1 SAMUEL 31 - KA BAIBL

Ka jingïap u Saul bad ki khun shynrang jong u

¹ Te ki Philistia ki la ïaleh thma ïa ki Israel: bad ki paidïapom ki Israel ki la phet ïap noh ha khmat ki Philistia, bad ki la kyllon ba la pynïap ïa ki ha u lum Gilboa.

² Bad ki Philistia ki la beh eh ïa u Saul bad ki khun shynrang jong u; bad ki Philistia ki la pynïap ïa u Jonathan, bad ïa u Abinadab, bad ïa u Melkhi-shua, ki khun u Saul.

³ Te ka thma ka la nang jur nang jur halor u Saul, bad ki nongsiat khnam ki la lap ïa u; bad u la pisa eh namar kita kiba siat khnam.

⁴ Ynda kumta, u Saul u la ong ha uta uba rah ïa ki atiar jong u, “To sei ïa la ka waitlam, bad to dung peib'la ïa nga da ka; ïoh kine ïa ki bym shym la otsher kin wan bad dung peib'la ïa nga, bad ba kin lehbeiñ ïa nga.” Hynrei, uta u nongrah atiar jong u um treh, namar ba u la sheptieng eh. Namar kata, u Saul u la shim ïa la ka waitlam, bad u la hap halor jong ka.

⁵ Bad haba uta u nongrah atiar jong u, u la ïohi ba u la ïap u Saul, u ruh u la hap ha la ka waitlam, bad u la ïap lem bad u.

⁶ Kumta, u Saul, bad kita ki khun shynrang jong u, bad uta u nongrah atiar jong u, bad ki rangbah jong u baroh, ki la ïaïap-lem bad u ha kata ka sngi.

⁷ Te haba kita ki rangbah Israel kiba sha shiliang kata ka them, bad kita kiba sha shiliang ka Jordan, ki la ïohi ba kita ki paidïapom ki Israel ki la phet ïap, bad ba la ïap u Saul bad ki khun jong u, ki ruh ki la iehnoh noh ïa la ki shnong, bad ki la phet ïap noh; bad ki Philistia ki la ïawan bad ki la shong shnong ha ki.

⁸ Mynstep te, haba ki Philistia ki la wan ïa ka ban loit jaiñ ïa kita ïa kiba la pynïap, ki la shem keiñ ïa u Saul bad ïa kita ki khun shynrang jong u lai ngut ba la kyllon ha u lum Gilboa.

⁹ Te ki la khrai ïa ka khlieh jong u, bad ki la loit noh ïa ki atiar jong u, bad ki la phah sha ka ri ki Philistia baroh kylleng, ïa ka ban pynbna ïa kata ha ki ïing ki bleithaw jong ki, bad ha ki paidbah.

¹⁰ Bad ki la buh ïa ki atiar jong u ha ka ïing ki Ashtaroth: te ïa ka met jong u ki la sahnar ha ka kynroh ka Beth-shan.

¹¹ Te haba ki nong Jabesh-gilead ki la ïohsngew shaphang jong u ïa kaba ki la leh ki Philistia ha u Saul,

¹² ki rangbah badonbor baroh ki la ïaïeng, bad ki la ïaid baroh shi miet, bad ki la shim noh ïa ka met u Saul bad ïa ki met ki khun jong u na kata ka kynroh ka Beth-shan; bad haba ki la wan poi sha Jabesh, ki la thang ïa ki hangta.

¹³ Te ki la shim ïa ki shyieng jong ki, bad ki la tep ïa ki hapoh uwei u dieng ha Jabesh, bad ki la ïashah jingit hynñiew sngi.