2 SAMUEL 15 - KA BAIBL

U Absalom u ïaleh pyrshah ïa u Dabid

¹ Hadien kane te, u Absalom u la khreh ïa lade ki kali bad ki kulai, bad sanphew ngut ki briew ïa ka ban phet ha shuwa jong u.

² Bad u Absalom u la ju khie dang step, bad u la ju ïeng harud ka lynti ka khyrdop: te ka la long kumta, ba haba uno uno u briew uba don ka kajia u wan sha u syiem ban ïoh bishar, hangta u Absalom u la ju khot ïa u, bad u ong, “Me uba na kano ka shnong?” Uta te u la ju ïathuh, “U shakri jong me uba na kawei na ki jaid Israel.”

³ U Absalom te u la ju ong ïa u, “Ha khmih, ki kam jong me ki babha bad ki bahok; hynrei, ym don mano mano ba la buh da u syiem ban sngap ïa me.”

⁴ U Absalom u la ju ong ruh, “A ban da la buh nongbishar ïa nga ha kane ka ri, ba uno uno u briew uba don ka kam lane ka kajia u lah ban wan ha nga, nga te ngan da leh hok ïa u!”

⁵ Bad haba uno uno u la wan hajan ïa ka ban nguh ïa u, u la ju kner ïa la ka kti, bad u la bat ïa u, bad u doh ïa u.

⁶ Da kane ka rukom keiñ, u Absalom u la ju leh ïa ki Israel baroh kiba wan sha u syiem ban ïoh bishar. Kumta, u Absalom u la tuh ïa ki dohnud ki rangbah Israel.

⁷ Te ynda la dap sawphew snem, u Absalom u la ong ha u syiem, “Nga kyrpad ïa me, to shah ba ngan leit pyndep ha Hebron ïa ka kular jong nga, kaba nga la kular ha U Trai.

⁸ Naba u shakri jong me u la kular ïa ka kular mynba nga la shong ha Geshur ha Syria, da kaba ong, ‘Lada shisha U Trai un wallam pat ïa nga sha Jerusalem, nga te ngan shakri ïa U Trai.’ ”

⁹ Bad u syiem u la ong ha u, “To leit ha kaba suk.” Kumta u la ïeng, bad u la leit sha Hebron.

¹⁰ Hynrei, u Absalom u la phah ïa ki nongsyntiat ha ki jaid Israel baroh, da kaba ong, “Phi, tang phi shu ïohsngew ïa ka jingsawa ka ronsing, te hangta phin ong, ‘U Absalom u long syiem ha Hebron.’ ”

¹¹ Bad ki la leit arspah ngut ki rangbah, ïa kiba la khot, lem bad u Absalom na Jerusalem; ki hynrei, ki leit ha kaba lui lui; bad kim shym tip ei ei satia.

¹² Bad u Absalom u la phah khot ïa u Ahithophel u nong Gilon, u myntri jong u Dabid, na la ka shnong, kata na Giloh, mynba u dang kñia ïa kita ki jingkñia. Te kata ka jingshetsylla ka la jur; naba u paidbah uba bad u Absalom u la nang bun nang bun.

¹³ Bad u nonglam-ktien u la wan ha u Dabid, u da ong, “Ki dohnud ki rangbah Israel ki la snoh ha u Absalom.”

¹⁴ Bad u Dabid u la ong ha la ki shakri baroh kiba la don lem bad u ha Jerusalem, “Ïeng, to ngin ïaphet noh; lymda kumta, ngin ym lait mano mano na u Absalom: to pynkloi ïa ka ban leit, ba ïoh un lap kyndit ïa ngi, bad wallam ka jingjynjar halor jong ngi, bad ba un pom ïa kane ka shnong da ka syrti waitlam.”

¹⁵ Te kita ki shakri u syiem ki la ïa-ong ha u syiem, “Ha khmih, ki shakri jong me ki la kloi ban leh ïa kiei kiei baroh ba u syiem kynrad jong ngi u mon.”

¹⁶ Bad u syiem u la mih noh, bad ki ba-ha-ïing jong u baroh ki bud ïa u. Te u syiem u la iehnoh shiphew ngut ki tnga kliar ïa ka ban sumar ïa ka ïing.

¹⁷ Bad u syiem u la leit noh, bad u paidbah baroh u bud ïa u; te ki la sah ha Beth-merhak.

¹⁸ Te kita ki shakri jong u baroh ki la nang ïaid hajan jong u; ki Khereth baroh, bad ki Peleth baroh, bad ki Gitt baroh, hynriewspah ngut ki rangbah kiba la wan bud ïa u na Gath, ki la nang ïaid ha shuwa u syiem.

¹⁹ Ynda kumta, u syiem u la ong ha u Ittai u nong Gitt, “Balei ba men leit ma me ruh bad ngi? To leit phai noh, bad to shong bad u syiem: naba me long u nongwei, bad ïa uba la beh ruh; to leit phai sha la ka jong ka jaka.

²⁰ Dang mynhynnin me la wan, te kumno ha kane ka sngi ngan pynïaid sharum shaneng ïa me bad ngi, haba nga shu leit kat shaba lap? To leit phai ma me, bad shim lem ruh ïa la ki para; te ka jingisynei bad ka jingshisha kin long lem bad me.”

²¹ U Ittai te u la ïathuh ha u syiem, bad u la ong, “Katba im U Trai, bad katba im u syiem kynrad jong nga, shisha shisha ha kata ka jaka kaba u don u syiem kynrad jong nga, la ha kaba ïap lane ha kaba im, hangta hi keiñ u shakri jong me un don ruh.”

²² Te u Dabid u la ong ïa u Ittai, “Khie da leit te sha shiliang.” Kumta u Ittai u nong Gitt u la leit sha shiliang, bad ki rangbah jong u baroh, bad ki khynnah baroh kiba la don lem bad u.

²³ Bad kata ka ri baroh ka la ïam da ka ktien kaba jam, bad uta u paidbah baroh u la leit sha shiliang: u syiem hi ruh u la leit sha shiliang i wah Kidron, bad u paidbah baroh u la leit sha shiliang, shaphang ka lynti ka ri khlaw.

²⁴ Te, ha khmih, u Sadok ruh, bad ki Lebi baroh kiba la don lem bad u, ki da ïabah ïa ka synduk ka jutang U Blei; bad ki la buh ïa kata ka synduk U Blei ha tbian, bad u Abiathar u la leit kiew, haduh ba u paidbah baroh u la mih noh na kata ka shnong.

²⁵ U syiem te u la ong ïa u Sadok, “To leit lam noh pat ïa kata ka synduk U Blei sha shnong: lada ngan shem ka jingsngewbha ha khmat U Trai, un pynphai pat ïa nga, bad un pyni ha nga ïa ka ruh, bad ïa ka jaka shong jong u:

²⁶ hynrei, lada un ong kumne, ‘Ïa me ngam sngewbha shuh’; ha khmih, nga hangne, to un leh ïa nga katba u ibit ma u.”

²⁷ U syiem u la ong ruh ha u Sadok lyngdoh, “Me mem long u nongïohi? To phai noh te sha shnong ha kaba suk, bad kita ar ngut ki khun shynrang jong me lem bad me, u Ahimaas, u khun jong me, bad u Jonathan u khun u Abiathar keiñ.

²⁸ Ha khmih, ngan shong ha ki khriang ka ri khlaw, haduh ban da poi ktien na phi ïa ka ban pyntip ïa nga.”

²⁹ Kumta u Sadok bad u Abiathar ki la bah noh pat ïa kata ka synduk U Blei sha Jerusalem: bad ki la sah ruh hangta.

³⁰ Bad u Dabid u la leit kiew ïa u lum ki Olib, u da ïam ruh katba kiew artet; bad u la tapmoh ïa la ka khlieh, bad u la ïaid 'jat lyngkhuit ruh de: bad kita ki briew baroh kiba la don lem bad u ki la tapmoh uwei pa uwei ïa la ka khlieh, bad ki la leit artet, ki da ïam katba ki ïakiew.

³¹ Te la don uba la ïathuh ha u Dabid, da kaba ong, u Ahithophel ruh u don hapdeng kita kiba ïashetsylla bad u Absalom. Bad u Dabid u la ong, “A Trai, nga kyrpad ïa me, to pynkylla jingbieit ïa ka buit sian u Ahithophel.”

³² Bad haba u Dabid u la poi sha khlieh uta u lum, ha kaba la mane ruh ïa U Blei, ha khmih, u Hushai u nong Arkhi u la wan tan ïa u ba la kad ïa la ka barandi, bad u don ruh ka khyndew halor ka khlieh jong u:

³³ te u Dabid u la ong ha u, “Lada men leit sha shiliang bad nga, men shu long jingkit khia halor jong nga:

³⁴ hynrei, lada men leit phai pat sha shnong, bad ba men ong ha u Absalom, ‘Ngan long u shakri jong me, ko syiem; baroh shi katta nga la long u shakri u kpa jong me, mynta te ngan long u shakri jong me’: kumta me lah ban pynduh noh na ka bynta jong nga ïa ka buit sian u Ahithophel.

³⁵ U Sadok bad u Abiathar ki lyngdoh keiñ, balei ki ruh kin ym don hangta lem bad me? namar kata, ïa ka ktien baroh kaba men ïohsngew na ka ïing u syiem, to men ïathuh ïa kata ha ki lyngdoh, u Sadok bad u Abiathar keiñ.

³⁶ Ha khmih, ki don hangta lem bad ki, ki khun shynrang jong ki baroh ar ngut, u Ahimaas u khun u Sadok, bad u Jonathan u khun u Abiathar; bad da kita men phah sha nga ïa kaei kaei baroh kaba men ïohsngew.”

³⁷ Kumta, u Hushai u lok jong u Dabid u la wan sha shnong; bad u Absalom ruh u la wan sha Jerusalem.