1 SAMUEL 28 - KA BAIBL

¹ Te ha kita ki sngi, ki Philistia ki la lum lang ïa la ki paidïapom ïa ka thma, ïa ka ban ïaleh thma ïa ki Israel. Bad u Akhish u la ong ha u Dabid, “To tip skhem, ba men leit mih noh bad nga ha u paidïapom; ma me bad ki rangbah jong me keiñ.”

² Te u Dabid u la ong ha u Akhish, “Kumta te men ïoh tip keiñ ïa kaba u shakri jong me un leh.” Bad u Akhish u la ong ha u Dabid, “Namar kata, ngan buh ïa me u nongsumar ïa ka khlieh jong nga junom.”

U Saul bad ka nongkren byrtong ha Endor

³ Te u Samuel u la lah ïap noh, bad ki Israel baroh ki la lah ïambriew ïa u, bad ki la tep ïa u ha Ramah, ha ka shnong jong u hi keiñ. Bad u Saul u la lah beh noh na kata ka ri ïa kiba shong ksuid, bad ïa kiba kren byrtong.

⁴ Te ki Philistia ki la ïalum khar paid, bad ki la ïawan bad ki la shong dara ha Shunem: bad u Saul u la lum khar paid ïa ki Israel baroh, bad ki la ïashong dara ha Gilboa.

⁵ Te haba u Saul u la ïohi ïa ka jaka shong dara jong ki Philistia, u la khaw-eit, bad ka dohnud jong u ka la sheptieng shikatdei eh.

⁶ Bad haba u la kylli na U Trai, U Trai um shym ïathuh ha u, lymne da ki jingphohsniew, lymne da ki Urim, lymne da ki nongïathuhlypa de.

⁷ Ynda kumta, u Saul u la ong ha la ki shakri, “To wad keiñ ha nga da ka kynthei kaba shong ksuid, ba ngan ïoh leit sha ka, bad ba ngan kylli na ka.” Bad kita ki shakri jong u ki la ïathuh ha u, “Ha khmih, ka don kawei ka kynthei kaba shong ksuid ha Endor.”

⁸ Bad u Saul u la pynpher ïa lade, bad u la kup da kiwei pat ki jaiñ, bad u la leit, ma u bad ar ngut ki rangbah lem bad u, bad ki la poi sha kata ka kynthei mynmiet. Bad u la ong ha ka, “Nga kyrpad ïa pha, to kylli ksuid ïa nga, bad to pynmih ha nga ïa uta uba ngan ïathuh ha pha.”

⁹ Te kata ka kynthei ka la ïathuh ha u, “Ha khmih, me tip ïa kaba u la leh u Saul, uba la pynduh noh na kane ka ri ïa kiba shong ksuid, bad ïa kiba kren byrtong: namar kata, balei ba me buh ïa ka jingriam ïa ka jingim jong nga, ïa ka ban pynïap ïa nga?”

¹⁰ Te u Saul u la smai ha ka ha U Trai, u da ong, “Katba im U Trai, kan ym jia ei ei ka jingpynshitom ïa pha namar kane ka kam.”

¹¹ Ynda kumta, kata ka kynthei ka la kylli ïa u, “Ïano ngan pynmih ha me?” U te u la ïathuh, “To pynmih ha nga ïa u Samuel.”

¹² Bad haba kata ka kynthei ka la ïohi ïa u Samuel, ka la lynñiar da ka ktien kaba jam: bad kata ka kynthei ka la kren ha u Saul, ka da ong, “Balei me la shukor ïa nga? Naba me long u Saul hi.”

¹³ Te u syiem u la ong ha ka, “Wat sheptieng: namar pha ïohi aïu?” Bad kata ka kynthei ka la ïathuh ha u Saul, “Nga la ïohi ki blei ba ki mih na ka khyndew.”

¹⁴ U ruh u la kylli ïa ka, “Ka dur kaba kumno u don?” Te ka la ïathuh, “U kynja riewtymmen u mih artet; bad u kup da ka barandi.” Te u Saul u la tip ba u long u Samuel, bad u la dem ngon haduh khyndew, bad u la nguh.

¹⁵ Te u Samuel u la ong ha u Saul, “Balei ba me la pynkhih ïa nga, ïa ka ban pynmih ïa nga?” Te u Saul u la ïathuh, “Ma nga, nga la shipa noh khop; namar ki Philistia ki ïaleh thma ïa nga, bad U Blei u la kynriah noh na nga, bad um ïathuh shuh ïa nga, lymne da ki nongïathuhlypa, lymne da ki jingphohsniew; namar kata, nga la khot ïa me, ba men pyntip ïa nga ïa kaei kaba nga dei ban leh.”

¹⁶ Ynda kumta, u Samuel u la ong, “Na ka balei te ba me ïakylli na nga, haba U Trai u la kynriah noh na me, bad u la jia long u nongïaleh ïa me?

¹⁷ U Trai shisha u la leh na ka bynta ïa lade, kat kumba u la kren da nga: namar U Trai u la kad noh ïa ka jinglong syiem na ka kti jong me, bad u la aiti ïa ka ha u paramarjan jong me, ha u Dabid keiñ.

¹⁸ Namar ba mem shym la shahshkor ma me ïa ka ktien U Trai, bad ba mem shym la pyndep ïa ka jingbitar ba-meh lep jong u halor ki Amalek, namar kata keiñ, ba U Trai u la leh ïa kane ha me ha kane ka sngi.

¹⁹ U Trai un aiti noh ruh ïa ki Israel lem bad me ha ka kti ki Philistia: bad lashai ma me bad kita ki khun shynrang jong me phin ïalong bad nga; U Trai un aiti noh ruh ïa ki paidïapom ki Israel ha ka kti ki Philistia.”

²⁰ Hangta te u Saul u la kyllon kynsan kram ha khyndew, bad u la sheptieng shikatdei eh, namar kita ki ktien u Samuel: te um shym don bor shuh ha u; namar um shym la bam jingbam baroh kata ka sngi, bad baroh kata ka miet.

²¹ Te kata ka kynthei ka la wan sha u Saul, bad ka la ïohi ba u la sngewtriem shikatdei, bad ka la ong ha u, “Ha khmih, ka shakri jong me ka la shahshkor ïa ka ktien jong me, bad nga la kheiñduh ïa la ka jingim, bad nga la kohnguh ïa kita ki ktien kiba me la kren ha nga.

²² Mynta, namar kata, ma me ruh, nga kyrpad ïa me, to shahshkor ïa ka ktien ka shakri jong me, bad to shah ïa nga ban buh ha khmat jong me shikyntien u kpu; bad to bam, ba men ïoh bor ha me, haba me leit sha la ka jingleit.”

²³ Hynrei, um treh, bad u la ong, “Ngan ym bam.” Hynrei, ki shakri jong u, bad kata ka kynthei, ki la pynbor ïa u; bad u la shahshkor ïa ka ktien jong ki. Bad u la ïeng na ka khyndew, bad u la shong ha kata ka jingthiah.

²⁴ Te kata ka kynthei ka la don u khun masi basngaid ha ïing; bad ka la pynkloi, bad ka la pynïap ïa u: bad ka la shim ïa u 'purew, bad ka la khleh ïa u, bad ka la shet da uta ïa u kpu bakhlem thiat:

²⁵ bad ka la wallam ha khmat u Saul, bad ha khmat ki shakri jong u; ki te ki la ïabam. Ynda kumta, ki la ïeng, bad ki la leit noh ha kata hi ka miet.