2 SAMUEL 11 - KA BAIBL

U Dabid bad ka Bathsheba

¹ Bad ynda ha kawei ka snem, ha ka aïom ba ki syiem ki ju leit mih ban ïaleh thma, u Dabid u la phah ïa u Joab, lem bad ki shakri jong u, bad ki Israel baroh de; ki ruh ki la pynjot noh ïa ki khun u Ammon, bad ki la ker kut ïa ka Rabbah. Hynrei, u Dabid u la sah ha Jerusalem.

² Ka la jia te ha kawei ka janmiet, ba u Dabid u la khie na la ka jingthiah bad u la ïaid kai hajrong ïing ka ïing u syiem: bad na jrong ïing, u la ïohi ïa ka kynthei ba ka da sum; te kata ka kynthei ka la long kaba bhabriew eh ban khmih ïa ka.

³ Bad u Dabid u la phah kylli shaphang kata ka kynthei. Te uwei u la ong, “Kane kam long ka Bathsheba, ka khun u Eliam, ka tnga u Uriah u kynja Hit?”

⁴ Bad u Dabid u la phah ki nongkit-ktien, bad u la shim ïa ka; ka ruh ka la wan shapoh sha u, u ruh u la thiah bad ka; (naba la pynkhuid ïa ka na ka jingpang jong ka;) te ka la leit wan noh sha la ïing.

⁵ Kata ka kynthei te ka la punkhun; bad ka la phah ïathuh ha u Dabid, bad ka la ong, “Nga la punkhun.”

⁶ Bad u Dabid u la phah sha u Joab u da ong, “To phah sha nga ïa u Uriah u kynja Hit.” U Joab te u la phah ïa u Uriah sha u Dabid.

⁷ Te haba u Uriah u la wan sha u, u Dabid u la kylli ïa u, u Joab u kumno, bad kumno u paidbah, bad kumno ka ïaid ka thma.

⁸ Bad u Dabid u la ong ïa u Uriah, “Khie leit hiar sha la ïing, bad sait ïa la ki sla'jat.” Bad u Uriah u la leit mih noh na ka ïing u syiem, bad la phah lam ka jingbam na u syiem hadien jong u.

⁹ Hynrei, u Uriah u la thiah ha ka jingkhang ka ïing u syiem ryngkat bad ki shakri u kynrad jong u baroh bad um shym leit hiar sha la ïing.

¹⁰ Te haba ki la ïathuh ha u Dabid, da kaba ong, “U Uriah um shym leit hiar sha la ïing,” u Dabid u la ong ha u Uriah, “Balei, mem shym wan na la ka jingleit? Hato kumno ba mem shym leit hiar sha la ïing?”

¹¹ Bad u Uriah u la ong ha u Dabid, “Kata ka Synduk ka Jutang, bad ki Israel, bad ki Judah, ki ïashong ha ka ïingtrep; bad u kynrad jong nga u Joab, bad ki shakri u kynrad jong nga, ki ïashong dara shabar ha madan; nga kumno ngan leit sha la ïing, ban bam bad ban dih, bad ban thiah bad la ka tnga? Katba me im, bad katba ka im ka mynsiem jong me, ngan ym leh kum ïa kane ka kam.”

¹² Bad u Dabid u la ong ïa u Uriah, “To shong shane sa kane ka sngi, lashai te ngan pyllait noh ïa me.” Kumta, u Uriah u la sah ha Jerusalem kata ka sngi bad lashai.

¹³ U Dabid te u la khot ïa u, ban bam bad ban dih ha khmat jong u; bad u la pynbuaid ïa u: bad ynda miet u la leit thiah ha la ka jingthiah lem bad ki shakri u kynrad jong u, hynrei, um shym leit hiar sha la ïing.

¹⁴ Mynstep te u Dabid u la thoh shithi sha u Joab, bad u la phah ïa ka ha ka kti u Uriah.

¹⁵ Bad ha kata ka shithi u la thoh, u da ong, “To buh ïa u Uriah ha pyrshah kaba jur tam ka jingïaleh, bad kynriah noh na u, khnang ba yn shoh ïa u, bad ba un ïap noh.”

¹⁶ Te mynba u Joab u ap tawiar ïa kata ka shnong, u la buh ïa u Uriah ha ka jaka kaba u tip ba la don ki rangbah kiba shlur.

¹⁷ Bad ki rangbah jong kata ka shnong ki la ïamih shabar, bad ki la ïaleh ïa u Joab: bad katto katne na u paidbah, ki shakri u Dabid, ki la ïakyllon ïap; bad u Uriah u kynja Hit ruh u la ïap.

¹⁸ Ynda kumta, u Joab u la phah ïathuh ha u Dabid ïa kiei kiei baroh shaphang ka thma;

¹⁹ bad u la hukum ïa uta u nonglam-ktien, da kaba ong, “Haba me la pyndep ban ïathuh ïa kiei kiei baroh shaphang ka thma ha u syiem,

²⁰ te lada ka jingbitar u syiem kan khih, bad lada un ong ha me, ‘Balei phi la leit hajan katta katta ïa ka shnong ban ïaleh? hato phim shym tip ba kin siat nalor ka kynroh?

²¹ Uei ba la shoh ïap ïa u Abimelekh u khun u Jerubbesheth? Ym dei ka kynthei kaba la pynnoh halor jong u da shi dkhot u mawtylliat nalor ki kynroh, kumta u la ïap ha Thebes? Balei phi la leit hajan kata ka kynroh?’ ynda kumta, men ong, ‘U Uriah u kynja Hit u shakri jong me u ruh u la ïap.’ ”

²² Kumta, uta u nonglam-ktien u la leit, bad u la wan ïathuh ha u Dabid ïa kita baroh ba u Joab u la phah ïa u shaphang jong ki.

²³ Bad uta u nonglam-ktien u la ong ha u Dabid, “Shisha kita ki briew ki la jop ïa ngi, bad ki la mih noh sha ngi ha madan, ngi ruh ngi la beh nadien jong ki haduh ka jingkhang ka khyrdop.

²⁴ Bad ki nongsiat ki la siat sha ki shakri jong me nalor kata ka kynroh; te na ki shakri u syiem don kiba la ïap, bad u Uriah u kynja Hit u shakri jong me ruh u la ïap.”

²⁵ Ynda kumta, u Dabid u la ong ha uta u nonglam-ktien, “Kumne men ong ha u Joab. ‘Wat ai ba kane kan pynsngewsih ïa me, naba ka waitlam kan pynjot noh ïa une bad ïa uta kumjuh: to nang pynjur ïa la ka jingïaleh thma pyrshah ïa ka shnong, bad to pynjot ïa ka’: ma me ruh to men pynshlur ïa u.”

²⁶ Te haba ka tnga u Uriah ka la ïohsngew ba u la ïap u Uriah u tnga jong ka, ka la ïambriew ïa la u tnga.

²⁷ Bad haba la kut kata ka jingïambriew, u Dabid u la phah shaw ïa ka sha ka ïing jong u, bad ka la long ka tnga jong u, bad ka la kha u khun ïa u. Hynrei, kata ka kam kaba u Dabid u la leh, ka la pynsngewsih ïa U Trai.