³ Lada u la rung shapoh kawei ka nongbah ruh, hangta ki Israel baroh kin ïawallam ki tyllai sha kata ka shnong, bad ngin ïaring noh ïa ka sha ka wah, haduh ba yn ym shem hangta wat iwei i maw.”

¹⁴ Bad u Absalom bad ki rangbah Israel baroh ki la ïa-ong, “Ban ïa ka jingpynibuit u Ahithophel lah ka jingpynibuit u Hushai u nong Arkhi.” Naba U Trai u la buh khnang ban pynduh noh ïa ka jingpynibuit ka babha u Ahithophel, khnang ba U Trai un ïoh pynwan ïa ka jingsniew halor u Absalom.

¹⁵ Ynda kumta, u Hushai u la ong ha u Sadok bad ha u Abiathar ki lyngdoh, “Kumta kumta u Ahithophel u la pyni buit ha u Absalom bad ha ki tymmen basan ki Israel; bad kumta kumta nga ruh nga la pyni buit.

¹⁶ Mynta te, to phah kloi ban ïathuh ha u Dabid, da kaba ong, ‘Wat sah miet mynta ha ki khriang ka ri khlaw, hynrei, la kumno kumno khie leit sha shiliang; ba ïoh yn bam duh ïa u syiem, bad ïa uta u paidbah baroh uba don lem bad u.’ ”

¹⁷ Te u Jonathan bad u Ahimaas ki dang ïa-ap hajan En-rogel; bad ka samla ka ju leit ïathuh ha ki; ki ruh ki la leit ïathuh ha u syiem Dabid; naba kim bit ban pynpaw ïa lade ban wan sha shnong.

¹⁸ Hynrei, uwei u samla u la ïohi ïa ki, bad u la ïathuh ha u Absalom: te ki la leit noh kloi baroh ar ngut, bad ki la wan sha ïing uwei u briew ha Bahurim, uta te u la don ka pukri ha la ka phyllaw; bad ki la hiar sha kata.

¹⁹ Bad kata ka briew ka la shim ïa ka jingtap bad ka la siang halor kata ka pukri bad ka la thad ïa u Kew ba la tylliat halor kata; kumta ym shym tip ei ei.

²⁰ Bad haba ki shakri u Absalom ki la wan sha kata ka briew ha kata ka ïing, ki la ïakylli, “U Ahimaas bad u Jonathan ki hangno?” Te kata ka briew ka la ïathuh ha ki, “Ki la leit sha shiliang kata ka wah duid.” Kumta, haba ki la wad ïa ki bad ba kim shem, ki la leit phai noh sha Jerusalem.

²¹ Te ynda kita ki la leit wan noh, kita kiwei ki la mih noh artet na kata ka pukri, bad ki la leit ïathuh ha u syiem Dabid; bad ki la ong ha u Dabid, “To ïeng, bad leit kloi sha shiliang kata ka um: naba kumne u Ahithophel u la shetbuit pyrshah ïa phi.”

²² Hangta u Dabid u la ïeng, bad uta u paidbah baroh uba don lem bad u, bad ki la leit sha shiliang ka Jordan: hamar ba ka la shai mynstep um shym sah uwei na ki u bym shym leit shiliang ka Jordan.

²³ Te haba u Ahithophel u la ïohi ba ym shym leh kumba u la pyni buit ma u, u la teh jin ha la ka kadda, bad u la ïeng, bad u la leit sha la ïing, ha ka shnong jong u, bad haba u la pynbeit ïa la ka ïing, u la phasi ïa lade; bad u la ïap, bad la tep ïa u ha u maw jingtep u kpa jong u.

U Dabid ha Mahanaim

²⁴ Ynda kumta, u Dabid u la leit sha Mahanaim. Bad u Absalom u la leit sha shiliang ka Jordan, ma u bad u paidbah Israel baroh lem bad u.

²⁵ Bad u Absalom u la thung ïa u Amasa halor u paidïapom ha ka jaka u Joab. Te une u Amasa u la long u khun jong uwei u briew, uba kyrteng “u Ithra” u kynja Israel, une u la leit bsut sha ka Abigail ka khun u Nahash, ka para ka Seruïah ka kmie u Joab.

²⁶ Kumta, ki Israel bad u Absalom ki la ïashong dara ha ka ri Gilead.

²⁷ Te haba u Dabid u la wan sha Mahanaim, u Shobi u khun u Nahash na Rabbah jong ki Ammon, bad u Makhir u khun u Ammiel na Lo-debar, bad u Barsillai u nong Gilead na Rogelim,

²⁸ ki la ïawallam ki jingthiah, bad ki khuri, bad ki khiew khyndew, bad u Kew, bad u Kew Barli, bad u moida, bad u khaw shira, bad ki bin, bad u dai, bad u pyrthiew,

²⁹ bad ka ngap, bad ka makhon, bad ki langbrot, bad ka ktung dud masi, ha u Dabid bad ha uta u paidbah uba bad u, ba kin ïoh bam: naba ki la ong, “U paidbah u thngan bad u la thait, bad u sliang, ha kane ka ri khlaw.”