2 SAMUEL 16 - KA BAIBL

¹ Te haba u Dabid u la palat khyndiat ïa ka khlieh uta u lum, ha khmih, u Siba u shakri u Mephibosheth u la ïashem bad u, u da don ruh shi jur ki kadda ba la teh jin, bad halor kita la don arspah tylli ki kpu, bad shispah rynjup ki soh Khajur, bad shispah tylli ki soh lyiur, bad shi lywa ka Waiñ.

² Bad u syiem u la ong ha u Siba, “Me mut aïu da kine?” Te u Siba u la ïathuh, “Kine ki kadda ki long ïa ki ba-ha-ïing u syiem ba kin shong halor jong ki; bad kine ki kpu bad ki soh lyiur ïa ki samla ba kin bam; bad kane ka Waiñ ïa kat kiba la thait ha ri khlaw ba kin ïoh dih.”

³ Te u syiem u la kylli, “Hynrei hangno uta u khun u kynrad jong me?” Bad u Siba u la ïathuh ha u syiem, “Ha khmih, u sah ha Jerusalem keiñ: naba u la ong, ‘Ha kane ka sngi ka ïing Israel kan aiti pat ha nga ïa ka hima u kpa jong nga.’ ”

⁴ Ynda kumta, u syiem u la ong ha u Siba, “Ha khmih, kiei kiei baroh ki jong u Mephibosheth ki long ki jong me.” U Siba te u la ong, “Nga nguh kyrpad ïa me; to ai ngan shem sngewbha ha khmat jong me, ko syiem kynrad.”

⁵ Te haba u syiem Dabid u la poi haduh Bahurim, ha khmih, la mih nangta uwei u briew uba na ka kur ka ïing u Saul, uba kyrteng “u Shimei”, u khun u Gera: une te u la wan mih, u da tim ïaïaid.

⁶ Bad u la shat maw ïa u Dabid, bad ha ki shakri u syiem Dabid baroh; te u paidbah baroh bad kita kiba shynrang ïapom baroh ki la don sha kamon bad sha kadiang jong u.

⁷ Bad u Shimei haba u tim u ong kumne, “Khie leit noh me, Khie leit noh me, u briew uba bit snam, me u briew u Belial:

⁸ U Trai u la pynphai halor jong me ïa kata ka snam ka ïing u Saul baroh, uba me la synshar ma me ha ka jaka jong u; bad U Trai u la ai noh ïa ka hima ha ka kti u Absalom u khun jong me; bad ha khmih, me la ngat ha la ka jong ka pop, namar ba me long u briew uba bit snam.”

⁹ Ynda kumta, u Abishai u khun ka Seruïah u la ong ha u syiem, “Balei une u 'sew ïap u tim ïa u syiem kynrad jong nga? nga kyrpad ïa me, to shah ïa nga ba ngan leit sha shiliang, ban khrai ïa ka khlieh jong u.”

¹⁰ Te u syiem u la ong, “Ngan rat donkam aïu bad phi, phi ki khun u Seruïah? Namar ba u tim noh, bad namar U Trai u la ong ïa u, ‘To tim ïa u Dabid’; uei uba nud ong, ‘Balei me la leh kumne?’ ”

¹¹ Bad u Dabid u la ong ha u Abishai, bad ha la ki shakri baroh, “Ha khmih, u khun jong nga, uba la mih na ka kpoh jong nga, u wad ïa ka jingim jong nga: sa katno tam te kumta une u kynja Benjamin? To iehnoh ïa u, un wat tim; naba U Trai u la hukum ïa u.

¹² Lehse U Trai un khmih ïa kane ka pop ba la leh ha nga, bad un ai U Trai ïa nga da ka babha namar ka jingtim jong u ïa nga ha kane ka sngi.”

¹³ Te kumta, u Dabid bad u paidbah jong u ki nang ïaid ha lynti: u Shimei ruh u nang ïaid ha ka ranab lum ha marpyrshah jong u, bad katba u nang leit u nang tim artad, bad u la kawang maw ha u, bad u la pynmih pui pui.

¹⁴ Bad u syiem, bad uta u paidbah baroh uba la don lem bad u, ki la thait; bad ki la shongthait hangta.

¹⁵ Te u Absalom, bad u paidbah ki rangbah Israel baroh, ki la wan sha Jerusalem, bad u Ahithophel ryngkat bad u.

¹⁶ Te haba u Hushai u nong Arkhi, u lok u Dabid, u la wan ha u Absalom, u Hushai u la ong ha u Absalom, “To un im u syiem, to un im u syiem.”

¹⁷ U Absalom te u la ong ïa u Hushai, “Dei kane pleng ka jinglehbha jong me ïa la u lok? balei ba mem shym leit lem bad la u lok?”

¹⁸ Bad u Hushai u la ïathuh ha u Absalom, “Em; hynrei, ïa uba un jied U Trai, bad une u paidbah, bad ki rangbah Israel baroh, ngan long u jong uta keiñ, bad lem bad uta ngan sah ruh.

¹⁹ Hato ïano pat ngan shakri? hato ngan ym shakri ha khmat u khun jong u? kumjuh kumba nga la shakri ha khmat u kpa jong me, kumta ngan long ha khmat jong me ruh.”

²⁰ Ynda kumta, u Absalom u la ong ïa u Ahithophel, “To ïapyrkhat buit lang ïa kaba kumno ngin leh.”

²¹ Bad u Ahithophel u la ïathuh ha u Absalom, “To leit bsut ha kita ki tnga kliar jong u kpa jong me, ïa kiba u la pynsah ban sumar ïing; te ki Israel baroh kin ïohsngew ba u kpa jong me u la isaitmet ïa me: hangta yn pynkhlaiñ ïa ki kti jong kine baroh kiba ryngkat bad me.”

²² Kumta, ki la pynïeng ïingjaiñ ïa u Absalom halor jrong ïing, bad u Absalom u la leit bsut sha kita ki tnga kliar u kpa jong u ha khmat ki Israel baroh.

²³ Te ka jingpynibuit u Ahithophel, kaba u ju pyni buit ha kita ki sngi, ka la long kumjuh kumba la ïakylli na ka ktien U Blei: kumta keiñ, ka la long ka jingpynibuit u Ahithophel baroh, ha u Dabid ruh bad ha u Absalom de.