1 SAMUEL 23 - KA BAIBL

U Dabid ha Keilah bad ha ka ri khlaw

¹ Ynda kumta, ki la ïathuh ha u Dabid, ki ïa-ong, “Ha khmih, ki Philistia ki ïaleh thma ïa ka Keilah, bad ki ïalute ïa ki kyntem.”

² Namar kata, u Dabid u la kylli na U Trai, u da ong, “Ngan leit ne em, bad ngan pom ïa kine ki Philistia?” Te U Trai u la ïathuh ha u Dabid, “Khie leit, bad pom ïa ki Philistia, bad pyllait im ïa ka Keilah.”

³ Te ki rangbah u Dabid ki la ïa-ong ha u, “Ha khmih, ngi ïasheptieng wat hangne ha Judah: sa katno tam te lei lei lada ngin leit sha Keilah ban ïaleh ïa ki paidïapom ki Philistia?”

⁴ Ynda kumta, u Dabid u la kylli pat na U Trai. Bad U Trai u la ïathuh ha u bad u la ong, “To ïeng, to leit hiar sha Keilah; namar ngan sa aiti ïa ki Philistia ha ka kti jong me.”

⁵ Kumta, u Dabid bad ki rangbah jong u ki la ïaleit sha Keilah, bad u la ïaleh thma ïa ki Philistia, bad u la knieh noh ïa ki masi jong ki, bad u la pom ïa ki da ka jingpynïap kaba khraw. Kumta u Dabid u la pyllait im ïa ki nong Keilah.

⁶ Ka la long te, haba u Abiathar u khun u Ahimelekh u la phet ïap sha u Dabid ha Keilah, ba u la wallam ruh ïa ka ephod ha la ka kti.

⁷ Te la ïathuh ha u Saul ba u Dabid u la wan poi sha Keilah. Bad u Saul u la ong, “U Blei u la aiti ïa u ha ka kti jong nga: naba la set kut ïa u, haba u la rung shapoh ka shnong kaba don ki khyrdop bad ki dieng jingkhang.”

⁸ Bad u Saul u la lum khar paid ban ïaleh thma, ban leit hiar sha Keilah, ban ker kut ïa u Dabid bad ïa ki rangbah jong u.

⁹ Te u Dabid u la tip ba u Saul u la shetbuit sniew pyrshah ïa u; bad u la ong ha u Abiathar u lyngdoh, “To wallam shane ïa kata ka ephod.”

¹⁰ Ynda kumta, u Dabid u la ong, “A Trai, U Blei ki Israel, u shakri jong me u la ïohsngew shisha ba u Saul u thew ban wan sha Keilah, ïa ka ban pynjot noh ïa ka shnong namar jong nga.

¹¹ Te kine ki rangbah Keilah kin aiti noh ne em ïa nga ha ka kti jong u? bad un wan hiar ne em u Saul, kumba u la ïohsngew u shakri jong me? A Trai, U Blei ki Israel, nga kyrpad ïa me, to ïathuh ha la u shakri.” Te U Trai u la ïathuh, “Un wan hiar keiñ.”

¹² Ynda kumta, u Dabid u la kylli, “Kine ki rangbah Keilah kin aiti noh ne em ïa nga bad ïa ki rangbah jong nga ha ka kti u Saul?” Te U Trai u la ïathuh, “Kin aiti noh keiñ.”

¹³ Ynda kumta, u Dabid bad u paidbah jong u, kumba hynriewspah ngut, ki la ïeng bad ki la leit noh na Keilah, bad ki la leit kylleng kat sha kaba ki lah. Te la ïathuh ha u Saul ba u Dabid u la phet noh na Keilah; u ruh u la pep ban leit mih noh.

¹⁴ Te u Dabid u la shong ha ka ri khlaw ha ki kut, bad u la shong sah ha ri lum ha ka ri khlaw Siph. Te u Saul u la wad ïa u ha la ka sngi, hynrei, U Blei um shym la aiti noh ïa u ha ka kti jong u.

¹⁵ Te u Dabid u la ïohi ba u Saul u la mih noh khnang ban wad ïa ka jingim jong u: te u Dabid u la don ha ri khlaw Siph ha ka 'law lynnong.

¹⁶ Te u Jonathan u khun u Saul u la ïeng, bad u la leit sha u Dabid ha kata ka 'law lynnong; bad u la kyrshan bor ïa ka kti jong u ha U Blei.

¹⁷ Bad u la ong ha u, “Wat sheptieng: naba ka kti u Saul u kpa jong nga kan ym ïoh kem ïa me; te men ïoh synshar halor ki Israel; bad nga ruh ngan long uba kham hajan ïa me; bad u Saul u kpa jong nga u tip ïa kata.”

¹⁸ Te ki baroh ar ngut ki la ïateh ka jutang ha khmat U Trai: te u Dabid u la shong sah ha kata ka 'law lynnong, bad u Jonathan u la leit noh sha la ïing.

¹⁹ Ynda kumta, ki Siph ki la leit kiew sha u Saul ha Gibeah, ki da ong, “U Dabid um buhrieh ïa lade bad ngi ha ki kut ha ka 'law lynnong ha i lum rit Hakhilah, iba shaphang shathie na Jeshimon?

²⁰ Mynta te, ko syiem, to da wan hiar, katba kum ka jingkwah ka dohnud jong me baroh ban wan hiar; te kan long ha ngi keiñ ban aiti noh ïa u ha ka kti u syiem.”

²¹ Bad u Saul u la ong, “To long phi ïa kiba la kyrkhu na U Trai; namar phi la leh isynei ïa nga.

²² Nga kyrpad ïa phi, to leit khreh bha, bad to tip skhem bad khmih bniah ïa ka jaka jong u ha kaba u shait ïaid, bad uei ba la ïohi ïa u hangta: naba ki ïathuh ha nga ba u leh sian shikatdei.

²³ To khmih te namar kata, bad to tip bha ïa kita ki jaka rieh baroh ha kiba u rieh, bad to wan phai pat sha nga khnang, te ngan ïaleit lem bad phi: bad lada u don ha kane ka ri, ngan wad ïa u kylleng ha ki hajar Judah baroh.”

²⁴ Te ki la ïeng, bad ki la leit sha Siph ha shuwa u Saul: hynrei, u Dabid bad u paidbah jong u ki la don ha ri khlaw Maon, ha kata ka pynthor kaba shaphang shathie na Jeshimon.

²⁵ U Saul ruh bad u paidbah jong u ki la leit wad ïa u. Te la ïathuh ha u Dabid: namar kata, u la leit hiar ha uta u mawsiang, bad u la shong ha kata ka ri khlaw Maon. Bad haba u Saul u la ïohsngew ïa kata, u la beh nadien u Dabid ha kata ka ri khlaw Maon.

²⁶ Te u Saul u la leit na kawei ka liang uta u lum, bad u Dabid bad u paidbah jong u na kawei pat ka liang uta u lum: bad u Dabid u la pynkloi ban leit noh ba u sheptieng ïa u Saul; namar u Saul bad u paidbah jong u ki la ker tawiar ïa u Dabid bad ïa u paidbah jong u ban kem ïa ki.

²⁷ Hynrei, u nongkit-ktien u la wan ha u Saul, u da ong, “To pynkloi, bad to wan noh; naba ki Philistia ki la wan hiar thma ha ka ri.”

²⁸ Kumta, u Saul u la leit phai noh na kaba beh nadien u Dabid, bad u la leit ïaleh ïa ki Philistia: namar kata, ki la khot kyrteng ïa kata ka jaka “Sela-hammah-lekoth.”

²⁹ Bad u Dabid u la leit kiew nangta, bad u la shong ha ki kut ha En-gedi.