2 SAMUEL 14 - KA BAIBL

Ka buit u Joab ban wallam pat ïa u Absalom

¹ Te u Joab u khun ka Seruïah u la tip ba ka dohnud u syiem ka la phai sha u Absalom.

² Bad u Joab u la phah sha Tekoa, bad u la wallam nangta ïa kawei ka briew kaba sian, bad u la ong ha ka, “Nga kyrpad ïa pha, to leh mynleh kaba ïambriew ïa lade, bad to kup da ki jaiñ sngewsih, bad wat sleh ïa lade da ka umphniang, hynrei, to long kum ka briew kaba ïambriew la slem ïa u baïap;

³ bad to leit ruh sha u syiem, bad kren ha u da kine ki ktien.” Kumta u Joab u la buh ïa kine ki ktien ha ka shyntur jong ka.

⁴ Te haba kata ka briew kaba na Tekoa ka la kren ha u syiem, ka la dem ngon la ka khmat haduh khyndew, bad ka la nguh de, bad ka la ong, “Ko syiem, to ïarap.”

⁵ U syiem te u la ong ha ka, “Ka la jia aïu ïa pha?” Ka ruh ka la ïathuh, “Da shisha nga long ka riewkynthei, bad u tnga jong nga u la ïap.

⁶ Te ka shakri jong me ka la don ar ngut ki khun shynrang, bad kine ar ngut ki la ïashoh ha lyngkha, bad ym shym don mano mano ban pynkhlad ïa ki, te uwei u la shoh ïa uta uwei, bad u la pynïap noh ïa u.

⁷ Te, ha khmih, ki kur baroh ki la ïeng ïaleh ïa ka shakri jong me, bad ki la ïa-ong, ‘To ai noh ïa uba la pynïap ïa la u para, ba ngi ruh ngin pynïap ïa u na ka bynta ka jingim uta u para jong u ïa uba u la pynïap, bad kumta ngin pynjot noh ïa uta u nongïoh pateng ruh’: kumta kin pynlip noh ïa u rnga ding jong nga ïa uba la pynsah, bad kin ym pynsah nam lymne ki khun ki ksiew ïa u tnga jong nga ha khmat ka pyrthei.”

⁸ Te u syiem u la ong ha kata ka briew, “To khie leit sha la ïing, ngan sa pynmih hukum shaphang jong pha.”

⁹ Te kata ka briew kaba na Tekoa ka la ong ha u syiem, “To kane ka pop kan long halor jong nga, bad halor ka ïing u kpa jong nga, ko syiem kynrad: u syiem te bad ka khet jong u kin khuid.”

¹⁰ Bad u syiem u la ong, “Uno uno ruh u ban kren ei ei ïa pha, to wallam ïa u sha nga, te uta un ym ïoh ktah shuh ïa pha.”

¹¹ Ynda kumta, ka la ong, “Nga kyrpad, to u syiem un kynmaw ïa U Trai uba U Blei jong me, ba u nongpynhiar kput ka snam un ym nang pynjot shuh shuh, ïoh kin pynjot noh ïa u khun jong nga.” U te u la ïathuh, “Katba im U Trai, iwei i 'ñiuh khlieh jong u khun jong pha in ym hap ha ka khyndew.”

¹² Ynda kumta, kata ka kynthei ka la ong, “Nga kyrpad ïa me, to shah ïa ka shakri jong me ban kren shikyntien ha u syiem kynrad.” U ruh u la ong, “To kren.”

¹³ Te kata ka briew ka la ong, “Namar kata te balei ba me la pyrkhat kumne pyrshah ïa u paidbah jong U Blei? namar haba u syiem u kren ïa kane ka ktien u long kum uba rem, ha kaba u syiem um wallam pat sha la ïing ïa uba la beh noh jong u.

¹⁴ Naba ngi dei ban ïap noh, bad ngi long kum ka um ba la theh ha khyndew, ïa kaba ym lah shuh ban tong pat; lymne U Blei um shim noh ïa ka jingim, hynrei, u pyrkhat ïa ka lad ba uta ïa uba la beh noh un ym long uba la kyntait noh na u.

¹⁵ Namar kata te, nga la wan ban kren ha u syiem kynrad ïa kane ka ktien, namar ba u paidbah u la pynsheptieng ïa nga: kumta ka shakri jong me ka la ong, ‘Ngan ïakren te bad u syiem; lehse u syiem un leh ïa ka jingkyrpad ka shakri jong u.

¹⁶ Naba u syiem un sngap, ïa ka ban pyllait ïa ka shakri jong u na ka kti jong uta u briew uba la thew ban pynjot noh ïa nga lem bad u khun jong nga na kata ka bynta trai jong U Blei.’

¹⁷ Ka shakri jong me te ka la ong, ‘Nga kyrpad ïa me, to ka ktien u syiem kynrad kan long ïa ka ban pyntngen’: naba u syiem kynrad u long kum u angel U Blei, ïa ka ban sngap ïa ka babha bad ïa ka basniew: bad U Trai U Blei jong me to un long lem bad me.”

¹⁸ Ynda kumta, u syiem u la ïathuh bad u la ong ha kata ka briew, “Nga kyrpad ïa pha, to wat buhrieh ei ei na kane kaba ngan sa kylli ïa pha.” Te kata ka kynthei ka la ong, “To un kren te u syiem kynrad jong nga.”

¹⁹ Bad u syiem u la ong, “Ka kti u Joab ka don lem ne em bad pha ha kane baroh?” Te kata ka kynthei ka la ïathuh bad ka la ong, “Katba im ka mynsiem jong me, ko syiem kynrad, ym lah ban phai sha kamon lymne sha kadiang na kiei kiei baroh ba u syiem kynrad u la ong: naba u shakri jong me u Joab u la hukum ïa nga, bad u la buh ma u ïa kine ki ktien baroh ha ka shyntur ka shakri jong me:

²⁰ ïa ka ban pynphai ïa kane ka kam ba u shakri jong me u Joab u la leh khnang ïa kane: hynrei, u kynrad jong nga u long uba stad, kum ka jingstad u angel U Blei, ïa ka ban tip ïa kiei kiei baroh kiba ha ka pyrthei.”

²¹ U syiem te u la ong ha u Joab, “Ha khmih te, nga la leh ïa kane ka kam: khie leit, bad wallam pat ïa uta u samla u Absalom.”

²² Bad u Joab u la dem ngon la ka khmat, bad u la nguh, bad u la kyrkhu ïa u syiem. Bad u Joab u la ong, “Ha kane ka sngi, u shakri jong me u tip ba nga la shem ka jingsngewbha ha khmat jong me, ko syiem kynrad, namar ba u syiem u la leh ïa ka jingkyrpad u shakri jong u.”

²³ Bad u Joab u la ïeng bad u la leit sha Geshur, bad u la wallam ïa u Absalom sha Jerusalem.

²⁴ U syiem te u la ong, “To un phai sha la ka jong ka ïing, hynrei, un ym ïohi ïa ka khmat jong nga.” Kumta, u Absalom u la phai sha la ka jong ka ïing, bad um shym ïohi ïa ka khmat u syiem.

²⁵ Te kat u Absalom ha Israel baroh ym shym don uba ïoh ïaroh namar ka jingbhabriew jong u: naduh ka sla'jat jong u haduh ka lyngkyrwiang khlieh jong u ym shym don jingduna ha u.

²⁶ Bad haba u la khi ïa la ka khlieh, (naba u la ju khi ïa la u shñiuh shi sien shi snem: namar ba u khia eh halor jong u, namar kata, u la ju khi ïa u:) u la ju thew ïa u 'ñiuh khlieh jong u arspah shekel, ha ka jingthew u syiem.

²⁷ Te ïa u Absalom la kha lai ngut ki khun shynrang, bad kawei ka kynthei, kaba kyrteng “ka Tamar”: ka la long ka kynthei kaba bhabriew.

²⁸ Kumta, u Absalom u la shong la dap ar snem ha Jerusalem; bad um shym la ïohi ïa ka khmat u syiem.

²⁹ Namar kata, u Absalom u la phah khot ïa u Joab, ïa ka ban phah ïa u sha u syiem: hynrei, um treh ban wan ha u: bad u la phah pat ka ba-ar sien, hynrei, um treh wan.

³⁰ Namar kata, u la ong ïa la ki shakri, “Phi ïohi ïa ka lyngkha u Joab hajan ka jong nga, bad u don hangta u Kew Barli; khie leit keiñ bad wiang ïa ka.” Kumta, ki shakri u Absalom ki la wiang ïa kata ka lyngkha.

³¹ Ynda kumta, u Joab u la ïeng, bad u la wan sha u Absalom hapoh ïing jong u, bad u la ong ha u, “Ki shakri jong me ki la wiang ïa ka lyngkha jong nga balei?”

³² U Absalom te u la ïathuh ha u Joab, “Ha khmih, nga la phah sha me, da kaba ong, ‘Ale shane, ba ngan ïoh phah ïa me sha u syiem, ïa ka ban ong, “Nga la wan noh na Geshur ïa ka ban lei? Ka la kham bha ïa nga ban sah hangto haduh mynta: mynta te, to ai ngan ïohi ïa ka khmat u syiem; bad lada don ka pop ha nga, to un pynïap ïa nga.” ’ ”

³³ Kumta, u Joab u la wan sha u syiem, bad u la ïathuh ha u: te haba u la phah khot ïa u Absalom, u ruh u la wan sha u syiem, bad u la dem ngon la ka khmat haduh khyndew ha khmat u syiem. U syiem te u la doh ïa u Absalom.