1 SAMUEL 8 - KA BAIBL

Ki Israel ki pan da u syiem

¹ Te haba u Samuel u la tymmen, u la thung ïa la ki khun ba kin long nongbishar halor ki Israel.

² Te ka kyrteng u khun nyngkong jong u ka la long “u Joel”; bad ka kyrteng u ba-ar, “u Abijah”: te kine ki la long nongbishar ha Beer-sheba.

³ Te kita ki khun jong u kim shym ïaid ha ki lynti jong u, hynrei, ki la phai noh sha ka jinglalot, bad ki la bamsap, bad ki la pynbakla ïa ka jingbishar ruh.

⁴ Ynda kumta, ki tymmen basan ki Israel baroh ki la ïalum lang, bad ki la ïawan sha u Samuel ha Ramah:

⁵ bad ki la ïa-ong ha u, “Ha khmih, ma me, me la tymmen, bad ki khun jong me kim ïaid ha ki lynti jong me: mynta te to thung da u syiem halor jong ngi ban bishar ïa ngi kum ki jaid bynriew baroh.”

⁶ Te kane ka ktien ka la pynsngewsih ïa u Samuel, haba ki la ong, “To ai da u syiem ban bishar ïa ngi.” Bad u Samuel u la duwai ha U Trai.

⁷ Bad U Trai u la ong ha u Samuel, “To shahshkor ïa ka ktien jong kine ki briew ha kiei kiei baroh ba ki ong ha me: namar ym dei ïa me ba ki la kyntait, hynrei, ki la kyntait ïa nga, ba ngan ym long syiem shuh halor jong ki.

⁸ Katba kum kita ki kam baroh kiba ki la leh naduh kata ka sngi ba nga la wallam noh ïa ki na Ijipt haduh kane ka sngi, ha kaba ki la kyntait ïa nga, bad ba ki la shakri ïa kiwei pat ki blei, kumta ki leh ïa me ruh.

⁹ Te namar kata, to sngap ïa ka ktien jong ki: la kumta ruh da kaba phla to phla pyrshah ïa ki, bad to pyni ha ki, ïa ka rukom uta u syiem u ban synshar halor jong ki.”

¹⁰ Te u Samuel u la ïathuh ïa ki ktien U Trai baroh ha kita ki briew kiba pan syiem na u.

¹¹ Bad u la ong, “Kane ka rukom uta u syiem u ban synshar halor jong phi: un shim na ki khun shynrang jong phi, bad un buh ïa ki ha lade, ïa ki kali jong u, bad ban long ki nongshong kulai ha u; bad ban phet ha khmat ki kali jong u:

¹² bad un buh ïa ki ha lade ban long ki rangbah ïa ki hajar, bad ki rangbah ïa ki sanphew; bad ban lur ïa ka lyngkha jong u, bad ban ot ïa ka jingot jong u, bad ban thaw ïa ki atiar ïapom jong u, bad ki atiar ïa ki kali ïapom jong u.

¹³ Bad un shim ïa ki khun kynthei jong phi ban long ki apothekari, bad ki nongshet ja shet jyntah, bad ki nongshet kpu.

¹⁴ Bad un shim ïa ki lyngkha jong phi, bad ïa ki brisoh Waiñ jong phi, bad ïa ki brisoh Olib jong phi, ki babha tam keiñ, bad un ai noh ha ki shakri jong u.

¹⁵ Bad un shim ïa kaba shiphew na ki symbai jong phi, bad na ki brisoh Waiñ jong phi, bad un ai ha ki myntri jong u, bad ha ki shakri jong u.

¹⁶ Bad un shim ïa ki shakri shynrang jong phi, bad ïa ki shakri kynthei jong phi, bad ïa ki babha tam na ki samla jong phi, bad ïa ki kadda jong phi, bad un buh ha ka kam jong u.

¹⁷ Bad un shim ïa kaba shiphew na ki langbrot jong phi: bad ma phi hi ruh phin long ki shakri jong u.

¹⁸ Te ha kata ka sngi phin lynñiar noh namar uta u syiem jong phi uba phi la jied; bad U Trai un ym shahshkor ïa phi ha kata ka sngi.”

¹⁹ La kumta ruh, kita ki briew kim treh ban sngap ïa ka ktien u Samuel; bad ki la ïa-ong, “Em; hynrei, ngin ïoh da u syiem halor jong ngi;

²⁰ ba ngi ruh ngin ïoh long kum kita ki jaid bynriew baroh; u syiem jong ngi un bishar ïa ngi, bad un mih shabar ha shuwa jong ngi, bad un ïaleh ïa ki jingïaleh thma jong ngi.”

²¹ Te u Samuel u la ïohsngew ïa ki ktien baroh ki jong kita ki briew, bad u la ïathuh ïa ki ha ki shkor jong U Trai.

²² Bad U Trai u la ong ha u Samuel, “To shahshkor ïa ka ktien jong ki, bad to thung da u syiem halor jong ki.” Bad u Samuel u la ong ha kita ki rangbah Israel, “To khie leit uwei pa uwei baroh sha la ka shnong ka shnong.”