2 KHRONIKL 8 - KA BAIBL

Kiwei kiwei pat ki kam jong u Solomon

¹ Te ha ka bakut arphew snem, ha kaba u Solomon u la lah tei ïa ka ïing U Trai, bad ïa la ka jong ka ïing,

² ïa ki shnong ïa kiba u Huram u la lah ai ha u Solomon, u Solomon u la tei ïa ki, bad u la pynshong ïa ki khun Israel ha ki.

³ Bad u Solomon u la leit sha Hamath-sobah, bad u la jop ïa ka.

⁴ Bad u la tei ïa ka Tadmor ha ka ri khlaw, bad ïa ki shnong jingkynshew baroh, ïa kiba u la tei ha Hamath.

⁵ U la tei ruh ïa ka Beth-horon ba haneng, bad ïa ka Beth-horon ba harum, ki nongbah ba la ker kut da ki kynroh, ki khyrdop, bad ki dieng jingkhang;

⁶ bad ïa ka Baalath, bad ïa ki nongbah jingkynshew baroh kiba u Solomon u la don, bad ïa ki nongbah baroh ïa ki kali jong u, bad ïa ki nongbah baroh ïa ki nongshong kulai jong u, bad ïa baroh ba u Solomon u la kwah ban tei sngewbha ha Jerusalem, bad ha Lebanon, bad ha ka ri baroh ka jingsynshar jong u.

⁷ Shaphang kita ki briew baroh ïa kiba la pynsah na ki Hit, bad ki Amor, bad ki Peris, bad ki Hib, bad ki Jebus, ki bymlong na Israel;

⁸ na ki khun jong ki, kiba la sah hadien jong ki ha ka ri, ïa kiba ki khun Israel kim shym la pynduh noh, na kine, u Solomon u la pynmih ki khar paid kum ki mraw, haduh kane ka sngi.

⁹ Hynrei, na ki khun Israel, u Solomon um shym la pynlong shakri ïa ka jingtrei jong u; hynrei, ki la long ki nongïapom, bad ki rangbah jong ki kaptan jong u, bad ki rangbah ki kali jong u bad jong ki nongshong kulai jong u.

¹⁰ Te kine ki la long ki shakri rangbah u syiem Solomon, arspah sanphew keiñ, kiba la synshar halor ki paidbah.

¹¹ Te u Solomon u la wallam ïa ka khun u Pharaoh na ka nongbah u Dabid sha ka ïing ba u la tei na ka bynta jong ka: namar u la ong, “Ka tnga jong nga kan ym shong ha ka ïing jong u Dabid u syiem ki Israel, namar kita ki jaka ki long ki bakyntang, ha kiba ka synduk ka jutang jong U Trai ka la wan.”

¹² Ynda kumta, u Solomon u la ainguh ki jingainguh thang ha U Trai halor ka duwan U Trai, ïa kaba u la tei ha khmat kata ka batsha,

¹³ kumba ka dei ka kam jong kawei kawei ka sngi, u da ainguh katba kum ka hukum u Moses, ha ki Sabbaton, bad ha ki bnai bathymmai, bad ha Ki Jingkhawai Niam ba la buh, lai sien shi snem, ha Ka Jingkhawai Niam U Kpu Bakhlem Thiat, bad ha Ka Jingkhawai Niam Ki Taïew, bad ha Ka Jingkhawai Niam Ki Ïingtrep.

¹⁴ Te u la buh, katba kum ka hukum u Dabid u kpa jong u, ïa ki jingkylliang sngi jong ki lyngdoh, ïa ka jingshakri jong ki, bad ïa ki Lebi ha ki jingsumar jong ki, ban ïaroh, bad ban shakri ha khmat ki lyngdoh, kumba ka dei ka kam kawei kawei ka sngi: ïa ki nongsumar jingkhang ruh ha la ki jingkylliang sngi ha ka khyrdop baroh: naba kumta u Dabid u briew jong U Blei u la hukum.

¹⁵ Te kim shym la kynriah noh na ka hukum jong u syiem ïa ki lyngdoh bad ki Lebi shaphang kano kano ka kam, lane shaphang ki jingkynshew.

¹⁶ Te ïa ka kam u Solomon baroh la khreh haduh ka sngi ka jingpynshong nongrim ïa ka ïing U Trai, bad tad ynda la pyndep ïa ka. Kumta, ïa ka ïing U Trai la pynjanai.

¹⁷ Hadien kata, u Solomon u la leit sha Esion-geber, bad sha Eloth, harud duriaw ha ka ri Edom.

¹⁸ Bad u Huram u la phah ïa u ki lieng, bad ki shakri kiba nang shaphang ka duriaw, da ki kti ki shakri jong u; te ki la wan bad ki shakri u Solomon sha Ophir, bad ki la wallam nangta sawspah sanphew talent ka ksiar, bad ki la wallam ïa ki ha u syiem Solomon.