2 KHRONIKL 3 - KA BAIBL

U Solomon u tei ïa ka templ

¹ Ynda kumta, u Solomon u la sdang ban tei ïa ka ïing U Trai ha Jerusalem halor u lum Moraïah, ha kaba U Trai u la paw ha u Dabid u kpa jong u, kaba u la khreh ha kata ka jaka kaba u Dabid u la buh, ha ka kyntem jong u Ornan u nong Jebus.

² Te u la sdang ban tei ha ka ba-ar tarik jong u bnai u ba-ar, ha ka basaw ka snem jong ka jingsynshar jong u.

³ Te kine ki long ki nongrim kiba u Solomon u la buh na ka bynta ban tei ïa ka ïing U Blei. Ka lynter ha ki pruh kat kum ka jingthew banyngkong ka la long hynriewphew pruh, bad ka pyngkiang, arphew pruh.

⁴ Te ka batsha kaba la don ha khmat ka ïing, ka lynter jong ka, kajuh kat ka pyngkiang jong ka ïing, ka la long arphew pruh, bad ka jingjrong, shispah arphew: bad u la suit ïa ka na shapoh da ka ksiar banylla.

⁵ Bad ïa ka ïing kaba kham khraw u la sop sad da u dieng Kseh, uba u la suit da ka ksiar ka babha, bad u la mutdur ha ka da ki dieng Tlai bad ki kynjri.

⁶ Bad u la pyndeng ïa ka ïing da ki maw bakordor na ka bynta ban itynnad: bad ka ksiar ka la long ka ksiar Parbaim.

⁷ U la suit ïa ka ïing ruh, ïa ki bim, ïa ki shawkad, bad ïa ki kynroh jong ka, bad ïa ki jingkhang jong ka, da ka ksiar; bad u la mutdur da ki Kherub halor ki kynroh.

⁸ Te u la thaw ïa ka ïing bakyntang tam, ka lynter jong ka, kajuh kat ka pyngkiang jong ka ïing, ka la long arphew pruh, bad ka pyngkiang jong ka, arphew pruh; bad u la suit ïa ka, da ka ksiar ka babha, kaba la leit haduh hynriewspah talent.

⁹ Bad ka jingkhia ki prek, ka la long sanphew shekel ka ksiar. Bad u la suit ïa ki kamra kiba haneng, da ka ksiar.

¹⁰ Bad hapoh ka jaka bakyntang tam, u la thaw ar tylli ki Kherub da ka jingthaw dur; bad u la suit ïa ki, da ka ksiar.

¹¹ Te ki thapniang jong ki Kherub ki la long kiba jrong arphew pruh: ka thapniang jong uwei u Kherub ka la long san pruh, ka da kot haduh ka kynroh jong ka ïing: bad kawei pat ka thapniang ka la long kumjuh, san pruh, ka da ïakynduh bad ka thapniang jong uta uwei u Kherub.

¹² Bad ka thapniang jong uta uwei u Kherub, ka la long san pruh, ka da kot haduh ka kynroh jong ka ïing: bad kawei pat ka thapniang ruh, ka la long san pruh, ka da ïakynduh bad ka thapniang jong uwei pat u Kherub.

¹³ Ki thapniang jong kine ki Kherub ki la pynpyiar noh ïa lade, arphew pruh: bad ki la ïeng da la ki kjat, bad ki khmat jong ki, ki la long sha ka ïing.

¹⁴ Te u la thaw ïa ka jingkah na ka bajyrngam, bad ka basaw bthuh, bad ka basaw syng-iang, bad ka jaiñ linen bani, bad u la mutdur halor da ki Kherub.

Ka jingtrei u Huram ha kaba tei ïa ka templ

¹⁵ U la thaw ruh ha khmat ka ïing ar tylli ki rishot kiba jrong laiphew san pruh, bad ka khlieh kaba la don ha ka kliar jong uwei pa uwei na ki, ka la long san pruh.

¹⁶ Te u la thaw ki kynjri ha ka orakl, bad u la buh ha kliar jong ki rishot: bad u la thaw shispah tylli ki soh Pong, bad u la buh ïa ki halor kita ki kynjri.

¹⁷ Te u la pynïeng ïa ki rishot ha khmat ka templ, uwei sha kamon, bad uwei sha kadiang; bad u la khot kyrteng ïa uta uba sha kamon “u Jakhin”, bad ïa uta uba sha kadiang “u Boas”.