2 KHRONIKL 2 - KA BAIBL

Ka jingïakut u Solomon bad u syiem Huram

¹ Te u Solomon u la thmu ban thaw kawei ka ïing ïa ka kyrteng U Trai, bad kawei ka ïing na ka bynta ka hima jong u.

² Te u Solomon u la ñiew hynñiewphew hajar ki briew ki ban kit jingkit, bad phraphew hajar kiba khet dieng ha ki lum, bad lai hajar hynriewspah ki ban khmih halor jong ki.

³ Te u Solomon u la phah sha u Huram u syiem ka Tyros, u da ong, “Kumba me la leh bad u Dabid u kpa jong nga, bad me la phah ha u ïa ki dieng Kedar ban thaw ka ïing ïa u ba un shong ha ka, kumta ruh, to leh bad nga.

⁴ Ha khmih, nga thaw kawei ka ïing ïa ka kyrteng U Trai uba U Blei jong nga, ban pynkyntang ïa ka sha u, bad ban thang ha khmat jong u, ïa ka jingiwbih thang da ki musla, bad na ka bynta u 'pu pyni uba ha la ka sngi, bad na ka bynta ka jingainguh thang mynstep bad ynda la janmiet, ha ki Sabbaton, bad ha ki bnai bathymmai, bad ha Ki Jingkhawai Niam ba la buh jong U Trai uba U Blei jong ngi. Kane ka long kaba ha la ka rta ïa ki Israel.

⁵ Bad ka ïing kaba nga thaw ka long kaba khraw: namar U Blei jong ngi u long u bakhraw tam ïa ki blei baroh.

⁶ Hynrei, uei uba lah ban thaw ïing ïa u, haba ka bneng bad ka bneng jong ki bneng kim lah kynthup ïa u? nga long uei te, ba ngan thaw ïing ïa u, tang ban shu thang ïa ka jingiwbih ha khmat jong u?

⁷ Te namar kata, to phah ha nga ïa u briew uba nang ban trei ksiar, bad rupa, bad rnong, bad nar, bad ka basaw bthuh, bad ka basaw syng-iang, bad ka bajyrngam, bad uba nang ban pruid ïa ki laiphew rukom ka jingpruid, ban long lem bad ki riewstad kiba don bad nga ha ri Judah bad ha Jerusalem, ïa kiba u Dabid u kpa jong nga u la lah khreh.

⁸ To phah ruh ha nga ïa ki dieng Kedar, ki dieng Kseh, bad ki dieng Algum na Lebanon: naba nga tip ba ki shakri jong me ki nang ban khet dieng ha Lebanon; bad ha khmih, ki shakri jong nga kin long lem bad ki shakri jong me,

⁹ ïa ka ban khreh ïa nga shibun ki dieng keiñ: naba ka ïing kaba ngan sa thaw kan long kaba khraw ba-iphylla.

¹⁰ Bad ha khmih, ngan ai ha ki shakri jong me, ki nongkhet kiba khet dieng, arphew hajar byrni u Kew ba la dung, bad arphew hajar byrni u Kew Barli, bad arphew hajar khra ka Waiñ, bad arphew hajar khra ka umphniang.”

¹¹ Te u Huram u syiem ka Tyros u la phai ktien ha ka jingthoh, kaba u la phah sha u Solomon, “Namar ba U Trai u la ieit ïa ki briew jong U, U la pynlong syiem ïa me halor jong ki.”

¹² U Huram u la ïai-ong shuh, “Long ba la kyrkhu ïa U Trai, U Blei ki Israel, uba la thaw ïa ka bneng bad ïa ka khyndew, uba la ai ha u syiem Dabid ïa u khun u bastad, uba la pyndap da ka jingstad bad ka jingshemphang, u ban thaw kawei ka ïing ïa U Trai, bad kawei ka ïing na ka bynta ka hima jong u.

¹³ “Te mynta, nga la phah ïa u briew u basian, uba don ka jingshemphang, u jong u Huram u kpa jong nga,

¹⁴ u khun jong ka briew kaba na ki khun kynthei u Dan, bad u kpa jong u, u la long u briew uba na Tyros, uba nang ban trei ksiar, bad rupa, bad rnong, bad nar, bad maw, bad dieng, bad ka basaw bthuh, bad ka bajyrngam, bad ka jaiñ linen bani, bad ka basaw syng-iang; ban pruid ruh ïa kano kano ka kynja jingpruid, bad ban thaw buit ïa kano kano ka jingthaw buit: khnang ban buh jaka ïa u lem bad ki riewstad jong me, bad ki riewstad u kynrad jong nga u Dabid u kpa jong me.

¹⁵ Te namar kata, ïa u Kew bad ïa u Kew Barli, ïa ka umphniang bad ïa ka Waiñ, shaphang kiba u kynrad jong nga u la kren, to un phah ha ki shakri jong u:

¹⁶ te ngin khet dieng na Lebanon katba men donkam: bad ngin wallam ïa ka sha me da kaba pynkie ha ka duriaw shaduh Joppa; me ruh men sa kit ïa ka sha Jerusalem.”

¹⁷ Te u Solomon u la kheiñ ïa ki nongwei baroh kiba la don ha ka ri Israel katba kum ka jingkheiñ kaba u Dabid u kpa jong u, u la kheiñ ïa ki; bad la shem ïa ki shispah sanphew lai hajar bad hynriewspah.

¹⁸ Te u la buh hynñiewphew hajar na ki ban kit ïa ki jingkit, bad phraphew hajar kiba la long ki nongkhet dieng ha ki lum, bad lai hajar bad hynriewspah ki sordar ki ban pyntrei ïa ki briew.