1 SAMUEL 29 - KA BAIBL

Ki Philistia kim shaniah ïa u Dabid

¹ Te ki Philistia ki la lum lang ïa ki paidïapom jong ki baroh sha Aphek: bad ki Israel ki la ïashong dara hajan ka pukri kaba ha Jesril.

² Te ki nongïalam ki Philistia ki la ïaïaid riang riang shispah shispah bad shi hajar shi hajar: bad u Dabid bad u paid jong u ki la ïaid khatduh lem bad u Akhish.

³ Ynda kumta, kita ki nongïalam ki Philistia ki la ïa-ong, “Kine ki Hebru ki lei hangne!” Te u Akhish u la ïathuh ha kita ki nongïalam ki Philistia, “Une um long u Dabid, u shakri u Saul u syiem ki Israel, uba la don lem bad nga kine ki sngi lane kine ki snem, bad ka pop ei ei ngam shym shem ha u naduh ba u la wanhap ha nga jin haduh kane ka sngi?”

⁴ Te kita ki nongïalam ki Philistia ki la bitar lep ïa u; bad kita ki nongïalam ki Philistia ki la ïa-ong ha u, “To pynphai noh ïa une u briew sha kata ka jaka kaba me la buh ïa u, bad wat ai ba un leit hiar bad ngi sha ka thma, ba ïoh un kylla nongïaleh pyrshah ïa ngi ha kata ka thma: namar da ei un pynsngewbha ïa la u kynrad? ym long keiñ da ki khlieh jong kine ki briew?

⁵ Balei, une um long uta u Dabid ïa uba ki la ïarwai markylliang ha kita ki jingshad, ki da ïa-ong, “ ‘U Saul u la pynïap ïa la ki hajar, bad u Dabid ïa la ki phew hajar?’ ”

⁶ Ynda kumta, u Akhish u la khot ïa u Dabid, bad u la ong ha u, “Katba im U Trai, me la long u bahok, bad ka jingmih shabar jong me bad ka jingwan shapoh jong me lem bad nga ha ka jaka shong dara ka la long kaba sngewbha ha khmat jong nga: namar ngam shym shem ïa ka pop ei ei ha me naduh kata ka sngi kaba me la wan sha nga haduh kane ka sngi: hynrei, kine ki doloi kim sngewbha ïa me.

⁷ Namar kata te, to leit phai pat ha kaba suk, ba men ym pynsngewsih ïa ki doloi ki Philistia.”

⁸ Te u Dabid u la ïathuh ha u Akhish, “Hato nga la leh aïu ma nga? bad me la shem aïu ha la u shakri katba nga la wan ha khmat jong me haduh kane ka sngi, ba ngam ïoh leit ban ïaleh thma ïa ki nongshun u syiem kynrad jong nga?”

⁹ Te u Akhish u la ïathuh bad u la ong ha u Dabid, “Nga tip keiñ ba me long u babha ha khmat jong nga, kum u angel U Blei keiñ: hynrei, kine ki nongïalam ki Philistia ki la ong, ‘Un ym ïoh leit kiew bad ngi sha kane ka thma.’

¹⁰ Namar kata te, to khie la dang step bad kita ki shakri u kynrad jong me kiba la wan lem bad me: bad haba phi la khie dang step, bad ba ka shai, te phin leit noh keiñ.”

¹¹ Kumta, u Dabid u la khie la dang step, ma u bad uta u paidbah jong u, ïa ka ban leit noh mynstep, ban leit phai pat sha ka ri ki Philistia. Bad ki Philistia ki la leit kiew sha Jesril.