2 SAMUEL 1 - KA BAIBL

U Dabid u kylli shaphang ka jingïap u Saul

¹ Te hadien ka jingïap u Saul, haba u Dabid u la lah wan phai noh na kaba pynïap ïa ki Amalek, bad haba u Dabid u la shong ar sngi ha Siklag,

² ha ka balai sngi te, ha khmih, u briew u la wan mih na ka jaka shong dara u Saul uba la kad ki jaiñ jong u, bad ka khyndew halor ka khlieh jong u; te haba u la wan poi ha u Dabid, u la hap ha khyndew, bad u la nguh.

³ Bad u Dabid u la kylli ïa u, “Nangno me la wan?” U te u la ïathuh ha u, “Na ka dara ki Israel nga la phet ïap.”

⁴ Bad u Dabid u la kylli ïa u, “Ka la long kumno? To ïathuh ha nga, nga kyrpad ïa me.” U ruh u la ïathuh, “U paidbah u la phet ïap na kata ka thma, bad shibun na uta u paidbah ki la kyllon bad ki la ïap: u Saul ruh bad u Jonathan u khun jong u ki la ïap noh.”

⁵ Bad u Dabid u la kylli ïa uta u samla uba ïathuh ha u, “Kumno me tip ba ki la ïap u Saul bad u Jonathan u khun jong u?”

⁶ Te uta u samla uba ïathuh ha u, u la ong, “Ka la jia ba nga don ha u lum Gilboa, te ha khmih, u Saul u la shaniah ha la u sum; ha khmih ruh, ki kali ïapom bad ki nongshong kulai ki ïabeh eh nadien jong u.

⁷ Te haba u la khmih shadien, u la ïohi ïa nga, bad u la khot ïa nga. Nga ruh nga la ong, ‘Nga hangne.’

⁸ Bad u la kylli ïa nga, ‘Me uei?’ Te nga la ïathuh ha u, ‘Nga u nong Amalek.’

⁹ Te u la ong pat ha nga, ‘Nga kyrpad ïa me, to ïeng hajan jong nga, bad pynïap ïa nga, naba ka jingpisa ka la ngat ha nga; namar ba ka jingim jong nga baroh ka dang sah ha nga.’

¹⁰ Kumta, nga la ïeng hajan jong u, bad nga la pynïap ïa u, naba nga la tip skhem ba um lah im shuh haba u la kyllon; bad nga la shim ïa kata ka pansngiat kaba ha ka khlieh jong u, bad ïa kata ka tad tyrpeng kaba ha ka ksang'ti jong u, bad nga la wallam ïa ki shane ha u kynrad jong nga.”

¹¹ Ynda kumta, u Dabid u la bat ïa la ki jaiñ, bad u la kad ïa ki; bad kumjuh uta paidbah baroh uba bad u.

¹² Bad ki la sngewsih, bad ki la ïam, bad ki la shah jingit haduh janmiet, namar u Saul, bad namar u Jonathan u khun jong u, bad namar u paidbah jong U Trai, bad namar ka ïing Israel; namar ba ki la hap da ka waitlam.

¹³ Te u Dabid u la ong ha uta u samla uba la ïathuh ha u, “Me uba nangno?” U te u la ïathuh, “Nga u khun u nongwei, u nong Amalek.”

¹⁴ U Dabid te u la ong ha u, “Kumno ba mem shym la sheptieng ban rah ïa la ka kti ïa ka ban pynjot noh ïa uba la sleh jong U Trai?”

¹⁵ Bad u Dabid u la khot ïa uwei na kita ki samla, bad u la ong, “To leit hajan, to ktah kti ïa u.” U te u la shoh ïa u ba u la ïap noh.

¹⁶ U Dabid te u la ong ha u, “To ka snam jong me kan long halor ka khlieh jong me; naba ka shyntur jong me hi ka la phla sakhi pyrshah ïa me, ka la ong, ‘Nga la pynïap ïa uba la sleh jong U Trai.’ ”

Ka jingrwai sngewsynei u Dabid

¹⁷ Bad u Dabid u la rwai da kane ka jingrwai sngewsynei namar u Saul bad namar u Jonathan u khun jong u:

¹⁸ u la hukum ruh ban hikai ha ki khun Judah ïa ka jingrwai ka ryntieh: ha khmih, la thoh ïa ka ha Ka Kitab u Jasher:

¹⁹ “Ïa ka burom jong me, ko Israel, la pynïap ha ki jaka bajrong jong me! kumno ki la kyllon kiba khlaiñ bor.

²⁰ To wat ïathuh ïa kane ha Gath, wat pynbna ha ki lynti shnong ka Ashkelon; ïoh kin kmen ki khun kynthei ki Philistia, ïoh kin kyrkoh ki khun kynthei jong kita ïa ki bym shym la otsher.

²¹ “A phi ki lum Gilboa, to wat ai kin long halor jong phi ka umjer lymne u slap, lymne ki lyngkha ki jingainguh: namar hangta la bred noh ïa ki stieh jong kiba khlaiñ bor, ka stieh u Saul, bym shym la pynsleh da ka umphniang.

²² “Na ka snam jong kita ïa kiba la pynïap, na ka khleiñ jong kiba khlaiñ bor, ka ryntieh u Jonathan kam shym la phai dien, bad ka waitlam u Saul kam shym la phai noh suda.

²³ “U Saul bad u Jonathan ki la long kiba ieit bad kiba sngewtynnad katba ki dang im, bad ha ka jingïap jong ki ym shym la pynkhlad ïa ki; ki la long kham stet ban ïa ki pukni, ki la kham khlaiñ ban ïa ki sing keiñ.

²⁴ “Phi ki khun kynthei Israel, to ïam namar u Saul, uba pynkup ïa phi da ki jaiñ saw kiba kordor, uba pyndeng da ki jingdeng ksiar halor ki jaiñkup jong phi.

²⁵ “Kumno ki la kyllon kiba khlaiñ bor hapdeng ka thma! “Ïa u Jonathan la pynïap ha ki jaka bajrong jong me.

²⁶ Nga khuslai sat namar jong me, ko Jonathan, u para jong nga: nga la sngewtynnad eh ïa me: ka jingieit jong me ïa nga ka la long kaba phylla, kaba palat ïa ka jingieit ki kynthei keiñ.

²⁷ “Kumno ki la kyllon kiba khlaiñ bor, bad ba la jot noh kita ki atiar ïapom!”