1 SAMUEL 5 - KA BAIBL

Ka Synduk Ka Jutang ha ka ri ki Philistia

¹ Te ki Philistia ki la shim ïa ka synduk U Blei na Ebeneser, bad ki la leit lam noh ïa ka sha Ashdod.

² Bad ki Philistia, haba ki la shim ïa ka synduk U Blei, ki la wallam ïa ka hapoh ka ïing u Dagon, bad ki la buh ïa ka hajan u Dagon.

³ Bad ki Ashdod ha kaba lashai ki la khie dang step, te ha khmih, u Dagon u la kyllon da pyrkup ha ka khyndew ha khmat kata ka synduk U Trai. Te ki la shim ïa u Dagon, bad ki la pynïeng pat ïa u ha la ka jaka.

⁴ Ha kaba lashai pat ki la khie la dang step, te ha khmih, u Dagon u la kyllon da pyrkup ha ka khyndew ha khmat kata ka synduk U Trai; bad ka khlieh u Dagon bad baroh ar ki slakti jong u ki la don ha ka jingryngkang, ba ki la lah dkut noh; ka la sah sa tang ka met hi ha u Dagon.

⁵ Namar kata, kita ki lyngdoh u Dagon, lymne kita kiba ju leit ha ïing u Dagon, kim ïuh ïa ka jingryngkang u Dagon ha Ashdod, haduh kane ka sngi.

⁶ Bad ka kti U Trai ka la ban khia halor ki Ashdod, bad u la pynjot ïa ki bad u la pynngat ïa ka jingpang ba lang snam ha ki, ha Ashdod ruh bad ha ki phang jong ka.

⁷ Te haba ki Ashdod ki la ïohi ba ka la long kumta, ki la ïa-ong, “Kane ka synduk U Blei ki Israel kan ym ïoh sah bad ngi: naba ka kti jong u ka pynshitom eh halor jong ngi, bad halor u blei jong ngi u Dagon.”

⁸ Namar kata, ki la phah ïalum lang sha ki, ïa ki doloi ki Philistia baroh, bad ki la ïa-ong, “Ngin leh kumno ïa kane ka synduk U Blei ki Israel?” Ki te ki la ong, “Ai ba yn bah noh ïa kata ka synduk U Blei ki Israel sha Gath.” Te ki la ïabah noh ïa ka synduk U Blei ki Israel shata.

⁹ Te ynda ki la bah noh ïa ka, ka kti U Trai ka la ïaleh pyrshah ïa kata ka shnong ruh da ka jingpynjot kaba khraw eh: bad u la pynshitom ïa ki rangbah jong kata ka shnong, ki barit bad ki bakhraw, bad ka jingpang ba lang snam ka la mih ha ki.

¹⁰ Kumta, ki la phah lam noh ïa ka synduk U Blei sha Ekron. Te haba ka synduk U Blei ka la poi ha Ekron, ki Ekron ki la lynñiar, ki la ong, “Ki la wallam ïa kane ka synduk U Blei ki Israel ha ngi, ïa ka ban pynïap ïa ngi bad ïa ki briew jong ngi.”

¹¹ Ynda kumta te, ki la phah ïalum lang ïa ki doloi ki Philistia baroh, bad ki la ïa-ong, “To phah noh ïa kane ka synduk U Blei ki Israel, to ai ruh ba kan leit noh pat ha ka jaka jong ka, ba kan ym pynïap ïa ngi, bad ïa ki briew jong ngi:” naba ka la don ka jingpynjot kaba pynïap ha kata ka shnong baroh; ka kti U Blei ka la ban khia eh hangta.

¹² Bad kita ki briew ki bym shym la ïap ki la ngat kata ka jingpang ba lang snam: bad ka jinglynñiar ka shnong ka la leit kiew sha bneng.