2 KHRONIKL 4 - KA BAIBL

¹ U la thaw ruh ka duwan rnong, arphew pruh ka lynter jong ka, bad arphew pruh ka pyngkiang jong ka, bad shiphew pruh ka jingjrong jong ka.

² U la thaw ruh ïa ka duriaw ba la saiñ, kaba shiphew pruh na rmiang sha rmiang, kaba pyllun sawdong, bad ka jingjrong jong ka, ka la long san pruh; bad u ksai uba laiphew pruh, u la kot baroh sawdong ïa ka.

³ Te hapoh jong ka, la don kaba syriem ïa ki masi dab, kiba tawiar sawdong ïa ka, shiphew tylli shi pruh shi pruh, kiba tawiar sawdong ïa kata ka duriaw. Kita ki masi dab, ki la long ar kyrdan, kiba la saiñ haba la saiñ ïa ka.

⁴ Ka la shong halor khat-ar tylli ki masi dab, lai tylli kiba khmih shatei, bad lai tylli kiba khmih sha sepngi, bad lai tylli kiba khmih shathie, bad lai tylli kiba khmih sha mihngi: bad ïa ka duriaw la pynshong halor jong ki haneng, bad ki bynta kiba shadien jong ki baroh ki la long shapoh.

⁵ Te ka jingrben, ka la long shi khup; bad ïa ka rmiang jong ka, la thaw kum ka rmiang jong ka khuri, kum u syntiew Lili: ka la pdiang bad ka ngiam lai hajar bath.

⁶ U la thaw ruh shiphew tylli ki dabor, bad u la buh san tylli sha kamon bad san tylli sha kadiang, ban sait ha ki; ïa kita kiei kiei kat kiba dei ha ka jingainguh thang ki sait ha kita: hynrei, ka duriaw ka la long ban sait ki lyngdoh.

⁷ Bad u la thaw shiphew tylli ki dieng pynïeng sharak ksiar katba kum ka rukom shaphang jong ki; bad u la buh ïa ki ha ka templ, san tylli sha kamon, bad san tylli sha kadiang.

⁸ U la thaw ruh shiphew tylli ki miej, bad u la buh ïa ki ha ka templ, san tylli sha ka krung kamon, bad san tylli sha kadiang. Bad u la thaw shispah tylli ki khuri ksiar.

⁹ U la thaw shuh sa ka phyllaw jong ki lyngdoh, bad ka phyllaw kaba khraw, bad ki jingkhang ïa ka phyllaw, bad u la suit ïa ki jingkhang jong ki da ka rnong.

¹⁰ Te u la buh ïa ka duriaw sha ka krung kamon jong ka ïing shaphang mihngi, lam shathie.

¹¹ Te u Huram u la thaw ïa ki khiew, bad ki siang, bad ki khuri. Kumta, u Huram u la pyndep ïa ka kam kaba u la trei ïa u syiem Solomon ha ka ïing U Blei:

¹² ïa kita ki ar tylli ki rishot, bad ïa ki khuri, bad ïa ki ar tylli ki khlieh kiba la long ha kliar ki rishot; bad ïa ki ar tylli ki jingthain jar ban tap ïa kita ki ar tylli ki khuri jong ki khlieh kiba la long ha kliar ki rishot;

¹³ bad ïa ki sawspah ki soh Pong ïa kita ki ar tylli ki jingthain jar; ar kyrdan ki soh Pong ïa kawei kawei ka jingthain jar, ban tap ïa kita ki ar tylli ki khuri jong ki khlieh kiba la long halor ki rishot.

¹⁴ U la thaw ruh ki jingpynshong, bad u la thaw ïa ki dabor halor kita ki jingpynshong;

¹⁵ ïa kawei ka duriaw, bad khat-ar tylli ki masi dab hapoh jong ka.

¹⁶ Ïa ki khiew ruh, bad ki siang, bad ki bnoh doh, bad ki kynja pliang jong ka baroh, u Huram uba u kpa jong u, u la thaw na ka bynta u syiem Solomon ïa ka ïing U Trai da ka rnong baphyrnai.

¹⁷ Ha ka madan Jordan, u syiem u la saiñ ïa ki, ha ka 'dewbyrtha hapdeng ka Sukkoth bad ka Seredah.

¹⁸ Kumne shikatdei eh, u Solomon u la thaw ïa kine ki kynja pliang baroh: naba ïa ka jingkhia ka rnong ym lah shem shuh.

¹⁹ Te u Solomon u la thaw ïa ki kynja pliang baroh kiba la don ha ka ïing U Blei, ïa ka duwan ksiar ruh, bad ïa ki miej ha kiba la don u 'pu pyni;

²⁰ bad ïa ki dieng pynïeng sharak lem bad ki sharak jong ki, ba kin thang kat kum ka rukom ha khmat ka orakl, da ka ksiar banylla;

²¹ bad ïa ki syntiew, bad ïa ki sharak, bad ïa ki nap, da ka ksiar, bad kata ka ksiar banylla;

²² bad ïa ki jinglur sharak, bad ïa ki khuri, bad ki siang, bad ki pliang ding, da ka ksiar banylla: bad ka khyrdop jong ka ïing, ki jingkhang ba kham shapoh jong ka na ka bynta ka jaka bakyntang tam, bad ïa ki jingkhang jong ka ïing, kata, ki jong ka templ, ki la long da ka ksiar.