2 KHRONIKL 5 - KA BAIBL

¹ Kumta, ka kam baroh ba u Solomon u la leh ïa ka ïing U Trai ka la dep. Bad u Solomon u la wallam shapoh ïa kiei kiei kiba u Dabid u kpa jong u, u la pynkyntang; ïa ka rupa, bad ïa ka ksiar, bad ïa ki kynja pliang baroh keiñ, bad u la buh ïa ki ha ki jaka kynshew ka ïing U Blei.

U Solomon u wallam ïa Ka Synduk Ka Jutang sha ka templ

² Ynda kumta, u Solomon u la ïalum lang ïa ki tymmen basan ki Israel bad ïa ki nongïalam jong ki jaid, ïa ki rangbah ki ïing ki kpa ki khun Israel, ha Jerusalem, ban wallam artet ïa ka synduk ka jutang U Trai na ka shnong u Dabid, kaba long ka Seïon.

³ Bad ki paidbah Israel baroh ki la ïalum lang ha u syiem ha ka jingkhawai, kaba la long ha u bnai u bahynñiew.

⁴ Bad baroh ki tymmen basan ki Israel ki la wan, bad ki Lebi ki la bah ïa ka synduk.

⁵ Bad ki la wallam artet ïa ka synduk, bad ïa Ka Ïingjaiñ Ka Jingïaseng, bad ïa ki kynja pliang bakhuid baroh kiba ha kata ka ïingjaiñ; ïa kine, ki lyngdoh ki Lebi ki la wallam artet.

⁶ Bad u syiem Solomon bad ki paidlang Israel baroh, kiba la ïalum lang ha u, ki la don ha khmat ka synduk, ki da ïakñia langbrot bad masi dab, ki bym lah ong lane ñiew ba bun than eh.

⁷ Bad ki lyngdoh ki la wallam ïa ka synduk ka jutang U Trai sha la ka jaka, hapoh ka orakl jong ka ïing, ha ka jaka kyntang tam, hapoh ki thapniang ki Kherub keiñ.

⁸ Naba ki Kherub ki pyiar ïa la ki thapniang halor ka jaka ka synduk bad ki Kherub ki la tap ïa kata ka synduk bad ïa ki dieng jingbah jong ka nalor.

⁹ Bad kita ki dieng jingbah ki long kiba jrong ba lah ban ïohi ïa ki tduh jong kita ki dieng jingbah na ka synduk ha khmat ka orakl; hynrei, ym ïohi ïa ki na shabar: bad hangta ka don, haduh kane ka sngi.

¹⁰ Ym don ei ei hapoh ka synduk nalor ki ar tylli ki maw lyngkniap kiba u Moses u la buh hangta ha Horeb, mynba U Trai u la pynlong ka jutang bad ki khun Israel, haba ki la mih noh na Ijipt.

¹¹ Te haba ki lyngdoh ki la mih noh na ka jaka kyntang, (naba ki lyngdoh baroh kiba la don hangta, ki la lah pynkyntang ïa lade, bad kim shym la sumar la ki jingïakylliang jong ki.

¹² Ki Lebi ruh kiba la long ki nongrwai, baroh na ki, u Asaph, u Heman, u Jeduthun, bad ki khun jong ki bad ki para jong ki keiñ, ki la kup da ka jaiñ linen bani, bad ki ksing padiah bad ki nebel bad ki duitara, ki la ïeng ha ki dong kaba shaphang mihngi jong ka duwan, bad ryngkat bad ki shispah arphew ngut ki lyngdoh kiba put ronsing:)

¹³ te haba ki nongput ronsing bad kiba rwai ki la ïalong kum kawei, ban pynsngew tang kawei ka jingsawa ha kaba ïaroh bad kaba ainguh ha U Trai; bad haba ki la pynjam ïa la ka jingkynud da ki ronsing bad ki ksing padiah bad ki tiar rwai, bad ba ki la ïaroh ïa U Trai, ki ïa-ong: “Naba u long u babha; naba ka jingisynei jong u ka neh junom:” Hangta te ïa ka ïing la pyndap da u lyoh, ïa ka ïing U Trai keiñ.

¹⁴ Katba ki lyngdoh kim lah ïeng shuh ban shakri namar uta u lyoh: naba ka burom U Trai ka la pyndap ïa ka ïing U Blei.