1 SAMUEL 3 - KA BAIBL

U Trai U khot ïa u Samuel

¹ Bad uta u khynnah, u Samuel u la shakri ïa U Trai ha khmat u Eli. Bad ka ktien U Trai ka la long ka bakordor ha kita ki sngi; ym shym don ka jingithuhpaw kaba shynna.

² Te ha kata ka por, mynba u Eli u dang thiah ha la ka jaka, haba ki khmat jong u ki la sdang ban byrïe, ba um lah ban ïohi,

³ bad haba ym pat lip ka sharak U Blei ha ka templ U Trai, ha kaba la don ka synduk U Blei, u Samuel ruh u la thiah;

⁴ kumta, U Trai u la khot ïa u Samuel: u ruh u la ong, “Nga hangne.”

⁵ Bad u la phet sha u Eli, bad u la ong, “Nga hangne: ba me la khot ïa nga.” U te u la ong, “Ngam shym khot; leit thiah pat.” Bad u la leit bad u la thiah.

⁶ Te U Trai u la nang khot ïa u pat, “Samuel.” Bad u Samuel u la khie bad u la leit sha u Eli, bad u la ong, “Nga hangne; ba me la khot ïa nga.” U te u la ong, “Ngam shym khot, ko khun; leit thiah pat.”

⁷ Te u Samuel um pat shym la ithuh ïa U Trai, lymne ym pat shym la pynpaw ha u ïa ka ktien U Trai.

⁸ Bad U Trai u la khot pat ïa u Samuel ka balai sien. Bad u la khie bad u la leit sha u Eli, bad u la ong, “Nga hangne; ba me la khot ïa nga.” Te u Eli u la tip ba dei U Trai uba la khot ïa u khynnah.

⁹ Namar kata, u Eli u la ong ha u Samuel, “Khie leit thiah: te lada un khot ïa me, to ong, ‘Kren, ko Trai; naba u shakri jong me u ïohsngew.’ ” Kumta, u Samuel u la leit bad u la thiah ha la ka jaka.

¹⁰ Bad U Trai u la wan, bad U la ïeng, bad U la khot kumba mynshuwa, “Samuel, Samuel.” Te u Samuel u la ong, “To kren; naba u shakri jong me u ïohsngew.”

¹¹ Te U Trai u la ong ha u Samuel, “Ha khmih, ngan sa leh ei ei ha Israel, ha kaba uno uno baroh haba un ïohsngew ïa ka, kin kyllut noh ngiang ki shkor jong u baroh ar.

¹² Ha kata ka sngi ngan pyndep noh halor u Eli ïa kita kiei kiei baroh kiba nga la kren shaphang ka ïing jong u, naduh kaba sdang haduh ka bakut.

¹³ Namar nga la ong ha u hi ba ngan bishar pynrem junom ïa ka ïing jong u, namar kata ka jingbymman kaba u tip ma u, naba ki khun jong u ki la pynlong ka jingtim ïa lade, u te um shym la khang ïa ki.

¹⁴ Namar kata, nga la smai ha ka ïing u Eli, ba yn ym sait ïa ka jingbymman ka ïing u Eli da ka jingkñia lymne da ka jingainguh junom.”

¹⁵ Te u Samuel u la thiah haduh mynstep, bad u la plie ïa ki jingkhang ka ïing U Trai. U Samuel te u la sheptieng ban ïathuh ïa kata ka jingithuhpaw ha u Eli.

¹⁶ Te u Eli u la khot ïa u Samuel, bad u la ong, “Ko Samuel, u khun jong nga,” u ruh u la ong, “Nga hangne.”

¹⁷ Bad u la ong, “Kaei kata kaba U Trai u la kren ha me? Nga kyrpad ïa me wat buhrieh ïa ka na nga: U Blei un leh kumne ïa me, bad tam ruh, lada men buhrieh ei ei na nga na kita kiei kiei baroh kiba u la kren ha me.”

¹⁸ Te u Samuel u la ïathuh ha u ïa kiei kiei baroh, bad um shym la buhrieh ei ei ruh na u. U te u la ong, “U long U Trai; to un leh ïa kaba u hi u sngewbha.”

¹⁹ Bad u Samuel u la nang roi, bad U Trai u la don lem bad u, bad um shym shah ïa kawei na ki ktien jong u ban hap duh noh.

²⁰ Te ki Israel baroh naduh Dan haduh Beer-sheba ki la tip ba la pynskhem ïa u Samuel ban long u nongïathuhlypa jong U Trai.

²¹ Bad U Trai u la paw pat ha Sheiloh: naba U Trai u la pynpaw ïa lade ïa u Samuel ha Sheiloh da ka ktien U Trai.