2 SAMUEL 12 - KA BAIBL

U Nathan u sneng pynrem ïa u Dabid

¹ Bad U Trai u la phah ïa u Nathan sha u Dabid. U la wan te sha u, bad u la ong ha u, “Ki la don ar ngut ki briew ha kawei ka shnong; uwei u riewspah, bad uta uwei u duk.

² Uta u bariewspah te u la don shibun eh ki langbrot bad ki masi:

³ hynrei, uta u baduk um shym don ei ei, hynrei, tang iwei i khun langbrot iba rit ïa iba u la thied bad ba u la bsa; te i la nang san lem bad u, bad lem bad ki khun jong u; na ka jingbam jong u i la ju bam, bad na ka khuri jong u i la ju dih, bad ha ka shadem jong u i la ju thiah, bad i la long ha u kum ka khun.

⁴ Te u nongleit jingleit u la wan ha uta u bariewspah, hynrei, u la bynnud ban shim na la ki jong ki langbrot bad na la ki jong ki masi, ïa ka ban khreh na ka bynta uta u nongleit jingleit uba la wan ha u, hynrei, u shim ïa ita i khun langbrot uta u briew u baduk, bad u la khreh ïa ka na ka bynta uta u briew uba la wan ha u.”

⁵ Te ka jingbitar u Dabid ka la meh lep ïa uta u briew; bad u la ong ha u Nathan, “Katba im U Trai, uta u briew uba la leh ïa kane u dei shisha ban ïap:

⁶ bad un pynburia saw shah na ka bynta ita i khun langbrot, namar ba u la leh ïa kane ka kam, bad ba um shym la sngewsynei.”

⁷ U Nathan te u la ong ha u Dabid, “Me long ma me uta u briew. Kumne u ong U Trai, U Blei ki Israel, ‘Nga la pynsleh ïa me ban long u syiem halor ki Israel, nga la pynim ruh ïa me na ka kti u Saul;

⁸ bad nga la ai ha me ïa ka ïing u kynrad jong me, bad ïa ki tnga u kynrad jong me ha ka shadem jong me, bad nga la ai ha me ïa ka ïing u Israel bad ïa ka jong u Judah; bad lada kata ka la kham khyndiat, ngan da la ai kham bun shikatdei.

⁹ Balei te me la beiñ ïa ka ktien U Trai, ïa ka ban leh sniew ha khmat jong u? Ïa u Uriah u kynja Hit me la pynïap da ka waitlam, bad ïa ka tnga jong u me la shim ban long ka tnga jong me, bad me la pynïap ïa u da ka waitlam ki khun u Ammon.

¹⁰ Mynta te namar kata, ka waitlam kan ym iehnoh ïa ka ïing jong me lano lano ruh; namar ba me la beiñ ïa nga, bad ba me la shim ïa ka tnga u Uriah, u kynja Hit ban long ka tnga jong me.’

¹¹ Kumne u ong U Trai, ‘Ha khmih, ngan pynmih ïa ka jingsniew pyrshah ïa me na ka ïing jong me hi, bad ngan shim ïa ki tnga jong me ha khmat jong me, bad ngan ai ïa ki ha u paramarjan jong me, u ruh un thiah bad ki tnga jong me ha pyrshah kane ka sngi.

¹² Naba me la leh ïa ka ha kaba rieh: hynrei, nga ngan leh ïa kane ka jingleh ha khmat ki Israel baroh, bad ha pyrshah ka sngi.’ ”

¹³ Te u Dabid u la ong ha u Nathan, “Nga la leh pop ïa U Trai.” U Nathan te u la ïathuh ha u Dabid, “U Trai ruh u la pyndam noh ïa kata ka pop jong me; men ym ïap keiñ.

¹⁴ Pynban, namar ba da kane ka jingleh me la ai ka daw kaba khraw ïa ki nongshun jong U Trai ban krenbeiñ blei, ita i khynnah ruh iba la kha ïa me in ïap shisha.”

¹⁵ Te u Nathan u la leit noh sha la ïing. Bad U Trai u la shoh ïa ita i khynnah iba la kha ka tnga u Uriah ïa u Dabid, te i la pang eh.

¹⁶ U Dabid, namar kata, u la kyrpad ïa U Blei na ka bynta ita i khynnah; bad u Dabid u la shah jingit, bad u la leit, bad u la thiah ha khyndew baroh shi miet.

¹⁷ Ki tymmen basan ka ïing jong u ki la mih, bad ki la ïeng hajan jong u, ïa ka ban pynïeng ïa u na khyndew: u te um treh, lymne um bam kpu lem bad ki.

¹⁸ Ha ka sngi ka bahynñiew te ita i khynnah i la ïap. Hynrei, ki shakri u Dabid ki la sheptieng ban ïathuh ha u ba i la ïap i khynnah: namar ki la ïa-ong, “Ha khmih, katba i khynnah i dang im, ngi la kren ha u, hynrei, um sngap ïa ka ktien jong ngi: katno te ba un pynkhuslai ïa lade, lada ngin ïathuh ha u ba i la ïap i khynnah?”

¹⁹ Hynrei, haba u Dabid u la ïohi ïa la ki shakri ba ki ïakren pasiaw, u Dabid u la sngewthuh ba i la ïap i khynnah: kumta, u Dabid u la kylli ïa la ki shakri, “I la ïap i khynnah?” Ki ruh ki la ïathuh, “I la ïap.”

²⁰ Ynda kumta, u Dabid u la ïeng na ka khyndew, bad u la sum, bad u la sleh, bad u la pli ïa la ki jaiñ; bad u la wan sha ka ïing U Trai, bad u la mane: hadien kata, u la wan sha la ka jong ka ïing; bad haba u la pan ki la buh kpu ha khmat jong u, u ruh u la bam.

²¹ Ynda kumta, ki shakri jong u ki la ong ha u, “Kaei kane ba me la leh? Katba i dang im i khynnah, me la shah jingit bad me la ïam na ka bynta jong i; hynrei, ynda i la ïap i khynnah, me la ïeng bad me la bam kpu.”

²² U te u la ïathuh, “Mynba i dang im keiñ i khynnah, nga la shah jingit bad nga la ïam: naba nga la ong, ‘Uei uba lah ban tip la un isynei ne em U Trai ïa nga, ba in ïoh im i khynnah?’

²³ Hynrei, mynta i la ïap, ïa ka ban lei pat ngan da shah jingit? Nga lah ma nga ban wallam noh ïa i pat? Ma nga ngan leit sha i, hynrei, ma i in ym wan phai sha nga.”

²⁴ Bad u Dabid u la pyntngen ïa ka Bathsheba ka tnga jong u, bad u la bsut sha ka, bad u la thiah bad ka: ka ruh ka la kha ïa u khun, bad u la khot kyrteng “u Solomon” ïa u. Bad U Trai u la ieit ïa u;

²⁵ bad u la phah da ka kti u Nathan u nongïathuhlypa, bad u la kyrteng “u Jedidiah” ïa u, na ka bynta U Trai.

U Dabid u jop ïa ka Rabbah

²⁶ Te u Joab u la ïaleh ïa ka Rabbah ki khun u Ammon, bad u la jop ïa ka nongbah u syiem.

²⁷ Bad u Joab u la phah ki nonglam-ktien sha u Dabid, bad u la ong, “Nga la ïaleh thma ïa ka Rabbah, bad nga la jop ïa ka shnong ki um.

²⁸ Mynta te namar kata, to lum lang ïa kiba dang sah na u paidbah, bad to ïaleh ïa ka shnong, bad jop ïa ka: ïoh haba nga la jop ma nga ïa ka shnong, ngan kyrteng ïa ka ha ka kyrteng jong nga.”

²⁹ Te u Dabid u la lum lang ïa u paidbah baroh, bad u la leit sha Rabbah, bad u la ïaleh ïa ka, bad u la jop ïa ka.

³⁰ Bad u la shim ïa ka pansngiat u syiem jong ki na ka khlieh jong u; te ka jingkhia jong ka, ka la don shi talent ksiar, bad ki la don ha ka ki mawkordor; bad la buh ïa ka ha ka khlieh u Dabid. U la shim noh ruh shikatdei ka jinglute na kata ka shnong.

³¹ Bad u la leit lam noh ïa ki briew kiba ha ka, bad u la buh ïa ki ha ki kurat, bad ha ki nar puh, bad ha ki sdie nar, bad u la pyntrei ïa ki ha ki pajwa maw-it: bad kumta, u la leh ha ki shnong ki khun u Ammon baroh. Kumta u Dabid bad u paidbah baroh ki la leit phai pat sha Jerusalem.