2 SAMUEL 10 - KA BAIBL

Ka jingshahjop ki Ammon bad ki Syria

¹ Hadien kane te, u syiem ki khun u Ammon u la ïap, bad u Hanun u khun jong u, u la synshar ha ka jaka jong u.

² Te u Dabid u la ong, “Ngan leh bha ïa u Hanun u khun u Nahash, kumjuh kumba u kpa jong u, u la leh bha ïa nga ruh.” Kumta, u Dabid u la phah ha la ki shakri ïa ka ban pyntngen ïa u shaphang u kpa jong u. Bad ki shakri u Dabid ki la poi sha ka ri ki khun u Ammon.

³ Te ki bakhraw batri ki khun u Ammon ki la ïa-ong ha u Hanun u kynrad jong ki, “Me tharai ba u Dabid u pyndonburom ïa u kpa jong me, namar ba u la phah ki nongpyntngen sha me? ym long pynban ïa ka ban jngoh ïa ka shnong, bad ban syntiat ïa ka, bad ban pynjot ïa ka, ba u Dabid u la phah ïa la ki shakri sha me?”

⁴ Kumta, u Hanun u la shim ïa ki shakri u Dabid, bad u la khi mar shiliang na ki 'ñiuh tmoh jong ki, bad u la ot marshiteng ïa ki jaiñ jong ki, haduh ki skhep jong ki, bad u la phah noh ïa ki.

⁵ Haba la ïathuh ïa kane ha u Dabid, u la phah tan ïa ki; naba kita ki briew ki la lehrain eh. Bad u syiem u la ong, “To sah ha Jerikho haduh ba ki la san ki 'ñiuh tmoh jong phi, hadien kata te, sa wan phai noh.”

⁶ Te haba ki khun u Ammon ki la ïohi ba u Dabid u la isih ïa ki, ki khun u Ammon ki la phah wer ïa ki Syria na Beth-rehob, bad ïa ki Syria na Sobah arphew hajar kiba ïaleh na tbian, bad ïa u syiem ka Maakah shi hajar ki briew, bad ïa ki nong Tob khat-ar hajar ki briew.

⁷ Bad haba u Dabid u la ïohsngew, u la phah ïa u Joab, bad baroh u paidïapom ki rangbah badonbor.

⁸ Bad ki khun u Ammon ki la lah ïamih noh, bad ki la ïabuh ryntih ïa ka jingïaleh ha khmat ka khyrdop: te ki Syria kiba na Sobah, bad na Rehob, bad ki nong Tob, bad ki nong Maakah, ki la long kyrpang hi ha ka lyngkha.

⁹ Haba u Joab u la ïohi ba ka thma ka la long pyrshah ïa u na shakhmat bad na shadien, u la jied na kita kiba la kynsai jong ki Israel baroh, bad u la buh ryntih ïa ki ban ïaleh ïa ki Syria:

¹⁰ bad ïa kita kiwei, u la ai ha ka kti u Abishai u para jong u, bad u la buh ryntih ïa ki, ban ïaleh ïa ki khun u Ammon.

¹¹ Bad u la ong, “Lada ki Syria kin lah ïa nga, ma me to men ïarap ïa nga: hynrei, lada ki khun u Ammon kin lah ïa me, te nga ngan wan ïarap ïa me.

¹² To long shlur, bad ngin leh rangbah na ka bynta u paidbah jong ngi; bad na ka bynta ki nongbah U Blei jong ngi: bad U Trai to un leh katba u ibit hi.”

¹³ Kumta, u Joab bad uta u paid uba la don bad u ki la leit hajan ïa ka ban ïaleh thma ïa ki Syria: ki te ki la phet ïap ha khmat jong u.

¹⁴ Bad haba ki khun u Ammon ki la ïohi ba ki Syria ki la phet ïap, ki ruh ki la phet ïap ha khmat u Abishai, bad ki la rung shapoh shnong. Ynda kumta, u Joab u la leit wan noh na ki khun u Ammon, bad u la poi sha Jerusalem.

¹⁵ Te haba ki Syria ki la ïohi ba la jop ïa ki ha khmat ki Israel, ki la ïalum khar paid.

¹⁶ Bad u Hadareser u la phah, bad u la wallam ïa kita ki Syria kiba sha shiliang kata ka Wah: bad ki la ïawan sha Helam, bad u Shobakh u kaptan u paidïapom u Hadareser ha shuwa jong ki.

¹⁷ Bad la pyntip ïa u Dabid; u ruh u la lum khar paid ïa ki Israel baroh, bad u la leit sha shiliang ka Jordan, bad u la poi ha Helam. Bad ki Syria ki la ïabuh ryntih ïa lade pyrshah ïa u Dabid, bad ki la ïaleh thma ïa u.

¹⁸ Ki Syria te ki la ïaphet ïap ha khmat ki Israel; bad na ki Syria, u Dabid u la pynïap ïa ki rangbah jong ki hynñiewspah tylli ki kali ïapom, bad sawphew hajar ki nongshong kulai, bad u la shoh ïa u Shobakh u kaptan ki paidïapom jong ki, kumta u la ïap hangta.

¹⁹ Te haba kita ki syiem baroh kiba la long ki shakri ïa u Hadareser ki la ïohi ba la pynïap ïa ki ha khmat ki Israel, ki la ïasuk noh bad ki Israel, bad ki la shakri ïa ki. Kumta, ki Syria ki la sheptieng ban ïarap shuh ïa ki khun u Ammon.