2 KHRONIKL 6 - KA BAIBL

Ka jingpynkyntang ïa ka templ

¹ Ynda kumta, u Solomon u la kren, “U Trai u la ong ba un shong ha ka jingdum batliw tliw.

² Hynrei, nga la tei ka ïing ïa me ban shong, bad ka jaka ïa me ban shong junom.”

³ Bad u Syiem u la phai la ka khmat, bad u la kyrkhu ïa u paidbah Israel baroh: bad u paidbah Israel baroh u ïeng.

⁴ Bad u la ong, “Long ba la kyrkhu ïa U Trai, U Blei ki Israel, uba la kren da la ka shyntur ha u Dabid u kpa jong nga, bad da la ka kti u la pyndep ïa ka, u da ong,

⁵ ‘Naduh kata ka sngi ba nga la wallam noh ïa u paidbah jong nga na ka ri Ijipt, ngam shym la jied ïa kano kano ka nongbah na ki jaid Israel baroh ban tei ïing ha ka, ba ka kyrteng jong nga kan ïoh long hangta; lymne ngam shym la jied ïa uno uno u briew ban long u nongïalam halor ki briew jong nga ki Israel:

⁶ hynrei, nga la jied ïa ka Jerusalem, ba ka kyrteng jong nga kan ïoh long hangta: bad nga la jied ïa u Dabid ban long halor u paidbah jong nga ki Israel.’ ”

⁷ Te ka la don ha ka dohnud u Dabid u kpa jong nga ban tei ka ïing ïa ka kyrteng U Trai U Blei ki Israel.

⁸ Hynrei, U Trai u la ong ha u Dabid u kpa jong nga, “Kumba ka la don ha ka dohnud jong me ban tei ka ïing ïa ka kyrteng jong nga, me la leh bha keiñ ba kane ka la don ha ka dohnud jong me:

⁹ la kumta ruh, men ym tei ïa kata ka ïing; hynrei, u khun jong me u ban sa mih noh na ka syngkai jong me, uta un tei ka ïing ïa ka kyrteng jong nga.”

¹⁰ Bad U Trai u la pyndep ïa la ka ktien ba u la kren: namar nga la ïeng ha ka jaka u Dabid u kpa jong nga, bad nga shong ha ka khet Israel, kumba U Trai u la kular, bad nga la tei ïa kata ka ïing ïa ka kyrteng U Trai, U Blei ki Israel.

¹¹ Bad hangta nga la buh ïa ka synduk, ha kaba don ka jutang U Trai, ïa kaba u la pynlong bad ki khun Israel.

¹² Te u la ïeng ha khmat ka duwan U Trai ha khmat u paidbah Israel baroh, bad u la rah la ki kti:

¹³ (naba u Solomon u la shna ka rynsan rnong, ka lynter, san pruh, bad ka pyngkiang, san pruh, bad ka jingjrong, lai pruh, bad u la pynïeng ïa ka hapdeng ka phyllaw; bad u la ïeng halor jong ka, bad u la dem khohsiew ha khmat u paidbah Israel baroh, bad u la rah la ki kti sha bneng:)

¹⁴ bad u la ong, “A Trai, U Blei ki Israel, ym don U Blei uba kat ma me, ha bneng, lane ha ka khyndew; uba sumar ïa ka jutang bad ka jingisynei bad la ki shakri, kiba ïaid ha khmat jong me da ka dohnud jong ki baroh;

¹⁵ uba la sumar bad u shakri jong me u Dabid u kpa jong nga ïa kata kaba me la kular ha u; shisha, me la kren da la ka shyntur, bad me la pyndep ïa ka da la ka kti, kumba ka long ha kane ka sngi.

¹⁶ Namar kata te, A Trai, U Blei ki Israel, to sumar ïa kata kaba me la kular bad u shakri jong me u Dabid u kpa jong nga, me da ong, ‘Kan ym duh briew ïa me ha khmat jong nga ban shong halor ka khet Israel; tangba ki khun jong me kin sumar la ka ïaid ka ïeng, ban ïaid ha ka hukum jong nga, kumba me ruh, me la ïaid ha khmat jong nga.’

¹⁷ Te namar kata, A Trai, U Blei ki Israel, ai ba yn pynshisha ïa ka ktien jong me ïa kaba me la kren ha u Dabid u shakri jong me.

¹⁸ “Hynrei, shisha shisha U Blei un shong sah ma bad ki briew ha ka khyndew? Ha khmih, ka bneng bad ka bneng jong ki bneng kam lah ban kynthup ïa me; sa ine i ïing lei lei iba nga la tei!

¹⁹ La kumta ruh, to khmih ïa ka jingduwai u shakri jong me, bad ïa ka jingkyrpad jong u, A Trai U Blei jong nga, ban shahshkor ïa ka jingpyrta bad ka jingduwai kaba u shakri jong me u duwai ha khmat jong me:

²⁰ ba ki khmat jong me kin peit sha kane ka ïing mynsngi bad mynmiet, sha ka jaka ïa kaba me la ong ba men buh la ka kyrteng hangta; ban sngap ïa ka jingduwai ba u shakri jong me un duwai sha kane ka jaka.

²¹ Bad to sngap ïa ki jingkyrpad u shakri jong me, bad ki jong ki briew jong me ki Israel, haba kin duwai sha kane ka jaka: shisha, to sngap ma me na ka jaka shong jong me, na bneng hi keiñ; bad haba me sngew, to map.

²² “Lada u briew u leh pop ïa la u paramarjan, bad ba la buh ka jingsmai halor jong u ïa ka ban pynsmai ïa u, bad u wan ban smai ha khmat ka duwan jong me ha kane ka ïing,

²³ ynda kumta, to sngap ma me na bneng, bad to leh, bad to bishar ïa la ki shakri, da pynhiar kput ïa u bymman, ban pynhap ïa ka lynti jong u halor ka khlieh jong u; bad da pynksan ïa u bahok, ban ai ha u katba kum ka hok jong u.

²⁴ “Bad lada la shoh jop ïa ki Israel ki briew jong me ha khmat u nongshun, namar ba ki la leh pop ïa me; bad ba kin phai pat bad ba kin phla ïa ka kyrteng jong me, bad ba kin duwai bad kin kyrpad ha khmat jong me ha kane ka ïing:

²⁵ te to sngap ma me na bneng, bad to map ïa ka pop ki briew jong me ki Israel, bad to wallam pat ïa ki sha ka ri kaba me la ai ha ki bad ha ki kpa jong ki.

²⁶ “Haba la set khop ïa ka bneng, bad ym hap slap shuh, namar ba ki la leh pop ïa me; lada ki duwai sha kane ka jaka, bad ki phla ïa ka kyrteng jong me, bad ki kylla na la ka pop, haba me pynshitom ïa ki:

²⁷ te to sngap ma me na bneng, bad to map ïa ka pop ki shakri jong me, bad ïa ka jong ki briew jong me ki Israel, haba me hikai ïa ki, ïa ka lynti babha ha kaba ki dei ban ïaid; bad to phah ïa u slap ha la ka ri, kaba me la ai ha la ki briew ban long ka ri kynti.

²⁸ “Lada jia 'nemsniew ha ka ri, lada jia ka jingïapkhlam, lada jia kaba ïap-ïong lane kaba bthuh, u puit kluiñ lane u puit khlam; lada ki nongshun jong ki, ki ker kut ïa ki ha ka ri ki khyrdop jong ki; la kano kano ka jingïapthem lane kano kano ka jingpang kaba don;

²⁹ kano kano ka jingduwai bad ka jingkyrpad ba pynlong da uno uno u briew, lane da ki briew jong me baroh ki Israel, uba tip marwei marwei ïa la ka jong ka jingshitom bad la ka jong ka jingsngewsih, bad un kner la ki kti sha kane ka ïing:

³⁰ te to sngap ma me na bneng ka jaka shong jong me, bad to map, bad ai ha uwei uwei baroh katba kum ki lynti jong u baroh, uba ka dohnud jong u me tip; (namar ma me, tang ma me hi, me ithuh ïa ki dohnud ki khun bynriew;)

³¹ ba kin dup sheptieng ïa me, ban ïaid ha ki lynti jong me, katba ki dang im ha ka ri kaba me la ai ha ki kpa jong ngi.

³² “Shaphang u nongwei ruh, u bymlong na ki briew jong me ki Israel, haba u wan na ka ri kaba jngai na ka bynta ka kyrteng bakhraw jong me, bad ka kti badonbor jong me, bad ka ksang'ti ba la kner jong me; haba kin wan duwai sha kane ka ïing:

³³ te to sngap ma me na bneng, na ka jaka shong jong me keiñ, bad to leh baroh katba kum ka jingkyrpad uta u nongwei ha me; ba ki kynja bynriew ka khyndew baroh kin tip ïa ka kyrteng jong me, bad kin sheptieng ïa me, kumba leh ki briew jong me ki Israel, bad ba kin tip ba ïa kane ka ïing ba nga la tei, la khot da ka kyrteng jong me.

³⁴ “Lada ki briew jong me ki leit ïaleh thma ïa ki nongshun jong ki, da kano kano ka lynti ba men phah ïa ki, bad kin duwai ha me sha kane ka shnong kaba me la jied, bad sha ka ïing kaba nga la tei ïa ka kyrteng jong me:

³⁵ te to sngap ma me na bneng ïa ka jingduwai jong ki, bad ïa ka jingkyrpad jong ki, bad to pynïeng ïa ka hok jong ki.

³⁶ “Lada ki leh pop ïa me, (naba ym don u bym ju leh pop,) bad me bitar ïa ki, bad me ai noh ïa ki ha u nongshun, haduh ba u ring mraw ïa ki sha ka ri kaba jngai eh lane kaba jan;

³⁷ pynban, lada kin pyrkhat ïa lade ha kata ka ri sha kaba la ring mraw ïa ki, bad ki phai pat, bad kin kyrpad ha me ha ka ri ka jinglongmraw jong ki, ki ïa-ong, ‘Ngi la leh pop, ngi la leh mutlop eh, bad ngi la leh bymman;’

³⁸ lada kin phai sha me da la ka dohnud baroh bad da la ka mynsiem baroh ha ka ri ka jinglongmraw jong ki, sha kaba ki la ring mraw ïa ki, bad ki duwai sha la ka ri, ïa kaba me la ai ha ki kpa jong ki, bad kane ka nongbah ïa kaba me la jied, bad sha kane ka ïing ïa kaba nga la tei ïa ka kyrteng jong me:

³⁹ te to sngap ma me na bneng, na ka jaka shong jong me keiñ, ïa ka jingduwai jong ki bad ïa ki jingkyrpad jong ki, bad to pynïeng ïa ka hok jong ki: bad to map ïa ki briew jong me kiba la leh pop ïa me.

⁴⁰ Mynta, A U Blei jong nga, nga kyrpad ïa me, to peit la ki khmat, bad to pynshah la ki shkor ha ki jingduwai ba la pynlong ha kane ka jaka.

⁴¹ “Namar kata te, to ïeng, A Trai U Blei, sha ka jaka shongthait jong me, ma me, bad ka synduk ka bor jong me: A Trai U Blei, ai ban pynkup ïa ki lyngdoh jong me da ka jingpynim, bad to ki riewkhuid jong me kin leh kmen ha ka jingbha.

⁴² A Trai U Blei, wat pynphai noh ïa ka khmat jong uba la sleh jong me: to kynmaw ïa ki jingisynei u Dabid u shakri jong me.”