2 SAMUEL 13 - KA BAIBL

U Amnon bad ka Tamar

¹ Te hadien kane, u Absalom u khun u Dabid u la don ka para kaba bhabriew, kaba kyrteng “ka Tamar”: bad u Amnon u khun u Dabid u la ieit ïa ka.

² Bad u Amnon u la sngewsih katta katta ba u la pang namar ka Tamar ka para jong u; namar ka la long ka theisotti: te u Amnon um shym idon lad ban leh ei ei ïa ka.

³ Hynrei, u Amnon u la don u lok, uba kyrteng “u Jonadab”, u khun u Shimeah u hynmen u Dabid: bad u Jonadab u la long u briew u basian eh.

⁴ Te u la ong ha u, “Ma me u khun u syiem, balei ba me nang raikhoh nang raikhoh ha la ka sngi? Mem ïathuh ha nga?” U Amnon te u la ïathuh ha u, “Nga ieit keiñ ïa ka Tamar, ka para u Absalom u para jong nga.”

⁵ Bad u Jonadab u la ong ha u, “To thiah keiñ ha la ka jingthiah, bad leh mynleh pang ïa lade: te haba u kpa jong me u wan jngoh ïa me, to ong ha u, ‘Nga kyrpad ïa me, to shah ïa ka Tamar ka para jong nga ba kan wan ai jingbam ïa nga, bad ban khreh jingbam ha khmat jong nga, ba ngan ïohi, bad ïoh bam ïa ka na ka kti jong ka.’ ”

⁶ Kumta, u Amnon u la thiah bad u la leh mynleh pang ïa lade: bad haba u syiem u la wan jngoh ïa u, u Amnon u la ong ha u syiem, “Nga kyrpad ïa me, to shah ïa ka Tamar ka para jong nga ba kan wan shet ar tylli ki kpu ha khmat jong nga, ba ngan ïoh bam na ka kti jong ka.”

⁷ Ynda kumta, u Dabid u la phah sha ïing ha ka Tamar, u da ong, “To leit keiñ sha ka ïing u Amnon u hynmen jong pha, bad khreh jingbam ïa u.”

⁸ Kumta, ka Tamar ka la leit sha ïing u Amnon u hynmen jong ka; u te u dang thiah. Bad ka la shim shi lynglun, bad ka la khñiot ïa ka, bad ka la thaw kpu ha khmat jong u, bad ka la shet ïa kita ki kpu.

⁹ Bad ka la shim da ka nar sdieh, bad ka la theh ïa ki ha khmat jong u; hynrei, um treh ban bam. Bad u Amnon u la ong, “To beh noh shabar ïa ki briew baroh na nga.” Te u briew baroh u la mih shabar na u.

¹⁰ Bad u Amnon u la ong ïa ka Tamar, “To wallam ïa kata ka jingbam shapoh kane ka kamra, ba ngan dup bam na ka kti jong pha.” Ka Tamar te ka la shim ïa kita ki kpu kiba ka la khreh, bad ka la leit lam shapoh ka kamra ha u Amnon u hynmen jong ka.

¹¹ Te haba ka la leit lam ïa ki hajan jong u ba un ïoh bam, u la bat ïa ka, bad u la ong ha ka, “Ale, ko para jong nga, thiah bad nga.”

¹² Ka te ka la ïathuh ha u, “Ynnai, ko kong, wat pynkheiñ burom ïa nga; namar ym bit ban leh kaba kum kane ha Israel: wat leh keiñ kum kane ka jingleh bieit.

¹³ Nga ruh ngan kit shaei ïa la ka jinglehrain? ma me te men long kum uwei na ki riewbieit ha Israel. Mynta namar kata te, nga kyrpad ïa me, to ïakren bad u syiem; naba un ym adong ïa nga ha me.”

¹⁴ La kumta ruh, um treh ban sngap ïa ka ktien jong ka; hynrei, ba u kham khlaiñ ïa ka, u la leh jubor ïa ka, bad u la thiah bad ka.

¹⁵ Ynda kumta, u Amnon u la isih ïa ka da ka jingisih ka bakhraw eh; kumta kata ka jingisih da kaba u la isih ïa ka, ka la kham khraw ïa kata ka jingieit da kaba u la ieit ïa ka. Bad u Amnon u la ong ïa ka, “Khie noh, leit noh.”

¹⁶ Ka te ka la ong ha u, “Ym kumta, namar kane ka jinglehrain kaba khraw ba me beh noh ïa nga ka kham sniew ban ïa kata kawei ba me la leh ïa nga.” Hynrei, um sngap ïa ka.

¹⁷ Ynda kumta, u la khot ïa u shakri jong u, uba shakri ïa u, bad u la ong, “To beh noh shabar ïa kane ka briew na nga: bad khang ïa ka jingkhang hadien jong ka.”

¹⁸ Te ka la kup da ka jaiñkup kaba khleh rong: naba la ju pynkup ïa ki khun kynthei kiba dang sotti jong ki syiem ha ki jaiñkup kiba kum kine. Ynda kumta, uta u shakri jong u, u la lam shabar ïa ka bad u la khang ïa ka jingkhang hadien jong ka.

¹⁹ Bad ka Tamar ka la buh da u dpei halor ka khlieh jong ka, bad ka la kad ïa kata ka jaiñkup kaba khleh rong kaba ka kup; bad ka la buh ïa la ka kti halor la ka khlieh, bad ka la leit noh, ka da lynñiar artad ha lynti.

²⁰ Bad u Absalom u hynmen jong ka u la ong ha ka, “U Amnon u hynmen jong pha u la leit sha pha? Hynrei, ko hep, to sngap jar mynta: u long u hynmen jong pha; to wat pynkhuslai la ka dohnud namar kane.” Kumta, ka Tamar ka la sah rangli ha ïing u Absalom u hynmen jong ka.

²¹ Hynrei, haba u syiem Dabid u la ïohsngew ïa kine kiei kiei baroh, u la bitar eh lep.

²² U Absalom te um shym kren ka basniew lymne ka babha ïa u Amnon: naba u Absalom u la shun ïa u Amnon, namar ba u la leh bor ïa ka Tamar ka para jong u.

U Absalom u pynhiar kput bad u phet ïap

²³ Te ynda la ar snem biang: u Absalom u la don kiba khap shñiuh langbrot ha Baal-hasor, kaba hajan Ephraim: bad u Absalom u la khot ïa ki khun shynrang u syiem baroh.

²⁴ Bad u Absalom u la wan sha u syiem, bad u la ong, “Mynta, ha khmih, u shakri jong me u don kiba khap shñiuh langbrot; nga kyrpad ïa me, to ai ba un wan u syiem bad ki shakri jong u lem bad u shakri jong me.”

²⁵ U syiem te u la ong ha u Absalom, “Em, ko khun, ngin ym leit baroh, ïoh ngi ban khia halor jong me.” U te u la kyrpad eh ïa u: la kumta ruh um treh leit, hynrei, u la kyrkhu ïa u.

²⁶ Ynda kumta, u Absalom u la ong, “Lada kumta, nga kyrpad te, to shah ïa u Amnon u hynmen jong nga ban leit lem bad ngi.” U syiem te u la ong ha u, “Ban lei un leit lem bad me?”

²⁷ Hynrei, u Absalom u la kyrpad eh ïa u, ba un phah ïa u Amnon bad ki khun shynrang u syiem baroh ryngkat bad u.

²⁸ Te u Absalom u la hukum ïa la ki shakri, u da ong, “To khmih thuh te, haba ka dohnud u Amnon ka la kmen da ka Waiñ; bad haba ngan ong ïa phi, ‘To shoh ïa u Amnon’, hangta te to pynïap ïa u, wat sheptieng: balei, ngam shym hukum ïa phi? leh rangbah keiñ, bad to long kiba shlur ruh.”

²⁹ Bad ki shakri u Absalom ki la leh ïa u Amnon kumba u Absalom u la hukum. Hangta te ki khun shynrang u syiem baroh ki la khie, bad uwei uwei baroh u la shong halor la ka kadda, bad ki la phet ïap.

³⁰ Te mynba ki dang ha lynti, ka jingbna ka wan ha u Dabid, kaba ong, “U Absalom u la pynïap ïa ki khun shynrang u syiem baroh, bad ym don uwei ruh na ki ba la pynsah.”

³¹ Ynda kumta, u syiem u la ïeng, bad u la kad ïa la ki jaiñ, bad u la thiah ha ka khyndew; bad ki shakri baroh ki la ïeng hajan kiba la kad ïa la ki jaiñ.

³² Te u Jonadab, u khun u Shimeah u hynmen u Dabid, u la ïathuh bad u la ong, “Wat ai ba u kynrad jong nga un tharai ba ki la pynïap ïa kita ki samla baroh kiba ki khun shynrang u syiem; naba tang u Amnon hi u la ïap: naba ïa kane la lah thew lypa da ka jingbuh u Absalom naduh kata ka sngi ba u la leh jubor ïa ka Tamar ka para jong u.

³³ Mynta te wat ai ba u syiem kynrad jong nga un khuslai la ka dohnud namar kane, da kaba tharai ba la ïap ki khun shynrang u syiem baroh: namar tang u Amnon hi u la ïap.”

³⁴ Hynrei, u Absalom u la phet ïap. Bad uta u shakri uba ap u la khmied ïa la ki khmat, bad u la khmih, te, ha khmih, ki la wan shibun ki briew na ka lynti ka ranab lum na shadien jong u.

³⁵ Bad u Jonadab u la ong ha u syiem, “Ha khmih, kita ki khun u syiem ki ïawan: kumba u shakri jong me u la ong, kumta ka long keiñ.”

³⁶ Bad haba u dang shu lah kren, ha khmih, kita ki khun u syiem ki la lap ba poi, bad ki la pynjam ïa la ka ktien, bad ki la ïam. Bad u syiem ruh bad ki shakri jong u baroh ki la ïam da ka jinglynñiar ka bakhraw eh.

³⁷ Hynrei, u Absalom u la phet ïap, bad u la leit sha u Talmai u khun u Ammihud, u syiem ka Geshur. U Dabid te u la ïambriew ïa la u khun ha la ka sngi.

³⁸ Kumta, u Absalom u la phet ïap, bad u la leit sha Geshur, bad u la sah hangta lai snem.

³⁹ Te ka mynsiem u syiem Dabid ka la kwah eh ban leit mih sha u Absalom: naba la pyntngen ïa u namar u Amnon, haba u la lah ïap.