1 SAMUEL 24 - KA BAIBL

U Dabid u pyllait im ïa u Saul ha ka krem En-gedi

¹ Te haba u Saul u la wan phai na kaba beh ïa ki Philistia, la ïathuh ha u, da kaba ong, “Ha khmih u Dabid u ha ri khlaw En-gedi.”

² Ynda kumta, u Saul u la shim lai hajar ki rangbah ba la kynsai na ki Israel baroh, bad u la leit wad ïa u Dabid bad ïa u paidbah jong u halor ki mawsiang ki 'lang khlaw.

³ Te ha lynti u la wan poi ha ki jingker ki langbrot, ha kaba la don ka krem; bad u Saul u la leit bsut ïa ka ban leit khyndew. Te u Dabid bad u paidbah jong u ki la ïashong rieh ha kaba kham shapoh kata ka krem;

⁴ Te ki rangbah u Dabid ki la ong ha u, “Ha khmih, kane hi ka sngi ba U Trai u la ong ha me shaphang jong ka, ‘Ha khmih, ngan aiti ïa u nongshun jong me ha ka kti jong me, ba men ïoh leh ïa u katba me ibit.’ ” Te u Dabid u la ïeng, bad u la ot noh ha kaba rieh ïa ka rmiang kata ka barandi kaba ha u Saul.

⁵ Hadien kata, ka dohnud u Dabid ka la dung ïa u, namar ba u la ot noh ïa ka rmiang barandi u Saul.

⁶ Bad u la ïathuh ïa la ki rangbah, “To U Trai un khang ba ngan leh ïa kane ïa la u kynrad, ïa uba la sleh jong U Trai, kat ban rah ïa la ka kti pyrshah ïa u, haba u long ïa uba la sleh jong U Trai.”

⁷ Kumta, u Dabid u la khang ïa la ki rangbah da kine ki ktien, bad um shym shah ïa ki ban ïeng pyrshah ïa u Saul. Te u Saul u la ïeng ban mih noh na kata ka krem, bad u la leit noh.

⁸ Hadien kata, u Dabid ruh u la ïeng, bad u la mih noh na kata ka krem, bad u la pyrta nadien u Saul, u da ong, “Ko syiem kynrad jong nga.” Te haba u Saul u la kyrtiang, u Dabid u la dem ïa la ka khmat haduh khyndew, bad u la dem ngon.

⁹ Bad u Dabid u la ong ha u Saul, “Balei ba me sngap ïa ki ktien ki briew kiba ong, ‘Ha khmih, u Dabid u thew ïa ka basniew ïa me?’

¹⁰ Ha khmih, ha kane ka sngi ki khmat jong me ki la ïohi ba U Trai u la aiti ïa me ha ka kti jong nga ha kane ka sngi ha kata ka krem: bad don kiba la ong ïa nga ban pynïap ïa me: hynrei, nga la pyllait im ïa me; bad nga la ong, ‘Ngan ym rah ïa la ka kti pyrshah ïa la u kynrad; namar u long ïa uba la sleh jong U Trai.’

¹¹ Bad nalor kata ruh, to khmih, ko kpa jong nga, shisha, to khmih ïa ka rmiang ka barandi jong me ha ka kti jong nga; namar na kaba nga la ot noh ïa ka rmiang ka barandi jong me, khlem da pynïap ïa me, to tip keiñ bad to khmih ba ha ka kti jong nga ym don ka jingbymman lymne ka jingsniew, bad ba ngam shym la leh pop ïa me, pynban, ma me, me beh mrad ïa ka mynsiem jong nga khnang ban kem ïa ka.

¹² To U Trai un bishar hapdeng jong nga bad jong me, bad to U Trai un pynhiar kput ïa nga halor jong me: hynrei, ka kti jong nga kan ym long halor jong me.

¹³ Kumta ka ong ka ktien ki tymmen, ‘Na u bymman ka mih ka bymman:’ hynrei, ka kti jong nga kan ym long halor jong me.

¹⁴ Hadien jongno u la wan mih u syiem ki Israel? Hadien jongno me beh? Hadien u ksew baïap, hadien u thyllah keiñ.

¹⁵ Namar kata, to U Trai un long nongbishar, bad to un bishar hapdeng jong nga bad jong me, to un khmih ruh, bad un ïasaid ïa ka hok jong nga, bad pyllait ïa nga na ka kti jong me.”

¹⁶ Te haba u Dabid u la wai noh ban kren ïa kine ki ktien ha u Saul, u Saul u la ong, “Kane ka long ka jingsawa ktien jong me, ko Dabid u khun jong nga?” Bad u Saul u la pynjam ïa la ka ktien, bad u la ïam.

¹⁷ Bad u la ong ruh ha u Dabid, “Me kham hok ma me ban ïa nga: naba ma me, me la ai ïa nga da ka babha, nga te nga ai ïa me da ka basniew.

¹⁸ Bad ha kane ka sngi me la pyni ba me la leh ïa ka babha ïa nga: namar haba U Trai u la aiti ïa nga ha ka kti jong me, ma me pynban mem shym la pynïap ïa nga.

¹⁹ Namar lada u briew un da shem ïa la u nongshun, un pyllait noh ïa u ha kaba suk? namar kata, to U Trai un ai ïa me da ka babha na ka bynta kata kaba me la leh ïa nga ha kane ka sngi.

²⁰ Te mynta, ha khmih, nga tip skhem ba men long syiem shisha, bad ba yn pynskhem ïa ka hima Israel ha ka kti jong me.

²¹ Mynta te, to smai ha nga da U Trai, ba men ym ot noh ïa u symbai jong nga hadien jong nga, bad ba men ym pynduh ïa ka kyrteng jong nga na ka ïing u kpa jong nga.”

²² Te u Dabid u la smai ha u Saul. Bad u Saul u la leit sha la ïing; hynrei, u Dabid bad u paidbah jong u ki la leit kiew sha kata ka kut.