2 KHRONIKL 1 - KA BAIBL

Ka jingduwai u Solomon ban ïoh ïa ka jingstad

¹ Te la pynkhlaiñ ïa u Solomon u khun u Dabid ha ka Hima jong u, bad U Trai U Blei jong u, U la don ryngkat bad u, bad U la pynkhraw ïa u shikatdei eh.

² Te u Solomon u la kren ha ki Israel baroh, ha ki rangbah shihajar bad jong ki shispah, bad ha ki nongbishar, bad ha man la u nongïalam ha ki Israel baroh, kiba ki rangbah ki ïing ki kpa.

³ Kumta, u Solomon, bad baroh u paidlang lem bad u, ki la ïaleit sha ka jaka bajrong kaba la don ha Gibeon; naba hangta ka la don Ka Ïingjaiñ Ka Jingïaseng ka jong U Blei, ïa kaba u Moses u shakri jong U Trai u la thaw ha ka ri khlaw.

⁴ Hynrei, u Dabid u la lah wallam ïa ka synduk jong U Blei na Kiriath-jearim sha ka jaka kaba u Dabid u la pynkhreh ïa ka: naba u la pynïeng ka ïingjaiñ ïa ka ha Jerusalem.

⁵ Ïa ka duwan rnong ruh, kaba la thaw u Besalil u khun u Uri, u khun u Hur, ka la don hangta ha khmat Ka Tabernakl jong U Trai: bad u Solomon bad u paidlang ki la ïawad sha ka.

⁶ Te u Solomon u la leit kiew shata sha ka duwan rnong ha khmat U Trai, kaba la don ha ka ïingjaiñ ka jingïaseng, bad u la ainguh shi hajar tylli ki jingainguh thang halor jong ka.

⁷ Ha kata ka miet, U Blei u la paw ha u Solomon, bad u la ong ha u, “To pan ngan ai aïu ïa me.”

⁸ Te u Solomon u la ong ha U Blei, “Me la leh ka jinglehsbun kaba khraw ha u Dabid u kpa jong nga, bad me la pynlong syiem ïa nga ha ka jaka jong u.

⁹ Te, A Trai uba U Blei, to ai ba ka jingkular jong me ha u Dabid u kpa jong nga kan long kaba la pynskhem: naba me la pynlong syiem ïa nga halor u paidlang uba kum ka 'dewmet ka khyndew ha ka jingbun paid.

¹⁰ To ai ha nga mynta, ïa ka jingstad bad ïa ka jingtip, ba nga lah ban leit shabar bad wan shapoh ha khmat une u paidlang: namar uei uba lah ban bishar ïa une u paidlang jong me, uba bun katta katta?”

¹¹ Te U Blei u la ong ha u Solomon, “Namar ba kane ka la don ha ka dohnud jong me, bad ba mem shym la pan ïa ka spah, ka jingdon, lane ïa ka burom, lymne ïa ka jingim jong kita kiba shun ïa me, lymne mem shym la pan ruh ïa ka ban im slem: hynrei, me la pan ïa ka jingstad bad ïa ka jingtip na ka bynta ïa lade hi, ba me lah ban bishar ïa u paidlang jong nga, halor uba nga la pynlong syiem ïa me:

¹² ïa kata ka jingstad bad ka jingtip la ai ha me; bad ngan ai ha me ïa ka spah, bad ka jingdon, bad ka burom, kat kita ym don uno uno ruh na ki syiem kiba la long ha shuwa jong me uba la ïoh, lymne un ym don shuh uno uno ruh hadien jong me u ban ïoh ïa kiba kumjuh.”

¹³ Kumta, u Solomon u la wan noh na la ka jingleit sha ka jaka bajrong kaba la don ha Gibeon, na khmat ka ïingjaiñ jong ka jingïaseng, sha Jerusalem; bad u la synshar halor ki Israel.

Ki kulai bad ki kali u Solomon

¹⁴ Te u Solomon u la ïalum ïa ki kali bad ïa ki nongshong kulai: bad u la don shi hajar sawspah ki kali, bad khat-ar hajar ki nongshong kulai, ïa kita, u la buh ha ki shnong buh kali, bad ryngkat bad u syiem ha Jerusalem.

¹⁵ Bad u syiem u la pynlong ïa ka rupa bad ïa ka ksiar ha Jerusalem kum ki maw, bad ïa ki dieng Kedar u la pynlong kum ki dieng Dumbur kiba ha ri them, namar ba bun eh.

¹⁶ Bad ki kulai kiba u Solomon u la don la wallam ïa ki na ka ri Ijipt; ki nongkhaïi u syiem ki la shim ïa ki da ki kynhun, kawei kawei ka kynhun ha la ka dor.

¹⁷ Te ki la kyntiew artet, bad ki la wallam noh na Ijipt ïa ki kali hynriewspah shekel rupa kawei, bad uwei u kulai shispah sanphew: bad kumta, ïa ki syiem ki Hit baroh, bad ïa ki syiem ka Syria, ki la wallam ïa ki ha la ki kti.