1 SAMUEL 7 - KA BAIBL

¹ Te ki rangbah Kiriath-jearim ki la wan, bad ki la wallam noh artet ïa ka synduk U Trai, bad ki la wallam ïa ka ha ka ïing u Abinadab ha uta u lum, bad ki la pynkyntang ïa u Eleasar u khun jong u ïa ka ban sumar ïa ka synduk U Trai.

² Te naduh ba kata ka synduk ka la wan shong ha Kiriath-jearim, ka la long slem, jin arphew snem keiñ: bad ka ïing Israel baroh ka la ïam sngewkynmaw ïa U Trai.

U Samuel u bishar ïa ki Israel

³ Te u Samuel u la kren ha ka ïing Israel baroh, u da ong, “Lada phin phai noh sha U Trai da ka dohnud jong phi baroh, to bred noh ïa kita ki blei khyllah bad ïa ki Ashtaroth napdeng jong phi, bad to khreh ïa la ki dohnud sha U Trai, to shakri ruh tang ïa u hi: u te un pyllait noh ïa phi na ka kti ki Philistia.”

⁴ Ynda kumta, ki khun Israel ki la bred noh ïa ki Baal bad ïa ki Ashtaroth, bad ki la shakri tang ïa U Trai hi.

⁵ Bad u Samuel u la ong, “To ïalum ïa ki Israel baroh sha Mispah, te ngan duwai na ka bynta jong phi ha U Trai.”

⁶ Te ki la ïalum lang ha Mispah, bad ki la ïatong um, bad ki la ïatheh ha khmat U Trai, bad ki la ïashah jingit ha kata ka sngi, bad ki la ïa-ong hangta, “Ngi la leh pop ïa U Trai.” Bad u Samuel u la bishar ïa ki khun Israel ha Mispah.

⁷ Te haba ki Philistia ki la ïohsngew ba ki Israel ki la ïalum lang ha Mispah, kita ki doloi jong ki Philistia ki la leit kiew ïaleh ïa ki Israel. Bad haba ki khun Israel ki la ïohsngew ïa kata, ki la sheptieng ïa ki Philistia.

⁸ Bad ki khun Israel ki la ïa-ong ha u Samuel, “Ma me to wat shongthait ïa ka ban lynñiar kyrpad na ka bynta jong ngi ha U Trai U Blei jong ngi, ba un pyllait ïa ngi na ka kti kine ki Philistia.”

⁹ Te u Samuel u la shim ïa u khun langbrot ba dang buiñ, bad u la ainguh ïa u baroh phar ban long ka jingainguh thang ha U Trai; bad u Samuel u la lynñiar kyrpad ha U Trai na ka bynta ki Israel; bad U Trai u la shahshkor ïa u.

¹⁰ Bad katba u Samuel u dang ainguh ïa kata ka jingainguh thang, ki Philistia ki la ïawan hajan ïa ka ban ïaleh ïa ki Israel: hynrei, U Trai u la tied pyrthat da ki pyrthat kiba khraw halor ki Philistia ha kata ka sngi, bad u la pynjot noh ïa ki; bad la pynïap ïa ki ha khmat ki Israel.

¹¹ Bad ki rangbah Israel ki la ïamih noh na Mispah, bad ki la beh ïa ki Philistia, bad ki la pynïap ïa ki haduh ba ki la poi hapoh Beth-kar.

¹² Te u Samuel u la shim ïa u maw, bad u la pynïeng ïa u hapdeng ka Mispah bad ka Shen, bad u la khot kyrteng ïa u, “U Ebeneser”, u da ong, “Haduh kane U Trai u la ïarap ïa ngi.”

¹³ Kumta la jop ïa ki Philistia, bad kim shym wan shuh sha ka pud ki Israel: bad ka kti U Trai ka la long pyrshah ïa ki Philistia baroh ki sngi u Samuel.

¹⁴ Bad kita ki nongbah kiba ki Philistia ki la lah knieh na ki Israel la ai noh pat ïa ki ha ki Israel, naduh Ekron haduh Gath; bad ki Israel ki la knieh noh ruh ïa la ki pud na ka kti ki Philistia. Te la don ka jingïasuk hapdeng ki Israel bad ki Amor.

¹⁵ Bad u Samuel u la bishar ïa ki Israel baroh ki sngi ka rta jong u.

¹⁶ Bad u la ju leit kylleng man la ka snem sha Bethel, sha Gilgal, bad sha Mispah; bad u la bishar ïa ki Israel ha kita ki jaka baroh.

¹⁷ Te ka jingwan phai jong u ka la long sha Ramah, namar ka ïing jong u ka la don hangta; hangta ruh u la ju bishar ïa ki Israel: bad hangta u la thaw ïa ka duwan ha U Trai.