1 SAMUEL 30 - KA BAIBL

U Dabid u jop ïa ki Amalek

¹ Te hamar kaba u Dabid bad u paidbah jong u ki la ïawan poi sha Siklag ha ka sngi ka balai, ki Amalek ki la lah hiar thma sha ka phang shathie, bad ha Siklag, bad ki la jop ïa ka Siklag, bad ki la thang ïa ka da ka ding;

² bad ki la ring mraw ruh ïa ki kynthei bad baroh kiba ha ka, u barit bad u bakhraw: te kim shym pynïap ïano ïano ruh, hynrei, ki la shu shim noh ïa ki, bad ki la leit noh.

³ Te haba u Dabid bad ki briew jong u ki la poi sha kata ka shnong, ha khmih la lah thang ïa ka da ka ding; bad la ring mraw ïa ki tnga jong ki, bad ïa ki khun shynrang jong ki, bad ïa ki khun kynthei jong ki.

⁴ Ynda kumta, u Dabid bad uta u paidbah uba bad u, ki la pynjam ïa la ka ktien bad ki la ïam, haduh ba kim don bor shuh ban ïam.

⁵ La ring mraw ruh ïa kita ki ar ngut ki tnga u Dabid, ka Ahinoam ka nong Jesril, bad ka Abigail ka tnga u Nabal u nong Karmel.

⁶ Te u Dabid u la sngewpisa eh; naba kita ki paidbah ki la ïa-ong ban lynthem maw ïa u, namar ki mynsiem jong kita ki briew baroh ki la kthang, uwei pa uwei namar la ki khun shynrang bad namar la ki khun kynthei; hynrei, u Dabid u la pynkhlaiñ ïa lade ha U Trai U Blei jong u.

⁷ Bad u Dabid u la ong ha u Abiathar lyngdoh, u khun u Ahimelekh, “Nga kyrpad ïa me, to wallam shane sha nga ïa kata ka ephod.” Bad u Abiathar u la wallam ïa kata ka ephod ha u Dabid.

⁸ Te u Dabid u la kylli na U Trai, u da ong, “Lada ngan beh nadien une u paid, ngan lap ïa u ne em?” U ruh U la ïathuh ha u, “To beh; namar men lap shisha, bad da shisha men ïoh pat ïa kiei kiei baroh.”

⁹ Kumta, u Dabid u la leit, ma u bad kita ki hynriewspah ngut kiba bad u, bad ki la poi sha ka wah Besor, ha kaba ki la shong kita ïa kiba la iehnoh sah.

¹⁰ Hynrei, u Dabid te u la beh, ma u bad sawspah ngut ki rangbah: naba arspah ngut ki la sah shadien, ba ki la thait eh ba kim lah shuh ban leit shiliang ka wah Besor.

¹¹ Te ki la shem ïa uwei u kynja Ijipt ha lum, bad ki la wallam ïa u ha u Dabid, bad ki la ai kpu ïa u ba un bam, bad u la bam; bad ki la ai um dih ruh ïa u:

¹² bad ki la ai ha u shi dkhot u 'pu stang soh Dumbur, bad ar rynjup ki soh Kismis; te haba u la lah bam, ka mynsiem jong u ka la wan pat ha u: namar um shym la bam kpu, lymne dih um, la lai sngi bad lai miet.

¹³ Te u Dabid u la kylli ïa u, “Ma me u jongno? Bad me uba nangno?” U te u la ïathuh, “Nga u samla uba na ka ri Ijipt, u shakri jong u nong Amalek; te u kynrad jong nga u la iehnoh noh ïa nga, namar ba nga la pang noh mynta la lai sngi.

¹⁴ Te ngi la hiar thma ïa ka shathie jong ki Khereth, bad ïa ka jong ka Judah, bad ïa ka phang shathie jong u Kaleb; bad ïa ka Siklag ngi la thang da ka ding.”

¹⁵ Te u Dabid u la kylli ïa u, “Me lah ban ïalam arsut ïa nga sha une u paid?” U ruh u la ïathuh, “To smai ha nga ha U Blei, ba men ym pynïap ïa nga, lymne aiti noh ïa nga ha ka kti uta u kynrad jong nga, bad nga ruh ngan ïalam arsut ïa me sha une u paid.”

¹⁶ Te haba u la ïalam arsut ïa u, ha khmih, ki la phriang ïa lade ha kata ka jaka baroh, ki da bam, bad ki da dih, bad ki da khawai de, namar kata ka jinglute kaba khraw baroh ïa kaba ki la shim na ri ki Philistia, bad na ka ri Judah.

¹⁷ Bad u Dabid u la pom noh ïa ki naduh janmiet haduh kaba la noh ka sngi lashai; te ym shym la lait noh uwei na ki, hynrei, tang sawspah ngut ki samla, kiba la shong halor ki ut bad ki la phet ïap noh.

¹⁸ Bad u Dabid u la ïoh pat ïa kiei kiei baroh kiba ki la lah shim ki Amalek: bad u Dabid u la pynim pat ïa la ki tnga baroh ar ngut.

¹⁹ Te kim shym la duna ei ei ruh, lymne ka barit lymne ka bakhraw, lymne u khun shynrang lymne ka khun kynthei, lymne ka jinglute, lymne kaei kaei ruh na kita kiba ki la shim noh: u Dabid u la wallam pat ïa kiei kiei baroh.

²⁰ Bad u Dabid u la shim noh ruh ïa ki langbrot baroh bad ïa ki masi, ïa kiba ki la ñiah ha shuwa kita kiwei ki jingri, bad ki la ïa-ong, “Kane ka jinglute u Dabid.”

²¹ Te u Dabid u la wan poi sha kita ki arspah ngut ki rangbah, kiba la thait eh ba kumta te kim lah shuh ban bud ïa u Dabid, bad ba la pynsah ïa ki ha kata ka wah Besor: ki ruh ki la ïamih ban leit tan ïa u Dabid, bad ban tan ïa uta u paidbah uba la don lem bad u: bad haba u Dabid u la wan hajan uta u paidbah, u la khublei ïa ki.

²² Ynda kumta, kita ki riewbymman baroh bad kita ki riew Belial na kita kiba la leit lem bad u Dabid, ki la ïathuh bad ki la ïa-ong, “Namar ba kine kim shym leit lem bad ngi, ngi ruh ngin ym ai ha ki na kane ka jinglute ïa kaba ngi la ïoh pat, hynrei, ïa uwei pa uwei tang ïa la ka tnga bad ki khun, ba kin shim noh ïa kita, bad kin leit noh keiñ.”

²³ Ynda kumta, u Dabid u la ong, “Ko ki para jong nga, phin ym leh kumta ïa kata kaba u la ai U Trai ha ngi, uba la sumar ïa ngi, bad uba la aiti noh ha ka kti jong ngi ïa uta u paidbah uba la wan ïaleh ïa ngi.

²⁴ Bad uei u ban shahshkor ïa phi ha kane ka kam? naba kumba long ka bynta jong uta uba leit hiar ha ka thma, kumta hi keiñ kan long ka bynta jong uta uba sah bad ki jingbuh jingsat; kin ïasam mar kumjuh keiñ.”

²⁵ Te naduh kata ka sngi, u la buh ïa kane ban long ka aiñ bad ka rukom ha Israel, haduh kane ka sngi.

²⁶ Bad haba u Dabid u la poi sha Siklag, u la phah ai na kata ka jinglute ha ki tymmen basan ka Judah, kata, ha kita ki lok jong u, u da ong, “Ha khmih kane ka jingai sngewbha ha phi na ka jinglute ki nongshun U Trai;”

²⁷ ha kiba ha Bethel, bad ha kiba ha Ramoth kaba shaphang shathie, bad ha kiba ha Jattir;

²⁸ bad ha kiba ha Aroer, bad ha kiba ha Siphmoth, bad ha kiba ha Eshtemoa;

²⁹ bad ha kiba ha Rakhal, bad ha kiba ha ki nongbah ki Jerahmil, bad ha kiba ha ki nongbah ki Ken;

³⁰ bad ha kiba ha Hormah, bad ha kiba ha Khorashan, bad ha kiba ha Athak;

³¹ bad ha kiba ha Hebron, bad ha kita ki jaka baroh ha kiba u Dabid bad u paidbah jong u ki la ju shong ha ki.