2 KHRONIKL 9 - KA BAIBL

Ka syiem Sheba ka wan jngoh ïa u Solomon

¹ Te haba ka syiem Sheba ka la ïohsngew ïa ka nam u Solomon, ka la wan ban tynjuh ïa u Solomon da ki jingkylli ba-eh ha Jerusalem, bad shibun bah ki nongbud, bad ki ut kiba la kit ki masla, bad ka ksiar shibun, bad ki mawkordor: te haba ka la poi ha u Solomon, ka la ïakren bad u shaphang baroh kaba la don ha ka dohnud jong ka.

² Te u Solomon u la ïathuh ha ka, ïa ki jingkylli jong ka baroh: bad ym shym la don kano kano kaba rieh na u Solomon ïa kaba um shym la ïathuh ha ka.

³ Te haba ka syiem Sheba ka la lah ïohi ïa ka jingstad u Solomon, bad ïa ka ïing ïa kaba u la lah tei,

⁴ bad ïa ka jingbam ha ka miej jong u, bad kaba shong ki shakri jong u, bad kaba ïeng ki myntri jong u, bad ki jingriam jong ki, bad ïa ki nongrah khuri jong u ruh, bad ïa ki jingriam jong ki; bad ïa ka lynti jong u da kaba u leit kiew sha ka ïing U Trai; ym don mynsiem shuh ha ka.

⁵ Te ka la ong ha u syiem, “Ka long ka jingbna bashisha kaba nga la ïohsngew ha la ka ri hi shaphang ki kam jong me, bad ka jingstad jong me.

⁶ Hynrei, ngam shym la ngeit ïa ki ktien jong ki, tad ynda nga la wan, bad ki khmat jong nga ki la ïohi ïa ka: te ha khmih, kaba shiteng ruh na ka jingkhraw ka jingstad jong me ym shym la ïathuh ïa nga: me palat ïa ka nam kaba nga la ïohsngew.

⁷ Suk ki briew jong me, bad suk kine ki shakri jong me, kiba ïeng ha la ka sngi ha khmat jong me, bad kiba ïohsngew ïa ka jingstad jong me.

⁸ Long ba la kyrkhu ïa U Trai U Blei jong me, uba la ieit ïa me, ban buh ïa me halor ka khet jong u, ban long syiem na ka bynta U Trai U Blei jong me: namar ba U Blei jong me u la ieit ïa ki Israel, ban pynskhem ïa ki ha la ka rta, namar kata, u la pynlong ïa me u syiem halor jong ki, ban leh ïa ka jingbishar bad ïa ka hok.”

⁹ Te ka la ai ïa u syiem shispah arphew talent ka ksiar, bad ki masla shikatdei eh, bad ki mawkordor: lymne ym ju don kum uta u masla kum uba ka syiem Sheba ka la ai ha u syiem Solomon.

¹⁰ Bad ki shakri u Huram ruh, bad ki shakri u Solomon, kiba la wallam ka ksiar na Ophir, ki la wallam ki dieng Algum bad ki mawkordor.

¹¹ Te u syiem u la thaw na kita ki dieng Algum, ki rynsan ïa ka ïing U Trai bad ïa ka ïing u syiem, bad ïa ki duitara bad ki nebel ïa ki nongrwai: bad ym shym la ïohi kum kita mynshuwa ha ka ri Judah.

¹² Te u syiem Solomon u la ai ha ka syiem Sheba ïa ka jingkwah jong ka baroh, ïa kaei kaei kat kaba ka la pan, nalor kata kaba ka la lah wallam ha u syiem. Kumta, ka la leit wan noh, bad ka la leit sha la ka ri, ma ka bad ki shakri jong ka.

Ka spah ba ka burom u Solomon

¹³ Te ka jingkhia ka ksiar kaba la wan ha u Solomon shi snem ka la long hynriewspah hynriewphew hynriew talent ksiar;

¹⁴ nalor kata kaba ki nongkhaïi bad ki mahajon ki la wallam: bad baroh ki syiem ka Arabia bad ki lyngskor jong ka ri ki la wallam ka ksiar bad ka rupa ha u Solomon.

¹⁵ Te u syiem Solomon u la thaw arspah ki 'tiehbah da ka ksiar ba shu shoh; hynriewspah shekel ka ksiar ba shu shoh ka la leit ha kawei ka 'tiehbah.

¹⁶ Te u la thaw laispah ki stieh da ka ksiar ba shu shoh; laispah shekel ka ksiar ka la leit ha kawei ka stieh: te u syiem u la buh ïa ki ha ka ïing jong ka khlaw Lebanon.

¹⁷ Nalor kata, u syiem u la thaw ka khet bniat hati kaba khraw, bad u la suit ïa ka, da ka ksiar banylla.

¹⁸ Bad kata ka khet ka la don hynriew kyrdan, bad ka jingïuh kjat ksiar, ïa kiba la pyndait ha ka khet, bad ki jingshan baroh ar liang hajan ka jaka shong, bad ar tylli ki sing kiba ïeng hajan ki jingshan.

¹⁹ Bad khat-ar ki sing ki la ïeng hangta baroh ar liang halor ki hynriew kyrdan: ym ju thaw kum kata ha kano kano ka hima.

²⁰ Bad baroh ki khuri dih u syiem Solomon, ki la long da ka ksiar; bad baroh ki khiew ki pliang jong ka ïing jong ka khlaw Lebanon, ki la long da ka ksiar nylla: ïa ka rupa ym shym ñiewkor ei ei ha ki sngi u Solomon.

²¹ Naba u syiem u la don ki lieng kiba leit sha Tarshish bad ki shakri u Huram: shi sien ha ka lai snem ki lieng Tarshish ki ju wan, kiba wallam ksiar, bad rupa, ka bniat hati, bad ki huleng, bad ki klew.

²² Kumta, u syiem Solomon u la palat ïa ki syiem baroh jong ka khyndew ha ka spah bad ka jingstad.

²³ Te baroh ki syiem jong ka pyrthei, ki la wad ïa ka khmat u Solomon, ban ïohsngew ïa ka jingstad jong u, ïa kaba U Blei u la buh ha ka dohnud jong u.

²⁴ Te ki la ïawallam u briew baroh la ka jingai sngewbha, ki pliang rupa, bad ki pliang ksiar, bad ka jaiñkup, ka jingkieng atiar, bad ki masla, ki kulai, bad ki khashor, da ka jingkheiñ man la ka snem.

²⁵ Te u Solomon u la don saw hajar ki pulit ïa ki kulai bad ki kali ïapom, bad khat-ar hajar ki nongshong kulai, ïa kiba u la buh ha ki shnong ri kali, bad lem bad u syiem ha Jerusalem.

²⁶ Te u la synshar halor ki syiem baroh naduh ka Wah jin haduh ka ri ki Philistia, bad haduh rud Ijipt.

²⁷ Te u syiem u la pynlong ïa ka rupa ha Jerusalem kum ki maw, bad ïa ki dieng Kedar u la pynlong kum ki dieng Dumbur kiba ha ka ri them, namar ba bun eh.

²⁸ Te ki la wallam kulai ïa u Solomon na ka ri Ijipt, bad na ki ri baroh.

Ka jingïap u Solomon

²⁹ Te kiba dang sah na ki kam u Solomon, ki banyngkong bad bakhatduh, hato ym shym la thoh ïa ki ha Ka Jingïathuh u Nathan u nongïathuhlypa, bad ha Ka Jingïathuhlypa u Ahijah u nong Shilon, bad ha Ki Jingithuhpaw u Iddo u nongïohi shaphang u Jeroboam u khun u Nebat?

³⁰ Te u Solomon u la synshar ha Jerusalem halor ki Israel baroh, sawphew snem.

³¹ Te u Solomon u la thiah bad la ki kpa, bad la tep ïa u ha ka shnong u Dabid u kpa jong u: bad u Rehoboam u khun jong u, u la synshar ha ka jaka jong u.