2 KHRONIKL 18 - KA BAIBL

U Mikaïah u ïathuhlypa ïa ka jingshahjop u Ahab bad u Jehoshaphat

¹ Te u Jehoshaphat u la don spah bad burom kyrhai; bad u la ïalok bad u Ahab.

² Bad ynda katto katne snem, u la leit hiar sha Samaria ha u Ahab. Bad u Ahab u la pynïap ki langbrot bad ki masi shibun eh na ka bynta jong u, bad na ka bynta ki briew kiba bad u, bad u la kyntu ïa u ban leit lem bad u sha Ramoth-gilead.

³ Bad u Ahab u syiem ki Israel u la ong ha u Jehoshaphat u syiem ka Judah, “Men leit ne em bad nga sha Ramoth-gilead?” U te u la ïathuh ha u, “Nga long kumba me long, bad ki briew jong nga kum ki briew jong me; bad ngin long lem bad me ha ka thma.”

⁴ Bad u Jehoshaphat u la ong ha u syiem ki Israel, “To ïakylli, nga kyrpad ïa me, na ka ktien U Trai mynta.”

⁵ Ynda kumta, u syiem ki Israel u la ïalum lang ïa ki nongïathuhlypa, sawspah ngut, bad u la ong ha ki, “Ngin leit sha Ramoth-gilead ban ïaleh thma, ne ngan pep?” Ki te ki la ong, “Khie leit; namar U Blei un ai noh ïa ka ha ka kti jong u syiem.”

⁶ Hynrei, u Jehoshaphat u la ong, “Hato ym don shuh ma u nongïathuhlypa U Trai, ba ngi lah ban ïakylli na u?”

⁷ Bad u syiem ki Israel u la ong ha u Jehoshaphat, “Dang don sa uwei u briew da uba ngi lah ban kylli na U Trai: hynrei, nga isih ïa u; namar um ju ïathuhlypa ïa ka babha shaphang jong nga, hynrei, tang ïa ka basniew borabor: une u long u Mikaïah u khun u Imla.” Te u Jehoshaphat u la ong, “Wat ai ba u syiem un ong kumta.”

⁸ Ynda kumta, u syiem ki Israel u la khot ïa u ïunukh, bad u la ong, “Wallam kloi ïa u Mikaïah u khun u Imla.”

⁹ Te u syiem ki Israel bad u Jehoshaphat u syiem ka Judah ki la ïashong mar ha la ka khet, kiba la kup ïa la ki jaiñ syiem, bad ki la shong ha madan ha khmat ka khyrdop ka Samaria; bad ki nongïathuhlypa baroh ki ïathuhlypa ha khmat jong ki.

¹⁰ Bad u Sedekaïah u khun u Khenaanah u la thaw ïa lade ki reng nar, bad u la ong, “Kumne u ong U Trai, Da kine men tur ïa ka Syria, haduh ba kin da duh noh khoit.”

¹¹ Bad ki nongïathuhlypa baroh ki la ïathuhlypa kumta, ki ïa-ong, “Khie leit sha Ramoth-gilead, bad to jop; namar U Trai un ai noh ïa ka ha ka kti u syiem.”

¹² Te uta u nonglam-ktien uba la leit khot ïa u Mikaïah u la kren ha u, u da ong, “Ha khmih, ki ktien ki nongïathuhlypa ki pyni ïa ka babha ïa u syiem da kawei ka shyntur: namar kata, nga kyrpad ïa me, to ka ktien jong me kan long kum kawei na ki jong ki, bad to kren bha ma me ruh.”

¹³ Te u Mikaïah u la ong, “Katba U Trai u im, ïa kaba U Blei jong nga u ong, ïa kata ngan kren.”

¹⁴ Bad haba u la poi ha u syiem, u syiem u la ong ha u, “Ko Mikaïah, ngin leit sha Ramoth-gilead ban ïaleh thma, ne ngan pep?” U te u la ong, “Khie leit, bad to jop; bad yn ai noh ïa ki ha ka kti jong phi.”

¹⁵ Bad u syiem u la ong ha u, “Katno sien ba ngan pynsmai ïa me ba men ym kren ei ei ha nga, hynrei, tang ïa kaba shisha ha ka kyrteng U Trai?”

¹⁶ U te u la ong, “Nga la ïohi ïa ki Israel baroh ba ki la sakma halor ki lum, kum ki langbrot ki bymdon nongsharai: bad U Trai u la ong, ‘Kine kim don kynrad; to kin leit phai noh uwei uwei baroh sha la ïing ha kaba suk.’ ”

¹⁷ Te u syiem ki Israel u la ong ha u Jehoshaphat, “Nga la ong ne em ïa me ba un ym ïathuhlypa ïa ka babha shaphang jong nga, hynrei, tang ïa ka basniew?”

¹⁸ U te u la ong, “Haba kumta, to sngew ïa ka ktien U Trai: Nga la ïohi ïa U Trai ba u shong halor ka khet jong u, bad u paidbah bneng baroh u ïeng sha ka kti kamon bad sha ka kti kadiang jong u.

¹⁹ Bad U Trai u la ong, ‘Uei u ban riam ïa u Ahab u syiem ki Israel, ba un leit sha Ramoth-gilead bad ba un kyllon hangta?’ Bad uwei u kren da kumne, bad uwei u kren da kumtai.

²⁰ Te la wan uwei u mynsiem, bad u la ïeng ha khmat U Trai, bad u la ong, ‘Ngan riam ma nga ïa u.’ Bad U Trai u la ong ha u, ‘Da kumno?’

²¹ Bad u la ong, ‘Ngan leit mih, bad ngan long u mynsiem lamler ha ka shyntur ki nongïathuhlypa jong u baroh.’ Bad u la ong, ‘To men riam ma me ïa u, bad men lah ruh: khie leit, bad leh kumta.’

²² Namar kata, ha khmih, U Trai u la buh ïa u mynsiem lamler ha ka shyntur kine ki nongïathuhlypa jong me; bad U Trai u la kren ïa ka basniew shaphang jong me.”

²³ Ynda kumta, u Sedekaïah u khun u Khenaanah u la wan hajan, bad u la thab ïa u Mikaïah na ka ngab, bad u la ong, “Da kano ka lynti U Mynsiem U Trai u leit noh na nga ban kren ha me?”

²⁴ Bad u Mikaïah u la ong, “Ha khmih, men sa ïohi ha kata ka sngi, haba me leit rung ban rieh ïa lade ha ka kamra kaba kham shapoh.”

²⁵ Bad u syiem ki Israel u la ong, “Shim phi ïa u Mikaïah, bad leit lam ïa u sha u Amon u rangbah ka shnong, bad sha u Joash u khun u syiem;

²⁶ bad to ong, ‘Kumne ong u syiem, “Set ïa une u briew ha phatok, bad bsa ïa u da u kpu ka jingshitom bad da ka um ka jingshitom, haduh ba ngan da wan phai pat ha kaba suk.” ’ ”

²⁷ Bad u Mikaïah u la ong, “Lada men wan phai pat shisha ha kaba suk, U Trai um shym kren da nga.” U la ong ruh, “To sngew, phi ki paidbah baroh keiñ.”

²⁸ Kumta, u syiem ki Israel bad u Jehoshaphat u syiem ka Judah ki la leit sha Ramoth-gilead.

²⁹ Bad u syiem ki Israel u la ong ha u Jehoshaphat, “Nga ngan pynpher ïa lade, bad ngan leit sha ka thma; hynrei men phong ïa la ki jong ki jaiñ.” Kumta u syiem ki Israel u la pynpher ïa lade; te ki la leit sha ka thma.

³⁰ Te u syiem ka Syria u la lah hukum ïa ki kaptan ki kali ïapom jong u, u ong, “Wat ïaleh ïa uba rit lane ïa uba khraw, hynrei, tang ïa u syiem ki Israel.”

³¹ Te haba ki kaptan ki kali ïapom ki la ïohi ïa u Jehoshaphat, ki la ong, “U dei u syiem ki Israel.” Namar kata, ki la phai noh ban ïaleh ïa u: hynrei, u Jehoshaphat u la pyrta jam, bad U Trai u la ïarap ïa u; bad U Blei u la pynkhih ïa ki ban leit noh na u.

³² Bad haba ki kaptan ki kali ïapom ki la ïohi ba ym dei u syiem ki Israel, ki la phai noh na kaba beh ïa u.

³³ Te uwei u briew u la wiat ïa la ka ryntieh kumba pda lymbneng, bad u la dei ïa u syiem ki Israel napdeng ki jingbteng ka jingphong nar: ynda kumta, u la ong ha u kashwan, “Pynphai ïa la ka kti, bad ïalam noh ïa nga na une u paidbah; namar nga la mynsaw jur.”

³⁴ Bad ka thma ka la nang jur ha kata ka sngi: hynrei, u syiem ki Israel u shan ïa lade ha la ka kali ban ïaleh ïa ki Syria haduh janmiet; bad u la ïap hamar ba sep ka sngi.