1 SAMUEL 6 - KA BAIBL

Ki Philistia ki pynphai pat ïa Ka Synduk Ka Jutang

¹ Te ka synduk U Trai ka la sah ha ka ri ki Philistia hynñiew bnai.

² Bad ki Philistia ki la phah khot ïa ki lyngdoh bad ïa ki nongkhan, ki da ong, “Ngin leh kumno ïa kane ka synduk U Trai? to ïathuh ha ngi da kumno ngin phah noh ïa ka sha ka jaka jong ka.”

³ Ki te ki la ong, “Lada phin phah noh ïa ka synduk U Blei ki Israel, wat phah noh suda ïa ka; hynrei, la kumno kumno phin ai ha u ïa ka jingainguh namar ka jingpalat: te kumta yn pynkhiah ïa phi, bad phin ïoh tip namar balei ba ka kti jong u kam pat kynriah na phi.”

⁴ Te ki ruh ki la ïa-ong, “Kaei kata ka jingainguh namar ka jingpalat kaba ngin ai ha u?” Te ki la ïathuh, “San tylli ki dur ki jingat lang snam da ka ksiar, bad san tylli ki khnai ksiar, katba kum ka jingkheiñ ki doloi ki Philistia: naba ha phi baroh bad ha ki doloi jong phi, ka la ngat kajuh ka jingpang.

⁵ Namar kata, phin thaw keiñ ïa ki dur jong kita ki jingat lang snam jong phi, bad ïa ki dur jong kita ki khnai jong phi kiba pynjot noh ïa ka khyndew; to ai burom ruh ha U Blei ki Israel: lehse un pynsting ïa la ka kti na phi, bad na kine ki blei jong phi, bad na ka khyndew jong phi.

⁶ Te balei phi pyneh ïa la ki dohnud, kumba ki Ijipt bad u Pharaoh ki la ïa-pyneh ïa ki dohnud jong ki? haba u la leh ïa kaba phylla hapdeng jong ki, ki kim shym la pyllait noh ïa ki paidbah, ki ruh ki la leit noh?

⁷ Mynta te, to phin thaw ïa ka kali ka bathymmai, to shim ruh ar tylli ki masi ai dud, ha kiba ym shym la buh ïa ka lyngkor, to teh ruh ïa kita ki masi ha kata ka kali bad to wallam noh ïa ki khun masi na ki sha ïing;

⁸ phin shim ruh ïa ka synduk U Trai, bad phin buh ïa ka halor kata ka kali; te kita ki mar ksiar kiba phi la ai ha u ban long ka jingainguh namar ka jingpalat, phin thep hapoh i synduk bad buh ha krung jong ka; bad to phah noh ïa ka, ba kan leit noh.

⁹ Phin khmih ruh, lada ka leit kiew na kata ka lynti ka phang jong ka hi sha Beth-shemesh, te kumta u la pynngat ma u ïa kane ka jingsniew ka bakhraw halor jong ngi: hynrei, lada em, ngin ïoh tip ba ym dei ka kti jong u ba la shoh ïa ngi; kane ka la shu jia ryngkhat ha ngi.”

¹⁰ Te kita ki rangbah ki la leh kumta; bad ki la shim ar tylli ki masi ai dud, bad ki la teh ïa ki ha kata ka kali, bad ki la set hapoh ïing ïa ki khun jong ki:

¹¹ bad ki la buh ïa ka synduk U Trai halor kata ka kali, bad ita i synduk ruh ba la buh kita ki khnai ksiar bad kita ki dur ki jingat lang snam jong ki.

¹² Bad kita ki masi ki la leit na kaba beit ka lynti sha ka lynti Beth-shemesh; na ka lynti bah keiñ ki la leit, ki da pah keiñ katba ki dang leit, bad kim shym la phai noh sha kamon lymne sha kadiang; kita ki doloi jong ki Philistia ki la bud nadien jong ki haduh ka pud Beth-shemesh.

¹³ Te ki Beth-shemesh ki dang ïa-ot ïa u Kew jong ki ha ka them: bad ki la khmied ïa la ki khmat, bad ki la ïohi ïa kata ka synduk, te ki la kmen haba ki la ïohi ïa ka.

¹⁴ Te kata ka kali ka la poi sha ka lyngkha u Joshua u nong Beth-shemesh, bad ka la sangeh hangta, ha kaba la don u maw uba heh: ki te ki la thlieh ïa ki dieng jong kata ka kali, bad ki la kñia ainguh ïa kita ki masi ban long ka jingainguh thang ha U Trai.

¹⁵ Bad ki Lebi ki la pynhiar ïa ka synduk U Trai, bad ïa ita i synduk iba bad ka, ha iba ki la don kita ki mar ksiar, bad ki la buh ïa ki halor uta u mawbah: bad ki Beth-shemesh ki la ainguh ïa ki jingainguh thang bad ki la kñia ki jingkñia ha U Trai ha kata ka sngi.

¹⁶ Te haba kita ki san ngut ki doloi ki Philistia ki la ïohi ïa kata, ki la leit wan noh sha Ekron ha kata ka sngi.

¹⁷ Bad kita ki dur ki jingat lang snam da ka ksiar kiba ki Philistia ki la ai ban long ka jingainguh namar ka jingpalat ha U Trai ki long kine; namar ka Ashdod kawei, namar ka Gasa kawei, namar ka Ashkelon kawei, namar ka Gath kawei, namar ka Ekron kawei;

¹⁸ bad kita ki khnai ksiar, katba kum ka jingkheiñ ki nongbah ki Philistia baroh kiba la dei ha kita ki san ngut ki doloi, kita ki nongbah ba la ker kynroh bad ki nongrit kiba khlem kynroh ruh: haduh uta u mawbah, ha uba ki la buh ïa ka synduk U Trai, uta u maw u dang sah haduh kane ka sngi keiñ ha ka lyngkha u Joshua u nong Beth-shemesh.

¹⁹ Te U la pynïap ïa ki rangbah Beth-shemesh, namar ba ki la jngoh hapoh ka synduk U Trai, U la pynïap keiñ na kita ki briew hynñiewphew ngut, bad sanphew hajar ki rangbah: bad kita ki briew ki la ïam, namar ba U Trai u la pynïap ïa kita ki briew da ka jingpynïap kaba khraw.

²⁰ Bad ki Beth-shemesh ki la ïa-ong, “Uei uba lah ban ïeng ha khmat une U Trai, une U Blei u bakhuid? Bad sha kino un leit noh na ngi?”

²¹ Te ki la phah ïa ki nonglam-ktien sha ki Kiriath-jearim, ki da ong, “Ki Philistia ki la wallam noh pat ïa ka synduk U Trai; to wan hiar noh, ba phin ïalam noh artet ïa ka sha phi.”