1 SAMUEL 25 - KA BAIBL

U Dabid bad ka Abigail

¹ Te u Samuel u la ïap noh; bad ki Israel baroh ki la ïalum lang, bad ki la ïambriew ïa u, bad ki la tep ïa u ha ka ïing jong u ha Ramah. Bad u Dabid u la ïeng, bad u la leit hiar sha ri khlaw Paran.

² Te la don uwei u briew ha Maon, uba la don la ki spah jong u ha Karmel; te uta u briew u la khraw bor eh, bad u la don lai hajar ki langbrot, bad shi hajar ki blang: te u la dang ot shñiuh ïa la ki langbrot ha Karmel.

³ Te ka kyrteng uta u briew ka la long “u Nabal”; bad ka kyrteng ka tnga jong u “ka Abigail”: te kata ka briew ka la long kaba nang kaba sian, bad kaba bhabriew de: hynrei, uta u briew u la long uba eh runar, bad uba bymman ka jingleh jong u; bad u la long na ka ïing u Kaleb.

⁴ Te u Dabid u la ïohsngew ha kata ka ri khlaw ba u Nabal u dang ot shñiuh ïa la ki langbrot.

⁵ Bad u Dabid u la phah shiphew ngut ki samla, bad u Dabid u la ong ha kita ki samla, “Khie leit kiew sha Karmel bad leit ha u Nabal, bad to khublei ïa u ha ka kyrteng jong nga:

⁶ bad kumne phin ong ha uta uba im suk, ‘To long ka jingsuk ïa me, bad ka jingsuk ha ka ïing jong me, bad ka jingsuk ha kiei kiei baroh ki jong me.

⁷ Te mynta nga la ïohsngew ba me don kiba khap shñiuh: ki nongaplangbrot jong me ki la don bad ngi, te ngim shym lehbeiñ ïa ki, bad baroh kita ki sngi ba ki la don ha Karmel, kim shym la jah ei ei ruh em.

⁸ To kylli ïa la ki samla, te kin ïathuh ïa me: namar kata, to ai ba kine ki samla kin shem ka jingsngewbha ha khmat jong me; namar ngi la wan, ha ka sngi ka babha: to ai, nga kyrpad ïa me, ïa kaei kaei kaba ha ka kti jong me, ha ki shakri jong me, bad ha u Dabid u khun jong me.’ ”

⁹ Te haba kita ki samla u Dabid ki la poi, ki la ïathuh ha u Nabal katba kum kita ki ktien baroh ha ka kyrteng u Dabid, bad ki la sngap jar.

¹⁰ Te u Nabal u la ïathuh ha kita ki shakri u Dabid, bad u la ong, “U Dabid u long uei? Bad uei u khun u Jesse? don bun ki shakri ha kine ki sngi kiba phet noh uwei pa uwei na la u kynrad.

¹¹ Ngan shim ïa la u kpu, bad ïa la ka um, bad ïa la ka doh ïa kaba nga la shohdoh ïa la ki nongkhap shñiuh, bad ai ïa ki ha ki briew ïa kiba ngam tip ki nangno?”

¹² Kumta, kita ki samla u Dabid ki la phai noh, bad ki la leit wan noh, bad ki la poi bad ki la ïathuh ha u ïa kita ki ktien baroh.

¹³ Te u Dabid u la ong ïa la u paidbah, “To kieng uwei pa uwei ïa la ka waitlam.” Bad ki la kieng uwei pa uwei baroh ïa la ka waitlam; bad u Dabid ruh u la kieng ïa la ka waitlam: te ki la leit kiew kumba sawspah ki briew hadien u Dabid; bad arspah ngut ki la sah bad ki jingbuh jingsat.

¹⁴ Te uwei na kita ki samla u la ïathuh ha ka Abigail, ka tnga u Nabal, u da ong, “Ha khmih, u Dabid u la phah ïa ki nongkit-ktien na ka ri khlaw ban khublei ïa u kynrad jong ngi; hynrei, u la krenbeiñ sat ïa ki:

¹⁵ hynrei, kita ki briew ki la leh bha shibun ïa ngi; bad ym shym la lehbeiñ ïa ngi, lymne ym shym jah ei ei ka jong ngi katba ngi la ïashong hajan jong ki, mynba ngi la don ha lyngkha:

¹⁶ ki la long kum ka kynroh ker ïa ngi mynmiet bad mynsngi, baroh kita ki sngi ba ngi la don lem bad ki ba ngi da sumar ïa ki langbrot.

¹⁷ Mynta te namar kata, to tip bad to pyrkhat ïa kaei ba phan sa leh; namar la thew ïa ka basniew ïa u kynrad jong ngi, bad ka ïing jong u baroh: naba u long u khun u Belial katta katta, katba ym lah ïakren shuh bad u.”

¹⁸ Ynda kumta, ka Abigail ka la pynkloi bad ka la shim arspah tylli ki kpu, bad ka Waiñ ar lywa, bad san tylli ki langbrot ba la khreh lypa, bad san shang u Kew ba la sdieh, bad shispah rynjup ki soh kismis, bad arspah tylli ki kpu stang u soh Dumbur, bad ka la buh ïa ki halor ki kadda.

¹⁹ Bad ka la ong ha la ki shakri, “To leit ma phi ha shuwa jong nga; ha khmih, ngan sa wan hadien jong phi:” hynrei, kam shym ïathuh ïa la u tnga u Nabal.

²⁰ Te katba ka shong halor ka kadda, bad ba ka dang hiar na ka ranab uta u lum, te, ha khmih u Dabid bad u paid jong u ki ïawan hiar pyrshah ïa ka; bad ka la ïashem bad ki.

²¹ Te u Dabid u la lah ong, “Shisha lehnohei ba nga la da ïa kiei kiei baroh ba une u don ha ka ri khlaw, katba ym shym la jah noh ei ei ruh em na kita baroh ki jong u; bad u la siew kylliang ïa nga da ka basniew namar ka babha.

²² To U Blei un leh kumta bad tam ruh ïa ki nongshun u Dabid, lada ngan pynsah im na kiei kiei baroh ki jong u hamar ba ka la shai mynstep ïa uwei ruh u khun shynrang.”

²³ Te haba ka Abigail ka la ïohi ïa u Dabid, ka la pynkloi bad ka la hiar na kata ka kadda, bad ka la hap dem la ka khmat ha khmat u Dabid, bad ka la dem ngon haduh khyndew.

²⁴ Bad ka la hap ha ki kjat jong u, bad ka la ong, “Ko kynrad jong nga, to kane ka pop kan long halor jong nga, halor jong nga hi keiñ: nga kyrpad ïa me, to shah ïa ka shakri jong me ba kan kren ha me, to shahshkor ruh ïa ki ktien ka shakri jong me.

²⁵ Nga kyrpad, wat ai ba u kynrad jong nga un ñiew ei ei ïa une u riew Belial, une u Nabal keiñ: naba kumba long ka kyrteng jong u, kumta ruh u long ma u; ‘u Nabal’ long ka kyrteng jong u, bad ka jingbieit ka snoh ha u: hynrei, ma nga ka shakri jong me ngam shym ïohi ïa kita ki shakri u kynrad jong nga, kiba me la phah.

²⁶ Mynta te, ko kynrad jong nga, katba im U Trai, bad katba im ka mynsiem jong me, namar ba U Trai u la khang ïa me ban ym pynmih snam, bad ban ym pynhiar kput da la ka jong ka kti, to ai te ïa ki nongshun jong me, bad kita kiba thew ïa ka basniew ïa u kynrad jong nga, ba kin long kum une u Nabal.

²⁷ Te mynta kane ka jingai sngewbha kaba ka shakri jong me ka la wallam ïa u kynrad jong nga, to kan long ka jong kine ki samla kiba bud ïa u kynrad jong nga.

²⁸ To map, nga kyrpad ïa me, ïa ka jingpalat ka shakri jong me: namar U Trai da shisha un pynlong ka ïing kaba skhem ïa u kynrad jong nga, naba u kynrad jong nga u ïaleh ïa ki jingïaleh thma ki jong U Trai; bad yn ym shem ei ei ka basniew ha me baroh ki sngi jong me.

²⁹ La u briew u la ïeng ïa ka ban beh ïa me ruh, bad ban wad ïa ka mynsiem jong me, pynban, ka mynsiem u kynrad jong nga kan long ba la tehsong ha ka jingteh ka jingim bad U Trai U Blei jong me; bad ïa ki mynsiem ki nongshun jong me un shat noh, kum na ka pdeng ka jingshat maw.

³⁰ Te haba U Trai un leh ïa u kynrad jong nga katba kum kita kiei kiei baroh ki babha ïa kiba u la kren shaphang jong me, bad ba un thung nongsynshar ïa me halor ki Israel;

³¹ te kane kan ym long ka jingkhuslai ïa me, lymne ka jingpang dohnud ïa u kynrad jong nga, ba me la pynmih snam khlem daw, lymne ba u kynrad jong nga u la pynhiar kput ma u hi: te haba U Trai u la leh ïa ka babha ïa u kynrad jong nga, ynda kumta, to kynmaw ïa la ka shakri.”

³² Te u Dabid u la ong ha ka Abigail, “Long ba la kyrkhu ïa U Trai, U Blei ki Israel, uba la phah ïa pha ha kane ka sngi ban ïashem bad nga:

³³ bad to long ba la kyrkhu ïa ka jingleh stad jong pha, bad to long ba la kyrkhu ma pha ruh, kaba la khang ïa nga ha kane ka sngi ba ngan ym pynmih snam, bad ban ym pynhiar kput da la ka jong ka kti.

³⁴ Namar da shisha, katba im U Trai, U Blei ki Israel, uba la khang ïa nga ba ngan ym pynsniew ïa pha, lymda pha la pynkloi ma pha ïa ka ban wan ïashem bad nga, shisha yn ym da la pynsah ïa u Nabal hamar kaba lashai mynstep uwei ruh u khun shynrang.”

³⁵ Kumta, u Dabid u la pdiang na ka kti jong ka ïa kita kiei kiei kiba ka la wallam ha u: bad u la ong ha ka, “To khie leit kiew ha kaba suk sha la ïing; ha khmih, nga la shahshkor ïa ka ktien jong pha, bad nga la pdiang sngewbha ïa pha.”

³⁶ Te ka Abigail ka la wan sha u Nabal; te, ha khmih, u don ka jingkhawai ha la ïing, kum ka jingkhawai syiem; bad ka dohnud u Nabal ka la kmen eh hapoh jong u, naba u la buaid eh: namar kata, kam shym ïathuh shikyntien ruh ha u, lymne ka barit lymne ka bakhraw, haduh ba kan da shai mynstep.

³⁷ Te mynstep, haba kata ka jingbuaid u Nabal ka la pyngngad, te ka tnga jong u ka la ïathuh ha u ïa kine ki ktien, te ka dohnud jong u ka la ïap noh hapoh jong u, bad u la kylla long kum u maw.

³⁸ Bad ynda la dep kumba shiphew sngi, U Trai u la shoh ïa u Nabal, ba kumta u la ïap noh.

³⁹ Te haba u Dabid u la ïohsngew ba la ïap u Nabal, u la ong, “Long ba la kyrkhu U Trai, uba la ïasaid ïa ka daw ka jingjahburom jong nga na ka kti u Nabal, bad uba la khang ïa la u shakri na kaba leh sniew: naba U Trai u la pynphai ïa ka jinglehsniew u Nabal halor ka khlieh jong u hi.” Bad u Dabid u la phah ïakren bad ka Abigail, ïa ka ban shim kurim ïa ka.

⁴⁰ Bad haba ki shakri u Dabid ki la wan poi sha ka Abigail sha Karmel, ki la ïakren ha ka, ki da ong, “U Dabid u la phah ïa ngi sha pha, ïa ka ban shim kurim ïa pha ha u.”

⁴¹ Te ka la ïeng, bad ka la dem ngon haduh khyndew, bad ka la ong, “Ha khmih, ka shakri jong me kan long ka shakri ïa ka ban sait ïa ki sla'jat ki shakri u kynrad jong nga.”

⁴² Bad ka Abigail ka la pynkloi, bad ka la ïeng bad ka la shong halor ka kadda, bad san ngut na ki samla kynthei jong ka ki la bud ïa ka; te ka la leit bud ïa kita ki nongkit-ktien u Dabid, bad ka la long ka tnga jong u.

⁴³ Bad u Dabid u la shim ruh ïa ka Ahinoam na Jesril; te kine baroh ar ngut ki la long ki tnga jong u.

⁴⁴ Hynrei, u Saul u la lah ai ïa ka Mikhal ka khun jong u, kaba ka tnga u Dabid, ha u Phalti u khun u Laish, uba na Gallim.