1 TIMOTHI 3 - KA BAIBL

Ki nongsharai ha ka Balang

¹ Kane ka ktien kaba shisha: Lada u briew u kwah ïa ka jinglong u nongsharai, u kwah ïa ka kam ka babha.

² Namar kata, ka dei ïa u nongsharai ban long uba khlem shah kynnoh pop, u tnga jong kawei ka tnga, uba leh adkar, uba shida jingmut, uba ïaid beit, uba khot ieit basa, uba nang hikai;

³ u bym shait ïamai, u bymïashoh ïadat; hynrei, uba jemnud, u bymïania, u bymieit sbai;

⁴ uba synshar bha ïa la ka jong ka ïing, uba sumar la ki khun ha ka jingkohnguh da ka jingshida baroh;

⁵ (namar lada u briew um tip kumno ban synshar ïa la ka jong ka ïing, hato kumno un sumar ïa ka balang U Blei?)

⁶ ym u synran ba dang shibit, ïoh ba ynda u la sngewmeng, un hap sha ka jingpynrem jong u Soitan.

⁷ Nalor kane, ka dei ïa u ban ïoh ka jingphla babha na kiba nabar; ïoh ba un hap sha ka jingshah krenbeiñ bad ka jingriam u Soitan.

Kumno ka dei ïa ki tymmen basan ban long

⁸ Kumjuh ka dei ïa ki tymmen basan ban long kiba shida, ym kiba ar kyntien, ym kiba shait dih Waiñ, ym kiba khwan myntoi;

⁹ kiba bat ïa ka jingmaïan ka jingngeit ha ka jingïatiplem bakhuid.

¹⁰ Bad to ai ruh ba yn tynjuh shuwa ïa kine; hadien kata, kin leh basan, lada ki long kiba khlem shah kynnoh pop.

¹¹ Kumjuh ruh ki kynthei kin long kiba shida, ym kiba kren siar, kiba leh adkar, kiba shisha ha kiei kiei baroh.

¹² To ai ba ki tymmen basan kin long ki tnga jong kawei ka tnga, kiba synshar bha ïa la ki khun bad ïa la ki jong ki ïing.

¹³ Namar kita kiba la leh basan bha, ki pynïoh ha lade ïa ka kyrdan ka babha, bad ïa ka jingshlur bakhraw ha ka jingngeit kaba ha U Khrist Jisu.

Ka jingmaïan ka bakhraw

¹⁴ Ïa kine kiei kiei ruh nga thoh ha me, la nga kyrmen ban wan shen ha me;

¹⁵ hynrei, lada nga tud, ba men tip kumno ki briew ki dei ban leh ïa lade ha ka ïing U Blei, kaba long ka balang jong U Blei u ba-im, ka rijied bad ka nongrim ka jingshisha.

¹⁶ Bad khlem ka jingïasaid, kaba khraw ka jingmaïan ka jong ka niam Blei: Uta uba la paw ha ka doh, ba la ksan ha U Mynsiem, ba la ïohi da ki angel, ba la ïalap hapdeng ki Jentil, ba la ngeit ha ka pyrthei, ba la pdiang haneng ha ka burom.