1 TIMOTHI 4 - KA BAIBL

Ki nonghikai balamler

¹ Hynrei, U Mynsiem u ong shai, ba ha ki Ïa ki bakhatduh, don ki ban hap noh na ka jingngeit; da kaba pynshahshkor ha ki mynsiem bashukor, bad ha ki jinghikai ki ksuid;

² da ka jingleh arsap ki briew kiba kren lamler, ba la thang saw ïa ka jingïatiplem jong ki kum da u nar saw;

³ kiba adong ban shongkurim, bad kiba hukum ban kyndiah noh na ki jingbam, ïa kiba U Blei u la thaw keiñ ban pdiang ïa ki da kaba ainguh da kita kiba ngeit bad kiba tip ïa ka jingshisha.

⁴ Naba ka jingthaw U Blei baroh ka long ka babha, bad ym don ei ei ruh kaba yn kyntait noh, lada pdiang ïa ka bad kaba ainguh:

⁵ namar la pynkhuid ïa ka, da ka ktien U Blei bad ka jingduwai.

U shakri babha u jong U Jisu Khrist

⁶ Lada me pynkynmaw ïa kita ki parabangeit shaphang kine kiei kiei ruh, men long u shakri babha u jong U Jisu Khrist, ba la bsa ha ki ktien jong ka jingngeit bad ki jong kata ka jinghikai babha, ïa kaba me la ju bud.

⁷ Hynrei, kyntait ïa kita ki puriskam kai bathala bad babieit; bad to men pynmlien ïa lade sha ka jingriewblei.

⁸ Namar ka jingpynmlien ïa ka met, ka myntoi tang khyndiat; hynrei, kata ka jingriewblei, ka pynmyntoi sha kiei kiei baroh; naba ka don ka jingkular ïa ka jingim kaba mynta, bad ïa kata ka ban sa wan.

⁹ Kane ka ktien kaba shisha, bad kaba bit ïa ka ban pdiang baroh phar.

¹⁰ Namar na ka bynta kane, ngi trei bad ngi ïaleh, naba ngi la buh ïa la ka jingkyrmen ha U Blei u ba-im, uba long U Nongpynim ïa ki briew baroh, kham tam ïa kita kiba ngeit.

¹¹ Ïa kine kiei kiei ruh, to hukum bad to hikai.

¹² To wat ai ïano ïano ruh ban ibeiñ ïa ka jinglong samla jong me; hynrei, to men long ka rukom ïa kita kiba ngeit, ha ka ktien, ha ka jinglong jingim, ha ka jingieit, ha ka jingngeit, ha ka jinglong sngur.

¹³ Tad ynda nga wan, to men minot ha kaba pule, ha kaba kyntu, ha kaba hikai.

¹⁴ Wat lyndet ïa kata ka jingai kaba ha me, ïa kaba la ai ha me da ka jingïathuhlypa, lem bad kaba buh ïa ki kti jong kata ka Presbyteri.

¹⁵ To minot eh ha kine kiei kiei; to aiti lut ïa lade ha ki; ba kata ka jingroi jong me kan ïohpaw ha baroh.

¹⁶ To sumar shaphang ïa lade, bad ïa la ka jinghikai; to men ïaineh ha kine kiei kiei; namar haba leh ïa kane, men pynim ïa lade bad ïa kita kiba ïohsngew ïa me keiñ.