2 KHRONIKL 7 - KA BAIBL

¹ Te haba u Solomon u la lah pynkut ïa kaba duwai, ka ding ka la hiar na bneng, bad ka la bam duh ïa ka jingainguh thang bad ïa ki jingkñia; bad ka burom U Trai ka la pyndap ïa ka ïing.

² Te ki lyngdoh kim lah ban rung hapoh ka ïing U Trai, namar ka burom U Trai ka la pyndap ïa ka ïing U Trai.

³ Te baroh ki khun Israel ki la ïakhmih, haba ka ding ka la hiar, bad ba ka burom U Trai ka la long halor ka ïing; bad ki la dem ngon la ki khmat ha ka khyndew halor ka jingsiang, bad ki la mane, bad ki la ainguh ha U Trai, ki ïa-ong, “Namar u long u babha; namar ka jingisynei jong u ka neh ha la ka rta.”

⁴ Hadien kata, u syiem bad u paidbah baroh, ki la ainguh ka jingkñia ha khmat U Trai.

⁵ Te u syiem Solomon u la ai ka jingkñia arphew ar hajar ki masi dab, bad shispah arphew hajar ki langbrot. Kumta, u syiem bad ki paidbah baroh, ki la pynkyntang ïa ka ïing U Blei.

⁶ Te ki lyngdoh ki la ïeng, katba kum ki kam jong ki; ki Lebi ruh bad ki tiar rwai jong U Trai, ïa kiba u syiem Dabid u la lah thaw ban ainguh ha U Trai, namar ka jingisynei jong u ka neh ha la ka rta, haba u Dabid u la ïaroh da ka jingshakri jong ki: te ki lyngdoh ki la put turoi ha khmat jong ki; te ki Israel baroh ki la ïeng.

⁷ Nalor kata, u Solomon u la pynkyntang ïa ka pdeng jong ka phyllaw kaba la don ha khmat ka ïing U Trai; namar hangta u la ainguh ïa ka jingainguh thang, bad ïa ka khleiñ jong ki jingainguh bapynïasuk: namar ka duwan rnong ïa kaba u Solomon u la lah thaw kam lah ban ngiam ïa ka jingainguh thang, bad ïa ka jingainguh bam, bad ïa ka khleiñ.

⁸ Kumta, u Solomon u la rakhe ïa Ka Jingkhawai Niam ha kata ka por, hynñiew sngi, bad ki Israel baroh lem bad u, ka jingïalang bakhraw eh, naduh ka jingbsut sha Hamath haduh ka wah rit jong ka Ijipt.

⁹ Te ha ka sngi ka baphra ki la pynlong ka jingïaseng bakyntang: namar ki la rakhe ïa ka jingpynkyntang ïa ka duwan, hynñiew sngi, bad ïa Ka Jingkhawai Niam, hynñiew sngi.

¹⁰ Te ha ka ba-arphew lai ka sngi jong u bnai u bahynñiew, u la phah noh ïa ki paidbah sha ki ïingjaiñ jong ki, ba la kmen bad ba la sngewbha la ka dohnud namar ka jingbha ïa kaba U Trai u la lah leh ha u Dabid, bad ha u Solomon, bad ha ki Israel ki briew jong U.

U Trai U mihpaw ka ba-ar sien ha u Solomon

¹¹ Kumne u Solomon u la pyndep ïa ka ïing U Trai, bad ïa ka ïingsyiem: bad baroh kaba la poi ha ka dohnud u Solomon ban thaw hapoh ka ïing U Trai, bad hapoh ka ïing jong u hi, u la thaw bha.

¹² Te U Trai u la paw ha u Solomon mynmiet, bad u la ong ha u, “Nga la ïohsngew ïa ka jingduwai jong me, bad nga la jied ïa kane ka jaka ha lade ban long ka ïing jingkñia.

¹³ Lada nga khang khop ïa ka bneng ba yn ym don slap, lane lada nga hukum ïa u puit ban bam duh ïa ka ri, lane lada nga phah ïa ka ïapkhlam hapdeng ki briew jong nga;

¹⁴ lada ki briew jong nga, ïa kiba la khot da ka kyrteng jong nga, kin pynrit ïa lade, bad kin duwai, bad kin wad ïa ka khmat jong nga, bad kin phai noh na ki lynti bymman jong ki; kumta te ngan sngew na bneng, bad ngan map ïa ki pop jong ki, bad ngan pynkhiah ïa ka ri jong ki.

¹⁵ Te ki khmat jong nga kin peit, bad ki shkor jong nga kin sngap ha ka jingduwai ka ban pynlong ha kane ka jaka.

¹⁶ Namar mynta nga la jied bad nga la pynkyntang kyntang ïa kane ka ïing, ba ka kyrteng jong nga ka lah ban long hangta ha la ka rta: bad ki khmat jong nga bad ka dohnud jong nga kin long hangta junom.

¹⁷ Te shaphang jong me, lada men ïaid ha khmat jong nga kumba u Dabid u kpa jong me u la ïaid, bad men leh ïa baroh kat kaba nga la hukum ïa me, bad men sumar ïa ki aiñ jong nga bad ïa ki jingbishar jong nga;

¹⁸ nga te ngan pynskhem ïa ka khet ka hima jong me, kumba nga la teh jutang bad u Dabid u kpa jong me, nga da ong, ‘Yn ym duh u briew ïa me ban long nongsynshar ha Israel.’

¹⁹ “Hynrei, lada phi phai lyndet, bad phin iehnoh ïa ki aiñ jong nga bad ïa ki hukum jong nga ïa kiba nga la buh ha khmat jong phi, bad phin leit shakri ïa kiwei pat ki blei, bad mane ïa ki:

²⁰ hangta te ngan rat noh ïa ki naduh tynrai, na ka ri jong nga ïa kaba nga la ai ha ki; bad ïa kane ka ïing, ïa kaba nga la pynkyntang ïa ka kyrteng jong nga, ngan kyntait noh na khmat jong nga, bad ngan pynlong ïa ka jingkynnohbeiñ bad ka jingkynshi hapdeng ki kynja bynriew baroh.

²¹ Bad ïa kane ka ïing, kaba jrong katta katta, uwei uwei baroh uba ïaid lait ïa ka un kyndit thred, bad un ong, ‘Balei U Trai u la leh kumne ïa kane ka ri, bad ïa kane ka ïing?’

²² Te kin ïathuh, ‘Namar ba ki la lyndet ïa U Trai, U Blei ki kpa jong ki, uba la wallam noh ïa ki na ka ri Ijipt, bad ki la bat ïa kiwei pat ki blei, bad ki la mane ïa ki, bad ki la shakri ïa ki: namar kata keiñ, u la wallam ïa kane ka jingsniew baroh halor jong ki.’ ”