1 SAMUEL 9 - KA BAIBL

La jied syiem ïa u Saul

¹ Te la don u briew uba na ki Benjamin, uba kyrteng “u Kish”, u khun u Abiel, uba u khun u Seror, u khun u Bekhoreth, u khun u Aphiah, u khun u kynja Benjamin, uba khraw bor eh.

² Bad u la don u khun, uba kyrteng “u Saul”, u samla uba itynnad bad babhabriew: bad na ki khun Israel ym shym la don uwei uba kham bhabriew ban ïa u; u la long uba ka rynïeng ba uno uno na kita ki briew u kot tang ha tyrpeng.

³ Te ki kadda u Kish, u kpa u Saul ki la jah noh. Bad u Kish u la ong ha u Saul u khun jong u, “To ïalam bad me uwei na kine ki shakri, to khie ruh, da leit wad ïa kita ki kadda.”

⁴ Te ki la ïaid ïa ka ri lum Ephraim, bad ki la ïaid ïa ka ri Shalisha, te kim shem ïa ki: ynda kumta, ki la ïaid ïa ka ri Shalim, hangta ruh kim don: te ki la ïaid ïa ka ri jong ki Benjamin, hynrei, kim shem ïa ki.

⁵ Te haba ki la poi sha ka ri Suph, u Saul u la ong ïa la u shakri uba don lem bad u, “Ïa ngin ïaleit wan noh; ïoh u kpa jong nga un da wai noh shaphang ki kadda, u khuslai pynban ïa ngi.”

⁶ U te u la ong ha u, “Ha khmih, ha kane ka shnong don u briew u jong U Blei, bad u long u briew uba donburom; baroh kat kaba u ong ka jia long shisha: ïa ngin ïaleit shata; lehse un ïathuh ïa ngi ïa ka lynti kaba ngi dei ban leit.”

⁷ Te u Saul u la ong ïa la u shakri, “Ha khmih, lada ngi leit, ngin leit lam da ei ha uta u briew? naba u kpu u la lut noh na ki pliang jong ngi, bad ym don kawei pat ka jingai ban leit lam ha uta u briew jong U Blei: ngi don aïu?”

⁸ Te uta u shakri u la ïathuh pat ha u Saul, bad u la ong, “Ha khmih, nga don ha la ka kti shi pawa shekel u sbai: da uta ngan ai ïa uta u briew jong U Blei, ba un ïathuh ha ngi ïa ka lynti jong ngi.”

⁹ (Mynnor ha Israel, u briew haba u leit ban ïakylli na U Blei, u la ju ong kumne, “Ale ngin ïaleit sha u nongïohi:” namar uta ïa uba khot mynta “u Nongïathuhlypa” la ju khot mynno mynno “u Nongïohi”).

¹⁰ Kumta, u Saul u la ong ïa la u shakri, “Me la ïathuh bha; ïa, ngin ïaleit.” Kumta, ki la leit sha kata ka shnong ha kaba u la don uta u briew jong U Blei.

¹¹ Te katba ki dang ïakiew ïa ka thiep sha kata ka shnong, ki la ïashem ïa ki samla kynthei kiba dang ïamih ban leit tong um bad ki la kylli ïa ki, “Uta u nongïohi u don hangne?”

¹² Te ki la ïathuh ïa ki, bad ki la ong, “U don; ha khmih, u ha pyrshah jong phi: to da pynkloi, namar ha kane ka sngi u la wan sha shnong; naba u paidbah u don ka jingkñia mynta ka sngi ha ka jaka jrong:

¹³ haba phi dang shu poi shapoh ka shnong, phin shem ïa u kumne kumne, haba um pat leit kiew sha kata ka jaka jrong ban bam: naba ki briew kin ym bam tad ynda u la poi ma u, namar un kyrkhu ma u ïa ka jingkñia; hadien kata, kin bam kita ïa kiba la khot. Namar kata, to leit kiew; namar dei hamar kane ka por ba phin shem ïa u.”

¹⁴ Te ki la leit kiew sha kata ka shnong; bad haba ki la poi hapdeng ka shnong, ha khmih, u Samuel u dang wan ïashem bad ki, ba un sa leit kiew sha kata ka jaka jrong.

¹⁵ Te U Trai, shi sngi mynshuwa kaba poi u Saul, U la lah ïathuh ha ka shkor u Samuel, U da ong,

¹⁶ “Lashai hamar kane ka por ngan phah sha me ïa u briew uba na ka ri Benjamin, te men pynsleh ïa u ban long u nongïalam halor ki briew jong nga ki Israel, bad un pyllait ïa ki briew jong nga na ka kti ki Philistia: namar nga la khmih ïa la ki briew, naba ka jinglynñiar jong ki ka la poi sha nga.”

¹⁷ Bad haba u Samuel u la ïohi ïa u Saul, U Trai u la ong ha u, “Ha khmih uta u briew uba nga la ïathuh ha me shaphang jong u! une keiñ u ban synshar halor ki briew jong nga.”

¹⁸ Te u Saul u la leit hajan u Samuel ha ka khyrdop, bad u la ong, “Nga kyrpad ïa me, to ïathuh ha nga hangno ka ïing u nongïohi.”

¹⁹ Bad u Samuel u la ïathuh ha u Saul, bad u la ong, “Nga, nga long u nongïohi: to khie leit kiew ha shuwa jong nga sha kata ka jaka jrong, namar phin bam jingbam lem bad nga ha kane ka sngi: te lashai mynstep ngan pyllait noh ïa me, bad ngan ïathuh ha me ïa kaba ha ka dohnud jong me baroh.

²⁰ Te shaphang kita ki kadda jong me kiba la jah noh la lai sngi mynta, wat khuslai shaphang jong ki; naba la shem ïa ki. Bad kita kiei kiei ki babha baroh ha Israel ki dei ïano? Ym dei ïa me, bad ïa baroh ka ïing u kpa jong me?”

²¹ Te u Saul u la ïathuh bad u la ong, “Nga ngam long u Benjamin, uba na ka barit tam na ki jaid Israel? bad ka kur jong nga ka barit tam na ki kur ka jaid Benjamin? balei te me kren kumta ïa nga?”

²² Bad u Samuel u la shim ïa u Saul bad ïa uta u shakri jong u, bad u la wallam ïa ki sha kata ka kamra, bad u la pynshong ïa ki ha ka jaka kaba kham donnam hapdeng kita ïa kiba la khot, kiba la don kumba laiphew ngut ki briew.

²³ Te u Samuel u la ong ha u nongshet, “Wallam ïa kata ka tukra kaba nga la ai ïa me, ïa kaba nga la ong ïa me, ‘To buh kyrpang.’ ”

²⁴ Bad uta u nongshet u la shim ïa kata ka kti, bad kata kaba la don ha ka, bad u la buh ïa ka ha khmat u Saul. Bad u Samuel u la ong, “Ha khmih ïa kata kaba la buh tyngkai! to buh ha khmat jong me, bad to bam; naba hamar kane ka por la sumar ïa ka ha me, naduh kaba nga la ong, ‘Nga la khot ïa ki briew.’ ” Kumta, u Saul u la bam lem bad u Samuel ha kata ka sngi.

²⁵ Te haba ki la ïawan hiar sha shnong na kata ka jaka jrong, u la ïakren bad u Saul halor ïing.

²⁶ Te ki la khie la dang step: bad hamar ba dang mih ka sngi, u Samuel u la khot ïa u Saul shalor ïing, u da ong, “Khie, ba ngan leit on lynti ïa me.” Bad u Saul u la khie, bad ki la leit mih noh baroh ar ngut, ma u bad u Samuel.

²⁷ Te katba ki dang ïahiar arsut ha ka bakut ka shnong, u Samuel u la ong ha u Saul, “Ong ïa une u shakri ba un nang leit sha shuwa jong ngi, (kumta u la nang leit,) hynrei, to ap ma me khyndiat mynta, te ngan pynsngew ha me ïa ka ktien U Blei.”