1 SAMUEL 26 - KA BAIBL

U Dabid u pyllait im sa shi sien pat ïa u Saul ha Siph

¹ Te ki Siph ki la wan sha u Saul ha Gibeah, ki ïa-ong, “U Dabid um buhrieh ïa lade ha i lum Hakhilah, ha marpyrshah ka Jeshimon?”

² Ynda kumta, u Saul u la ïeng, bad u la leit hiar sha ka ri khlaw Siph, u da don lem bad u lai hajar ki rangbah ba la kynsai na ki Israel, ïa ka ban wad ïa u Dabid ha ka ri khlaw Siph.

³ Te u Saul u la shong dara ha ita i lum Hakhilah, iba ha marpyrshah ka Jeshimon, hajan ka lynti. Hynrei, u Dabid u la shong ha kata ka ri khlaw, bad u la ïohi ïa u Saul ba u wan wad ïa u sha ka ri khlaw.

⁴ Namar kata, u Dabid u la phah ïa ki nongsyntiat, bad u la ïoh tip ba u Saul u la wan shisha.

⁵ Te u Dabid u la ïeng, bad u la wan poi sha kata ka jaka ha kaba u Saul u shong dara: bad u Dabid u la ïohi ïa ka jaka ha kaba u Saul u la thiah, bad u Abner u khun u Ner, u nongïalam u paidïapom jong u: te u Saul u la thiah hapdeng ka jaka shong dara, bad u paidbah u shong dara baroh sawdong ïa u.

⁶ Ynda kumta, u Dabid u la kren bad u ong ha u Ahimelekh uba kynja Hit, bad ha u Abishai u khun ka Seruïah, u para u Joab, u da ong, “Uei u ban leit hiar bad nga sha u Saul ha kata ka jaka shong dara?” Te u Abishai u la ïathuh, “Ngan leit hiar ma nga bad me.”

⁷ Kumta, u Dabid bad u Abishai ki la wan poi sha uta u paidbah mynmiet: te, ha khmih, u Saul u thiah ba u da ïohthiah ha kata ka jaka shong dara, bad u sum jong u ba la sieh ha ka khyndew hajan ka syngkhlieh jong u: bad u Abner bad uta u paidbah ki thiah baroh sawdong ïa u.

⁸ Ynda kumta, u Abishai u la ong ha u Dabid, “U Blei ha kane ka sngi u la aiti ïa u nongshun jong me ha ka kti jong me: mynta te namar kata, to shah ïa nga, nga kyrpad ïa me, ba ngan sum syndon ïa u da une u sum haduh khyndew, te ngan ym sum ar sien ïa u.”

⁹ Te u Dabid u la ong ïa u Abishai, “Wat pynjot ïa u: naba uei ba lah ban rah ïa la ka kti pyrshah ïa uba la sleh jong U Trai khlem kit pop?”

¹⁰ U Dabid u la ong ruh, “Katba im U Trai, U Trai hi un shoh ïap ïa u; lane kan poi hi ka sngi jong u ïa ka ban ïap; lane un hiar thma, bad un ïap.

¹¹ To U Trai un ri kyndong ïa nga ba ngan ym rah ïa la ka kti pyrshah ïa uba la sleh jong U Trai: hynrei, nga kyrpad ïa me, to shim noh mynta ïa uta u sum uba hajan ka syngkhlieh jong u, bad ïa uta u khiew um, bad ngin ïaleit noh.”

¹² Bad u Dabid u la shim noh ïa uta u sum bad ïa uta u khiew um najan ka syngkhlieh u Saul; bad ki la leit noh, te ym don ba la ïohi, lymne ba la tip, lymne kiba la peit: naba ki la ïohthiah baroh; namar U Trai u la pynïohthiah lyngngai ïa ki.

¹³ Ynda kumta, u Dabid u la leit sha shiliang, bad u la ïeng halor uwei u lum na jngai: te ki la ïakham jngai shibun:

¹⁴ te u Dabid u la pyrta ïa uta u paidbah, bad ïa u Abner u khun u Ner, u da ong, “Mem thie balei, Abner?” Ynda kumta, u Abner u la ïathuh bad u la ong, “Me uei uba pyrta kumta ha u syiem?”

¹⁵ Te u Dabid u la ong ha u Abner, “Hato me mem long rangbah? Bad uei uba kat ma me ha Israel? Te balei ba mem shym la sumar ïa la u kynrad u syiem? Naba u la rung uwei na u paidbah ïa ka ban pynïap ïa u syiem u kynrad jong me.

¹⁶ Kane kaba me la leh kam long ka babha keiñ. Katba im U Trai, phi ki briew kiba dei hok ban ïap noh, namar ba phim shym la sumar ïa la u kynrad, uba la sleh jong U Trai keiñ. Te mynta, to khmih, hangno uta u sum jong u syiem, bad uta u khiew um uba hajan ka syngkhlieh jong u.”

¹⁷ Te u Saul u la sngewthuh ïa ka jingsawa u Dabid, bad u la ong, “Kane ka jingsawa jong me, ko Dabid u khun jong nga?” Bad u Dabid u la ïathuh, “Ka long ka jingsawa jong nga, ko syiem kynrad.”

¹⁸ U la ong ruh, “Namar balei ba u kynrad jong nga u beh nadien u shakri jong u? namar ba nga la leh aïu? lane ka basniew aïu ka don ha ka kti jong nga?

¹⁹ Namar kata te, nga kyrpad ïa me, ko syiem kynrad jong nga, to sngap ïa ki ktien u shakri jong me. Lada dei U Trai uba la pynkhih ïa me pyrshah ïa nga, to un pdiang ïa ka jingkñia: hynrei, lada ki dei ki khun ki briew, to kin long kiba la tim ha khmat U Trai; namar ki la beh noh ïa nga ha kane ka sngi ba ngam ïoh shongneh ha ka jingïoh kynti U Trai, ki ïa-ong, ‘Khie leit shakri ïa kiwei pat ki blei.’

²⁰ Te namar kata, wat ai ïa ka snam jong nga ba kan hap ha ka khyndew shawei shawei na khmat U Trai: naba u syiem ki Israel u la wan mih noh ïa ka ban wad ïa u thyllah, kumba uwei u beh ïa ka 'iar khlaw ha ki lum.”

²¹ Ynda kumta, u Saul u la ong, “Nga la leh pop; to wan phai noh, ko Dabid u khun jong nga: namar ngan ym pynsniew shuh ïa me, naba ka jingim jong nga ka la long ka bakordor ha khmat jong me ha kane ka sngi: ha khmih, nga la leh bieit, bad nga la leh bakla shikatdei.”

²² Te u Dabid u la ïathuh bad u la ong, “Ha khmih ïa u sum, ko syiem! to un wan sha shiliang uwei na kita ki samla ban shim noh ïa u.

²³ Te U Trai un ai ïa uwei pa uwei baroh ïa ka hok jong u bad ka jingïaineh jong u: namar U Trai u la aiti noh ïa me ha ka kti jong nga ha kane ka sngi, hynrei, nga ngam treh ban rah ïa la ka kti pyrshah ïa uba la sleh jong U Trai.

²⁴ Te, ha khmih, kumba ka jingim jong me ka la long ka bakordor ha khmat jong nga ha kane ka sngi, kumta to ai ba ka jingim jong nga kan long ka bakordor ha khmat U Trai, bad to ai ba un pyllait ïa nga na ki jingshipa khop baroh.”

²⁵ Ynda kumta, u Saul u la ïathuh ha u Dabid, “To long ma me ïa uba la kyrkhu, ko Dabid, u khun jong nga: ma me men ïoh leh ïa ki kam kiba khraw, bad men nang jop nang jop ruh.” Kumta, u Dabid u la leit sha la ka lynti, bad u Saul u la leit phai noh sha la ka jong ka jaka.