1 SAMUEL 4 - KA BAIBL

¹ Bad ka ktien u Samuel ka la wan ha ki Israel baroh. Te ki Israel ki la leit ïaleh thma ïa ki Philistia, bad ki la sher dara hajan ka Ebeneser: ki Philistia ruh ki la sher dara ha Aphek.

Ki Philistia ki knieh ïa Ka Synduk Ka Jutang

² Te ki Philistia ki la khreh riang ïa lade pyrshah ïa ki Israel: te haba ki la ïaleh, la jop ïa ki Israel ha khmat ki Philistia: bad ki la pynïap noh ha madan kumba saw hajar ki briew na ki paidïapom.

³ Te ynda kita ki paidbah ki la ïawan sha ka jaka shong dara, ki tymmen basan jong ki Israel ki la ïa-ong, “Balei U Trai u la shoh ïa ngi mynta ha khmat ki Philistia? Ïa ngin ïaleit shim sha ngi na Sheiloh ïa ka synduk ka jutang U Trai, ba kan wan hapdeng jong ngi, ïa ka ban pynim ïa ngi na ka kti ki nongshun jong ngi.”

⁴ Kumta, u paidbah u la phah sha Sheiloh, bad ki la wallam nangta ïa kata ka synduk ka jutang jong U Trai ki paid, uba shong hapdeng kita ki Kherub: te ki khun u Eli ar ngut, u Hophni bad u Phinehas keiñ, ki la don lem hangta bad ka synduk ka jutang U Blei.

⁵ Te haba ka la wan ka synduk ka jutang U Trai sha ka jaka shong dara, ki Israel baroh ki la risa da ka jingrisa kaba jam, katba ka la sawa pat ka khyndew.

⁶ Te haba ki la ïohsngew ki Philistia ïa ka jingsawa kata ka jingrisa ki la ïa-ong, “Kaei kane ka jingsawa ka jingrisa kaba jam katne ha ka jaka shong dara kine ki Hebru?” Bad ki la tip ba ka synduk U Trai ka la wan poi sha ka jaka shong dara.

⁷ Te ki Philistia ki la sheptieng, naba ki la ong, “U Blei u la wan poi sha kata ka jaka shong dara.” Ki la ong ruh, “Kordit ïa ngi! namar ym shym jia mynno mynno ruh kaba kum kane.

⁸ Kordit ïa ngi! uei u ban pynim ïa ngi na ka kti jong kine ki blei kiba don bor? Dei kine ki blei kiba la shoh ïa ki Ijipt da kita ki jingïapthem baroh ha kata ka ri khlaw.

⁹ To pynïaw phi ïa lade, to long rangbah, ko phi ki Philistia, ïoh phin long shakri ïa kine ki Hebru, kumba ma ki, ki la shakri ïa phi: to long rangbah phi, to ïaleh ruh.”

¹⁰ Bad ki Philistia ki la ïaleh, bad la jop noh ïa ki Israel, bad ki la phet ïap noh uwei uwei baroh sha la ka ïingjaiñ: te ka la long ka jingpynïap kaba khraw eh; naba la kyllon na ki Israel laiphew hajar ki shipai ba ïaleh na tbian.

¹¹ Bad la knieh ïa ka synduk U Blei ruh; bad ïa kita ki ar ngut ki khun u Eli, u Hophni bad u Phinehas, la pynïap noh de.

Ka Jingïap u Eli

¹² Te uwei u briew na ki Benjamin u la phet na uta u paidïapom, bad u la poi sha Sheiloh ha kata ka sngi, uba ki jaiñ jong u la pynkad, bad uba la sum khyndew ha ka khlieh.

¹³ Bad haba u la poi, ha khmih, u Eli u shong ha ka jingshong harud lynti ba u da ap khnang: namar ka dohnud jong u ka la syier shaphang ka synduk U Blei. Te haba uta u briew u la poi sha shnong, bad ba u la pynbna ïa kata, ka shnong baroh ka la lynñiar.

¹⁴ Te haba u Eli u la ïohsngew ïa ka jingsawa kata ka jinglynñiar, u la ong, “Kaei kane ka jingsawa kane ka jingkhihwin?” Te uta u briew u la wan kyrkieh bad u la ïathuh ha u Eli.

¹⁵ Te u Eli u la khyndaiphew phra snem ka rta; bad ki khmat jong u ki la byrïe, ba um lah ïohi shuh.

¹⁶ Bad uta u briew u la ong ha u Eli, “Nga long uta uba la wan na u paidïapom, bad ha kane ka sngi nga la wan phet na uta u paidïapom.” U te u la ong, “Kumno ka la long, ko khun?”

¹⁷ Bad uta uba la wallam khubor u la ïathuh bad u la ong, “Ki Israel ki la phet ïap ha khmat ki Philistia, bad ka la long ka jingpynïap kaba khraw ruh hapdeng u paidbah, ki khun jong me ruh baroh ar ngut, u Hophni bad u Phinehas, ki la ïap, bad ki la knieh ruh ïa ka synduk U Blei.”

¹⁸ Te haba u la ïathuh shaphang ka synduk U Blei, u la kyllon lyndang na kata ka jingshong hajan ka khyrdop, bad la kheiñ ka ryndang jong u, bad u la ïap: naba u la long u briew uba la tymmen, bad uba khia. Te u la lah bishar ïa ki Israel sawphew snem.

¹⁹ Bad ka pyrsa kurim jong u, ka tnga u Phinehas, kaba la punkhun, bad ka la jan kha ruh; te haba ka la ïohsngew ïa kita ki jingbna ba la knieh ïa ka synduk U Blei, bad ba la ïap u kthaw kurim bad u tnga jong ka, ka la dem ïa lade bad ka la kha; naba ki jingsuh khun jong ka ki la jia ha ka.

²⁰ Te hamar ka por ba kan sa ïap, kita ki kynthei kiba la don lem bad ka ki la ïa-ong, “Wat sheptieng; naba pha la kha khun shynrang.” Hynrei, ka kam shym phai ktien, kam shym sngew ruh ïa kata.

²¹ Bad ka la kyrteng ïa u khynnah “u Ikhabod”, da kaba ong, “Kata ka burom ka la jah noh na Israel”: namar ba la knieh ïa ka synduk U Blei, bad namar uta u kthaw kurim jong ka bad u tnga jong ka.

²² Te ka la ong, “Kata ka burom ka la jah noh na Israel; namar ba la knieh ïa ka synduk U Blei.”